ރ. އަނގޮޅިތީމުގައި 72 އަހަރުގެ ދިވެހި އަންހެނަކަށް ގަދަކަމުން ޖިންސީ ގޯނާކޮށް، މަރާލާނެކަމުގެ އިންޒާރު ދިން މައްސަލައިގައި ހައްޔަރުކުރި މީހާގެ ބަންދަށް 15 ދުވަސް ޖަހައިފިއެވެ.

ފުލުހުންގެ މީޑިއާ އޮފިޝަލް "ވަން" އަށް މިއަދު ވިދާޅުވީ، އެ މައްސަލަ ރޭ 8:30 ހާއިރު ފުލުހުންނަށް ހުށަހަޅާފައިވާ ކަމަށެވެ.

ފުލުހުން މިރޭ ބުނީ އެ މީހާގެ ބަންދާއިމެދު ގޮތެއް ނިންމުމަށް މިއަދު ކޯޓަށް ހާޒިރުކުރުމުން 15 ދުވަހަށް ބަންދުގައި ބެހެއްޓުމަށް އަމުރުކޮށްފައިވާ ކަމަށެވެ.

ފުލުހުން ބުނީ އަނިޔާ ލިބުނު މީހާއަށް އަނގޮޅިތީމު ހެލްތު ސެންޓަރުގައި ފަރުވާދިނުމަށްފަހު ދޫކޮށްލާފައިވާ ކަމަށެވެ.

މި މައްސަލައާ ގުޅިގެން، ކޯޓު އަމުރެއްގެ ދަށުން 44 އަހަރުގެ ދިވެހި ފިރިހެނަކު ރޭ 9:57 އެހައިކަންހާއިރު ހައްޔަރުކޮށްފައިވާ ކަމަށް ފުލުހުން ބުންޏެވެ.

"ވަން" އަށް އެނގިފައިވާ ގޮތުގައި އެ އަންހެން މީހާއަށް ޖިންސީ ގޯނާކޮށްފައި ވަނީ އިޝާ ނަމާދަށް ހުއްޓައި މުޅި ގެއިން ކަރަންޓު ކަނޑާލުމަށް ފަހުއެވެ. އޭނާގެ އިތުރުން އެގޭގައި އިތުރު ފިރިހެނެއް ވެސް އުޅެއެވެ. އޭނާ އަށް ގޯނާ ކޮށްފައިވަނީ އެ ފިރިހެން މީހާ ރަށުން ބޭރުގައި ހުއްޓައެވެ.

އެނގިފައިވާ ގޮތުގައި ޖިންސީ ގޯނާގެ މައްސަލައިގައި ހައްޔަރުކުރީ މުހައްމަދު އާދަމް ކިޔާ މީހެކެވެ. އޭނާ އަކީ މަސްތުވާތަކެތި ބޭނުންކުރާ ކަމުގެ ތުހުމަތު އޮތް މީހެކެވެ. އޭނާ ވަނީ ވަރަށް ފަހުން އުމުރާއަށް ވެސް ގޮސްފައެވެ.

މި މައްސަލަ ފުލުހުން ދަނީ ތަހުގީގު ކުރަމުންނެވެ.