ގަވާއިދާ ހިލާފަށް ރާއްޖެއިން ބޭރަށް ގާތްގަނޑަކަށް 3.8 މިލިއަން ރުފިޔާގެ ބޭރު ފައިސާ ގެންދަން އުޅުނު މައްސަލައިގައި މަނީލޯންޑަރިންގެ ތުހުމަތުކޮށް ހައްޔަރުކުރި ބަންގްލަދޭޝްގެ ހަ މީހުންގެ ބަންދުގެ މުއްދަތު އިތުރުކޮށްފިއެެވެ.

އެ މީހުންނަކީ:،

  • އެމްޑީ މޮހިއްދީން ޗޯދްރީ 28އ
  • ރަޖިބް 31އ
  • އަޖްގޮރް މިރިދާ 37އ
  • އެމްޑީ ޝަހިން މިއާހް 46އ
  • މުހައްމަދު މައިނުއްދީން ސަލާހު 35އ
  • މުހައްމަދު އަބްދުﷲ 38އ

އެ މީހުންނަށް ފުރަތަމަ ޖެހީ ދިހަ ދުވަހުގެ ބަންދެކެވެ. އެ މުއްދަތު މިއަދަށް ހަމަވާތީ ބަންދާމެދު ގޮތެއް ނިންމަން ކްރިމިނަލް ކޯޓަށް އިއްޔެ ހާޒިރުކުރުމުން އެ މީހުންނަކީ އަދިވެސް މުޖުތަމައަށް ނުރައްކާ އޮތް ބައެއް ކަމަށް ނިންމައި އެ އެންމެންގެ ބަންދަށް ވަނީ 30 ދުވަސް ޖަހައިފައެވެ.

ކޯޓު އަމުރުގައިވާ ގޮތުން މި މައްސަލައިގައި ހައްޔަރުކުރި އެމްޑީ މޮހިއްދީން ޗޯދްރީ އަކީ މީގެ ކުރިންވެސް ރާއްޖެއިން ފައިސާ ބޭރުކުރުމުގެ މަސައްކަތް ކުރަމުންދިޔަ ފަރާތެކެވެ.

ކޯޓު އަމުރުން އެނގޭ ގޮތުގައި މި މައްސަލައިގައި ފުލުހުން ވަނީ އެ މީހުންގެ މައްޗަށް އެކަށީގެންވާ ހެކި ހޯދައިފައެވެ. އޭގެ ތެރޭގައި އިންޓެލިޖެންސް ރިޕޯޓާއި ހެކިންގެ ބަޔާނާއި ސީސީޓީވީން ފާހަގަވާ ކަންކަމުގެ މައްޗަށް ތައްޔާރުކޮށްފައިވާ ސްކްރީން ޝޮޓް ފޮޓޯ ރިޕޯޓު ހިމެނެއެވެ.

ފުލުހުން ބުނެފައިވާ ގޮތުގައި އެ ހަ މީހުންގެ އަތުން 174,161 ޔޫއެސް ޑޮލަރާއި 56,760 ޔޫރޯ އާއި 1،815 ސްޓާލިން ޕައުންޑް ހިމެނޭހެން ޖުމުލަ 18 ގައުމެއްގެ ފައިސާ ފެނިފައިވެއެވެ. އެ ފައިސާގެ ޖުމުލަ އަގު ގާތްގަނޑަކަށް 3.8 މިލިއަން ރުފިޔާ އަށް އަރާ ކަމަށް ވެސް ފުލުހުން ބުނެފައިވެެއެވެ.

ފުލުހުން އާންމުކޮށްފައިވާ ފޮޓޯގައިވާ ގޮތުން އެ ފައިސާ ފޮރުވާފައި ހުރީ ސީރިއަލް ޕެކެޓުތަކެއްގެ ތެރޭގައެވެ.