ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާއަށްވެސް ފުލުހުންގެ ހިދުމަތުން ބޭސްފަރުވާކޮށްދޭން ޖެހޭ ގޮތަށް ފުލުހުންގެ ވަޒީފާގެ ގަވާއިދު އިސްލާހުކޮށްފިއެވެ.

ފުލުހުންގެ ވަޒީފާގެ ގަވާއިދަށް ގެނައި ދެވަނަ އިސްލާހުގައި ބުނެފައި ވަނީ ފުލުހުންގެ އާއިލާތަކަށް ބޭސްފަރުވާކޮށްދޭ އުސޫލުން، ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާއަށްވެސް ފުލުހުންގެ ހިދުމަތުން ބޭސްފަރުވާ ކޮށްދޭން ޖެހޭނެކަމަށެވެ.

ވާޖިބު އަދާކުރަމުންދަނިކޮށް ނިޔާވާ ފުލުހުންގެ ޖަނާޒާ ވަކި ރަސްމިއްޔާތެއްގެ ގޮތުގައި ބޭއްވުމަށް ނިންމިދާނެ ކަމަށް ވެސް ގަވާއިދު ވަނީ އިސްލާހު ކޮށްފައެވެ.

ނަމަވެސް އެގޮތަށް ނިންމަން ވާނީ ފުލުހުންގެ އޮފިސަރު ނިޔާވި ހާލަތާއި ދިމާވި ހާދިސާގައި ކަން ހިނގި ގޮތާއި މުވައްޒަފު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓު ބޯޑަށް ހުށަހަޅައި އެ ބޯޑުން ނިންމާ ގޮތުގެ މަތިން ކަމަށް ވަނީ ބުނެފައެވެ.