ސަސްޕެންޝަނުގައި ހުރި ސޮފްވާންގެ ބޮޑެތި ތުހުމަތުތަކެއް: ވީއޭއެމްއިން އިންކާރު ކުރޭ!

ގައުމީ އަންހެން ވޮލީ ޓީމުގެ ކޯޗުކަމުގައާއި ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ހިންގާ ކޮމިޓީގައި ކުރިން ހުރި ސޮފްވާން އަހުމަދު އެމަގާމުން ވަކިކޮށް، އޭނާ ވަނީ އުމުރަށް ވޮލީބޯޅައިން ސަސްޕެންޑް ކޮށްފައެވެ. އެއީ ތުހުމަތުކުރެވޭ ޖިންސީ ގޯނާގެ މައްސަލައެއް ބަލަމުންދާތީ ކަމަށް ވީއޭއެމްއިން ބުނެފައިވެއެވެ. އެ މައްސަލަ ވީއޭއެމްއިން ވަނީ ފުލަށްވެސް ހުށަހަޅައިފައެވެ. ސޮފްވާން އުމުރަށް ސަސްޕެންޑް ކުރަން ނިންމާފައިވަނީ މިދިޔަ މާޗު މަހުގެ ތެރޭގައެވެ.

ދެހާސް ސައުވީސް ވަނަ އަހަރު ބޭއްވި ކާވާ މުބާރާތުގައި އަންހެން ޓީމަށް އިރުޝާދު ދިން ސޮފްވާންގެ މައްސަލައެއް މިދިޔަ އަހަރު އޮކްޓޯބަރު މަހުގެ ތެރޭގައި ވީއޭއެމްއިން ވަނީ ބަލަން ފަށައިފައެވެ. އެ މައްސަލަ ވީއޭއެމްއިން ބެލީ ފަސް މެމްބަރުންގެ ކޮމިޓީއަކުންނެވެ. މައްސަލަ ބެލުމަށް ފަސް މެމްބަރުންގެ ކޮމިޓީއެއް ނަގައި، ވީއޭއެމް އެތެރޭގެ މައްސަލައެއްގެ ގޮތުގައި ބަލާފައިވާ އިރު، އެ ކޮމިޓީގެ ރިޕޯޓަށް ބިނާކޮށް ވީއޭއެމްއިން ވަނީ މާޗު މަހު ކުރިންވެސް ސޮފްވާނަށް ފިޔަވަޅު އަޅައިފައެވެ. އެގޮތުން ހެޑް ކޯޗުކަމުގެ މަގާމުން ސޮފްވާން ވަކިކުރުމަށާއި، އެފަދަ މަގާމަކަށް ކުރިއަށް އޮތް ފަސް އަހަރު ތެރޭގައި އޭނާ އައްޔަން ނުކުރެވޭނެ ގޮތަށް ސަސްޕެންޑް ކޮށްފައިވެއެވެ.

އެ މައްސަލަ ފަހުން އެޑްހޮކް ކޮމިޝަނަކުން ބަލައި ރިޕޯޓް އެކުލަވާފައިވާ އިރު، ވީއޭއެމްގެ ހާއްސަ އާއްމު ޖަލްސާގައި އެ ރިޕޯޓް ބަލައިގަނެ، އެކަމާ ގުޅޭގޮތުން ފިޔަވަޅު އަޅަން ނިންމީ މާޗު މަހުއެވެ.

ވީއޭއެމްއިން އެފަހަރު އެޅި ފިޔަވަޅުގައި އެ އިދާރާގެ މެމްބަރުންގެ ތެރޭގައި ހިމެނޭ އެއްވެސް ކުލަބެއްގެ ހިންގާ ކޮމިޓީގައި ސޮފްވާން ހިމެނިފައިވާނަމަ، އެ ކުލަބެއްގެ ހިންގާ ކޮމިޓީން ސޮފްވާން ވަކިކުރުމަށް ވަނީ 60 ދުވަހުގެ މުހުލަތެއް ދީފައެވެ. އަދި، އެ މުއްދަތުގެ ތެރޭގައި އެފަދަ ކުލަބެއްގެ ހިންގާ ކޮމިޓީން ސޮފްވާން ވަކިކޮށް، އޭނާ އެ ކުލަބުގެ ހިންގާ ކޮމިޓީން ވަކިކުރިކަން ބަޔާންކޮށް ކޮމިޝަނާ އޮފް ސްޕޯޓްސް ދޫކޮށްފައިވާ ލިޔުން ވީއޭއެމްއަށް ހުށަހެޅުމަށް ވަނީ އަންގައިފައެވެ.

އެ ލިޔުން ބަޔާންކޮށްފައިވާ މުއްދަތުގައި ވީއޭއެމްއަށް ހުށަނާޅައިފިނަމަ، އެ ކުލަބެއް ވީއޭއެމްގެ ދަފްތަރުން އުނިކުރާ ގޮތަށް ނިންމާފައިވާ އިރު، މިފަދަ ގޮތަކަށް އުނިކުރެވޭ ކުލަބަކަށް ވީއޭއެމްގެ މެމްބަރުކަން ލިބޭނީ މީލާދީ ދެއަހަރު ފަހުން ކަމަށްވެސް ވަނީ ނިންމައިފައެވެ.

އެ މައްސަލަ ފުލުހުން ބެލުމަށްފަހު އެކަމުގައި ދައުވާ ކުރަން ބޭނުންވާ ހެކި ލިބިފައިނުވާތީ، އެ މައްސަލަ ފުލުހުން ވަނީ ފައިލް ކޮށްފައެވެ. އެކަން އަންގައި މައްސަލަ ނިމުނު ގޮތުގެ ލިޔުން 18 ވަނަ ދުވަހު ސޮފްވާނަށް ހިއްސާކޮށްފައިވެއެވެ. އެ ލިޔުން "ވަން ސްޕޯޓްސް"އަށް ވަނީ ލިބިފައެވެ. އެކަމާ ގުޅިގެން ސޮފްވާން މީޑިއާއަށް ހިއްސާކުރި ބަޔާން ވެސް "ވަން ސްޕޯޓްސް"އަށް ލިބިފައިވެއެވެ. އަދި ކޯޗު ސޮފްވާން ވަނީ އެ ބަޔާނުގައިވާ ވާހަކަތަކަކީ އޭނާގެ ވާހަކަތައްކަން ޔަގީން ކޮށްދީފައެވެ.

ސޮފްވާންގެ ތުހުމަތު ވީއޭއެމްއަށް: ބުނަނީ ފްރޭމް ކުރީ ކަމަށް

ސޮފްވާން މީޑިއާއަށް ހިއްސާކުރި ބަޔާނުގައި ވަނީ ވީއޭއެމްއިން މައްސަލަ ބަލަން ހެދި ކޮމިޓީއަކީ ސައްހަ ކޮމިޓީއެއް ނޫން ކަމަށާއި، އެފަދަ މައްސަލަތައް ބަލަން ވީއޭއެމްގެ އަސާސީ ގަވާއިދުގެ 43 ވަނަ މާއްދާއިން ލީގަލް ކޮމިޝަނެއް އުފައްދާ މަސްއޫލިއްޔަތާ ޒިންމާ ދީފައި އޮއްވައި މި މައްސަލަ ބަލާފައިވަނީ ފަސޭހައިން "ފްރޭމް" ކުރެވޭނެ ގޮތަކަށް ކަމަށެވެ.

"ވޮލީބޯލް އެސޯސިއޭޝަނުން ސަފްވާން ފުރޭމް ކުރަން މައްސަލައެއް ބަލަން ހެދި ކޮމިޓީ އަކީ ސައްހަ ކޮމިޓީއެއް ނޫން. އެފަދަ މައްސަލަތައް ބަލަން ވީއޭއެމްގެ އަސާސީ ގަވާއިދުގެ 43 ވަނަ މާއްދާއިން ލީގަލް ކޮމިޝަނެއް އުފައްދައި މަސްއޫލިއްޔަތާ ޒިންމާ ދީފައި އޮއްވައި މި މައްސަލަ ބަލާފައިވަނީ ފަސޭހައިން ސޮފްވާން ފުރޭމް ކުރެވޭނެހެން،" ސޮފްވާން ކޯޗު ބަޔާނުގައިވެއެވެ.

ސޮފްވާން ބުނީ އެ ކޮމިޓީއަކީ އެކްސްކޯ ގުރޫޕުގައި މެމްބަރުންނަށް އިންޒާރު ދީފައިވާ އިއްޒަތު ވަހީދު ދިން ނަންތަކެއް ހިމަނައިގެން ހަދާފައިވާ ކޮމިޓީއެއް ކަމަށެވެ. ސޮފްވާން ބުނީ "އެ ކޮމިޓީގައި ތިބީ ޒާތީ ގޮތުން ޖައްސާލާފައިވާ،" މީހުންތަކެއް ކަމަށެވެ.

"އެ ކޮމިޓީގައި ތިބީ ސޮފްވާންއަށް އަނިޔާ ދިނުމަށް ގޮވާލި ވީއޭއެމްގެ އެކްސްކޯ ދެ މެމްބަރުން ކަމަށްވާ ނައިބު ރައީސް އިދާރީ އިއްޒަތު ވަހީދު، ވީއޭއެމްގެ ނައިބު ރައީސް އަންހެން އާއިދާ އަބްދު ހަކީމް އަދި ސޮފްވާނާ ޒާތީ ހަސަދަ އޮންނަ ވީއޭއެމްގެ އެކްސްކޯ މެމްބަރު ޖެނެރަލް ސެކްރެޓަރީ މުހައްމަދު ސައީދު، އަދި ކޮމިޓީގެ ޗެއާއަކަށް ލާފައިވަނީ ސޮފްވާން ފުރޭމް ކުރަން ވީއޭއެމްގެ ރައީސް މުހައްމަދު ލަތީފް ބުނިހާ ގޮތަކަށް ކަންކަން ކޮށްދޭނެ ކަމުގެ ޔަގީންކަން ލަތީފަށް އޮންނަ އެކްސްކޯ މެމްބަރު އަހުމަދު ނަޝީދު (ތުއްތުކޯ). މީގެ އިތުރުން އެކްސްކޯ މެމްބަރު ފަހުމީ އަދި ރާމިޒުވެސް ކޮމިޓީގައި ހިމަނާފައިވޭ،" ސޮފްވާން ބުނެފައިވެއެވެ.

ސޮފްވާން ބުނެފައި ވަނީ ރައީސް ލަތީފުގެ ގާތް އެކުވެރިޔާ އަލީ ލަތީފަކީ މައްސަލަތައް ބަލަން ވީއޭއެމްގެ ހިންގާ ގަވާއިދުން ބާރުލިބިގެން ހަދާފައިވާ ލީގަލް ކޮމިޝަންގެ މެމްބަރެއް ކަމަށާއި، ކޮމިޓީއެއް ހަދައިގެން މައްސަލަ ބަލަމުން ދިޔައީ އަލީ ލަތީފުގެ ވެސް އެހީތެރިކަމާއެކުގައި ކަމަށެވެ.

ސޮފްވާން ބުނީ ކޮމިޓީއަށް އޭނާ ހުށަހެޅި އެއްވެސް ހެއްކެއް ބަލައިނުގަންނަން ނިންމި ކަމަށާއި، ކުށުން ބަރީއަވާން ދިފާއުގައި ވާހަކައެއް ދައްކަން އެކަށޭނެ ފުރުސަތެއްވެސް ދީފައި ނުވާ ކަމަށެވެ.

"ސޮއިކުރަން ގެންގޮސް ކައިރީގައި ބަޔާން ބާއްވާ ޓީވީން ބަޔާން ދެއްކުމުން، ޓީވީން ދެއްކި ބަޔާނަކީ ސޮފްވާން ދީފައިވާ ބަޔާންކަން ކަށަވަރުވުމުން، ކައިރީގައި އޮތް ބަޔާނުގައި ސޮއިކުރުމުގެ ކުރިން ބަޔާނުގެ ފުރަތަމަ ސަފްހާ ކިޔަން ފެށުމުން ގައިރު ގާނޫނީ ކޮމިޓީގެ މެމްބަރަކު ބުނެފައިވަނީ ތީ ދެންމެ ޓީވީން ދެއްކި ބަޔާން ކަމުގައެވެ. ދެންމެ ކީ ދިގު ބަޔާނެއް އަނެއްކާވެސް ކިޔަނީ ކީއްކުރަންތޯ އެހި، އެހެން ބުނުމުން ޖަވާބުގައި ސޮފްވާން ބުނެފައިވަނީ އެ ކޮމިޓީއަށް އިތުބާރު ނުކުރާ ކަމަށާއި ކިޔާފަ ނޫނީ ބަޔާނުގައި ސޮއި ނުކުރާނެ ކަމަށް. ބަޔާނުގެ ދެވަނަ ގަނޑުން ފެށިގެން، ސޮފްވާން ދީފައިވާ ޓީވީން ދެއްކި ބަޔާނުގައި ނެތް، ސޮފްވާން ބޮޑެތި ޖިނާއީ ކުށްތަކެއް ކުރިކަމަށް އަމިއްލައަށް އިއުތިރާފުވެފައިވާ ވާހަކަތަކެއް ހުރުމުން އޮޅުވާލައިގެން ބަޔާނެއް ހަދައި ދިން ކަމަށްބުނެ އެ ވާހަކަ ސަފްވާން ދެއްކުމުން ޖެނެރަލް ސެކްރެޓަރީ ސައީދު ވަނީ އެ ބަޔާން ސޮފްވާން އަތުން ދަމައިގަނެ ނައްތާލާފައި. އަދި، އަސްލު ބަޔާން ޕުރިންޓް ކުރުމަށް ނައިބު ރައީސް އިދާރީ، އިއްޒަތު ވަހީދު އަތަށްދީ ބަޔާން ޕުރިންޓް ކޮށްގެން ގެނެސް ސޮއިކުރުވާފައި،" ސޮފްވާން ބުނެފައިވެއެވެ.

ސޮފްވާން ބުނެފައިވަނީ އޭނާގެ މައްސަލަ ފުލުހަށް ހުށަހެޅީވެސް "ވީއޭއެމް" އިން ކަމަށާއި، އެކަމުގައި އެކްސްކޯގެ ބައެއް މެމްބަރުން އޭނާއަށް އިންޒާރު ދިން ކަމަށެވެ. އަދި މައްސަލަ ފުލުހަށް ހުށަހެޅީ އޭރު ވީއޭއެމްގެ މުއައްޒަފެއްގެ ގޮތުގައި ހުރި ފާތިމަތު މައިހާ ބުލެކް މެއިލް ކޮށްގެން، ވީއޭއެމްއިން ކަމަށާއި، ސޮފްވާން މައިހާ ބްލެކްމެއިލް ކުރި ކަމަށް މީޑިއާތަކަށް ދިން މައުލޫމާތަކީ ދޮގު މައުލޫމާތުތަކެއް ކަމަށްވެސް ސޮފްވާން ބުންޏެވެ.

އެކަމުގައި ސޮފްވާން ވަނީ އެ މައްސަލަ ބަލަން ބޭނުން ނުވާ ކަމަށް މައިހާ ވީއޭއެމްއަށް ފޮނުވި ކަމަށް ބުނެފައިވާ ސިޓީއަކާއި ބައެއް އެހެން ހެކިވެސް ހިއްސާކޮށްފައެވެ. އެ ސިޓީ ވީއޭއެމްއަށް ނުލިބޭ ކަމަށް ހެދި ކަމަށް ސޮފްވާން ބުންޏެވެ. ސޮފްވާން ބުނީ މައިހާ، "ވީއޭއެމްއިން އުފެއްދި" ބަޔާނުގައި ސޮއިކުރަން ދެކޮޅު ހެދުމުން އެކަމަށް މަޖުބޫރުކުރަން މަސައްކަތް ކުރި ކަމަށެވެ. އަދި އެކަމުގައި ބައެއް ޗެޓް ލޮގްތައް ސޮފްވާން ހިއްސާކުރިއެވެ.

ސޮފްވާން ބުނީ ވީއޭއެމްއިން އެތައް ފަހަރަކު މީޑިއާތައް މެދުވެރިކޮށް، ސާބިތު ނުހިފޭ ހަބަރުތައް އޭނާއޭ ކިޔައިގެން ގެންނަމުން ދިޔައީ "ވޮލީ ކޮމިއުނިޓީ ތެރޭ ސޮފްވާނަށް އޮންނަ އިތުބާރާ ލޯބި ނަފްރަތާއި ރުޅިވެރިކަމަށް ބަދަލުކުރުމަށް،" ކަމަށެވެ.

ސޮފްވާން އިތުރަށް ބުނީ 2019 ވަނަ އަހަރުވެސް އޭނާ "ފްރޭމް ކުރުމަށް ބަޔަކު ކުރި ކަމެއްގެ ތެރެއަށް ފުލުހުންގެ ތެރެއިން ޕޮލިސް ކުލަބުގެ ކޯޗަކާއި، ވީއޭއެމްގެ ރައީސް ލަތީފް ވަދެފައިވާ،" ކަމަށާއި، އެފަހަރު އެކަން ކާމިޔާބު ނުވީ ފުލުހުން މައްސަލަ ބެލުމުން، ފުލުހުން އެ މައްސަލަ ބަލައި މައްސަލަ ސާބިތުނުވާ ކަމަށް ނިންމާފައިވުމުން ކަމަށެވެ.

ސޮފްވާން ވީއޭއެމްގެ ރައީސަށް ތުހުމަތު ކޮށްފައިވަނީ އޭނާ "ފްރޭމް ކޮށްފައި" ވަނީ ވީއޭއެމްގެ މެޖޯރިޓީ ވޯޓު ލިބޭތީ، ރައީސްގެ މައްޗަށް އިތުބާރު ނެތްކަމުގެ ވޯޓެއް ނަގާފާނެ ކަމުގެ ބިރަށް ކަމަށެވެ.

"ސަފްވާން ފުރޭމް ކުރުމުގެ ކުރިއަށް ސަފްވާން ހިންގާ ކޮމިޓީގައި ހިމެނޭ ވޯޓުލެވޭ ކުލަބަކާއި އިތުރުން ވޯޓުލެވޭ ކުލަބެއްގެ ހިންގާ ކޮމިޓީ އެ ކުލަބުގެ ހިންގާ ކޮމިޓީ މެމްބަރުންނަށް އަދި ކުލަބުގެވެސް މެމްބަރަކަށް ނޭނގި ވަގަށް ހިންގާ ކިމިޓީ ބަދަލުކޮށްފައިވެއެވެ. މި މައްސަލަ އެ ދެ ކްލަބުގެ ހިންގާ ކޮމިޓީގެ މެމްބަރުން ކޮމިޝަނަރު އޮފް ސްޕޯޓްސްއަށް ހުށަހެޅުމުން، މައްސަލަ ބެލުމަކާނުލައި ލިޔުމުން ޖަވާބެއް ދީފައިވަނީ މުހައްމަދު ލަތީފު ވަގަށް ރަޖިސްޓްރީ ކުރި ހިންގާ ކޮމިޓީއަކީ އެ ދެކުލަބުގެ ސައްހަ ހިންގާ ކޮމިޓީ ކަމުގައެވެ. މި މައްސަލަ ސްޕޯޓްސް ކޮމިޝަނަރަށް ހުށަހެޅުމުން އެކަމަށް އިންސާފު ހޯދަދީފައި މިއަދާ ހަމައަށް ވެސް ނުވެއެވެ." ސޮފްވާންގެ ބަޔާނުގައިވެއެވެ.

"ވޮލީބޯލް އެސޯސިއޭޝަނުން ގާނޫނުތަކާއި ވީއޭއެމްގެ ހިންގާ ގަވާއިދާއި ހިލާފަށް ކުރަމުން އައި ކަންކަން އަދި ސޮފްވާން ފުރޭމް ކުރަން ކުރާކަންކަން ކުރަމުން އައީ ގާނޫނާއި ހިންގާ ގަވާއިދާ ހިލާފަށްކަން ކޮމިޝަނާ އޮފް ސްޕޯޓްސް މުހައްމަދު ތޮލާލުގެ ސަމާލު ކަމަށް ގެނައުމުން ކޮމިޝަނަރުގެ ޒިންމާ އަދާކުރުމުގައި ފަސްޖެހި އަޅުގަނޑު ފުރޭމް ކުރަން ކޮމިޝަނަރ ނުސީދާކޮށް ދިޔައީ އެހީވަމުން،"

ސޮފްވާން ބުނީ އެ މައްސަލަ ކުޅިވަރު ގައުމީ މަޖިލީހުގެ ސަމާލުކަމަށް ވެސް ގެނައި ކަމަށާއި، އެކަމުގައި އިންސާފު ލިބިފައި ނުވާ ކަމަށެވެ. އަދި ވީއޭއެމްގެ ރައީސް ލަތީފް ވަނީ އިންސާފު ލިބެން ހުރި ހުރިހާ މަގެއް ބަންދުކޮށް، މިނިސްޓަރު އަބްދުﷲ ރާފިއުއަށްވެސް ކަންކަން އޮޅުވާލާފައި ކަމަށް ސޮފްވާން ވަނީ ތުހުމަތުކޮށްފައެވެ.

ވީއޭއެމްގެ ނައިބު ރައީސް އާއިދާ އެކަމަށް އިންކާރުކުރައްވާ

ސޮފްވާންގެ ބަޔާނާއެކު ވީއޭއެމްގެ ރަސްމީ ބަހެއް އަދި މީޑިއާއަށް ހާމަކޮށްފައި ނުވާ ނަމަވެސް، އަންހެން ނައިބު ރައީސް، އާއިދާ ވަނީ ފޭސްބުކްގައި އެކަމަށް ރައްދުދީ ޕޯސްޓެއް ކޮށްފައެވެ. އާއިދާ ވިދާޅުވީ މައްސަލަ ހުށަހެޅުނު އިރު، އަންހެން މެމްބަރެއްގެ ގޮތުގައި އެކްސްކޯގައި އިނދެވުނީތީ ވަރަށް އުފާވާ ކަމަށެވެ. އަދި އޭނާއަކީ މީހުން ފްރޭމް ކުރާނެ މީހެއް ނޫން ކަމަށާއި، ނުހައްގުން ކަމެއް ހިނގާނަމަ އެކަމާ ދެކޮޅަށް އެންމެ ކުރިން ތެދުވާނެ އެކަކަށް ވާނީވެސް އޭނާ ކަމަށް އާއިދާ ވިދާޅުވެފައިވެއެވެ.

އާއިދާ ވިދާޅުވެފައިވަނީ ސޮފްވާންގެ މައްސަލަ ބަލަން ފެށީ އެސޯސިއޭޝަންގައި މަސައްކަތް ކުރަމުންދިޔަ އަދި ގައުމީ އަންހެން ޓީމުގެ ސްކޮޑުގައި ހިމެނޭ ޒުވާން އަންހެން ކުއްޖަކު ބްލެކް މެއިލްކޮށް، ހަފްތާއަކު ދެ ދުވަސް ނުވަތަ ތިން ފަހަރު "ރަންނަމާރި އަރާހެން" އަރާ ގެސްޓް ހައުސްއަށާއި ކޯޗް ސޮފްވާން ދިރިއުޅެމުން ދިޔަ އެޕާޓްމަންޓަށް ގެންގޮސް ޖިންސީ އެދުން ފުއްދަމުންދިޔަ ކަމަށް އަންހެން ކުއްޖާ ޖެއްސި މައްސަލައަކާ ގުޅިގެން ކަމަށެވެ.

"ސޮފްވާން ކޯޗް ކުރިމަތީ ކޮމިޓީ މެމްބަރުންގެ ހާޒިރުގައި އަންހެން ކުއްޖާ ވަނީ ކޯޗް ސޮފްވާން އޭނަ އެތައް ފަހަރަކު ރޭޕް ކުރި ކަމަށް ވެސް ބުނެފަ. އަންހެން ކުއްޖާ އެ މައްސަލަ އެކްސްކޯގެ ސަމާލުކަމަށް ގެނައީ ވޮލީ ރެފްރީންތަކެއް މެދުވެރިކޮށް. އަންހެން ކުއްޖާ ރޮއެފަ އެކަމުން އޭނާ ސަލާމަތްކޮށްދޭން އެދި އާދޭސް ކުރުމުން." އާއިދާގެ ސްޓެޓަސްގައިވެއެވެ.

އަންހެން ކުއްޖާއާ ދެމެދު ދެކެވުނު ވާހަކައިގެ ރެކޯޑިންވެސް އޮތް ކަމަށް އާއިދާ ވިދާޅުވެފައިވާ އިރު، އެ މައްސަލައިގައި އަންހެން ކުއްޖާގެ ވާހަކަ އޭނާގެ "މަންމައާއި ބައްޕަ" ގަބޫލުނުކުރާ ކަމަށްވެސް އާއިދާ ވިދާޅުވެފައިވެއެވެ.

އާއިދާ ވިދާޅުވެފައިވަނީ މައްސަލަ ބަލައި، ފިޔަވަޅު އަޅަން ނިންމި ދުވަހު އަންހެން ކުއްޖާގެ މަައިންބަފައިން ލައްވައި މައްސަލަ އިތުރަށް ކުރިއަށްގެންދަން ބޭނުން ނުވާ ކަމަށްބުނެ، އަންހެން ކުއްޖާ ލައްވައި ސިޓީއެއް ފޮނޮވި ކަމަށާއި، "އެ ސިޓީ ލިޔުނީ ކޯޗް ސޮފްވާން،" ކަމަށެވެ.

"ސޮއި ކޮށްފައިވަނީ އެކުއްޖާއެއް ނޫން. ނަމަވެސް މެއިލް ލިބިފަ ވަނީ އެ ކުއްޖާގެ މެއިލް އިން. އެ މައްސަލަ އިތުރަށް ކުރިއަށްގެންދަން ބޭނުން ނުވުމަކީ އެކަން ނުހިނގާ ކަމުގެ ދަލީލެއް ވެސް ނޫން ދެއްތޯ؟ ޕޮލިހުން މައްސަލަ ނުބަލަން ނިންމީވެސް އެ އަންހެން ކުއްޖާއަށް އެވީ މަޖުބޫރީއެއް ވެގެން އެ ކުއްޖާ އެ މައްސަލަ އިތުރަށް ކުރިއަށްގެންދަން ބޭނުން ނުވީމަ. އެ އަންހެން ކުއްޖާ ފަސް މެންބަރުންގެ ކޮމިޓީއަކަށް އެ ވާހަކަތައް ކިޔައިދިނީ ރެކޯޑް ކުރެވޭނެ މީޓިން އެއްކަން އަންގާފައި ވެސް އޮއްވައި،" އާއިދާ ޕޯސްޓުގައި ވިދާޅުވިއެވެ.

މައްސަލައިގައި މިހާރު ދެ ފަރާތުންވެސް ވާހަކަ ދައްކާފައިވާ އިރު، ވީއޭއެމްގެ ކްލަބުތަކުގެ މައްސަލަތައް މީގެ ކުރިންވެސް ފެންމަތިވެފައިވެއެވެ. އަދި ވޯޓިންގެ މައްސަލަތައްވެސް ކުރިމަތިވެ، ވީއޭއެމްއަކީ އަބަދުވެސް "ސިޔާސީ ހަލަބޮލިކަމުގެ" އިދާރާއެއްގެ ގޮތުގައި ސިފަވެފައިވެއެވެ. އަދި އަބަދުވެސް އެ އިދާރާގެ އެކްސްކޯއަށް ކޯޅުން ބޮޑުކަން ފާހަގަވެފައިވާ އިރު، ބާރުތައް ނެގުމުގެ ކަންކަމަކީ މީގެ ކުރިން އެ އިދާރާއަށް ދިމާވެފައިވާ މައްސަލަތަކެކެވެ.