އެމެރިކާއިން ޑީސަލް އެކްސްޕޯޓްކުރުން މަނާކުރުމަށް އެ ގައުމުގެ ރައީސް ޑޮނަލްޑް ޓްރަމްޕް ގެންގުޅުއްވާ ވިސްނެވުމަކީ އިނގިރޭސިވިލާތަށް އޮތް ވަރަށް ބޮޑު ކަންބޮޑުވުމެއް ކަމަށް، އިނގިރޭސިވިލާތުގެ ބިޒްނަސް ސެކްރެޓަރީ ޖޮނަތަން ރޭނޯލްޑްސް ވިދާޅުވެއްޖެއެވެ.

ލިވަޕޫލްގައި އާދީއްތަ ދުވަހު އޮތް ލޭބަރ ޕާޓީގެ ކޮންފަރެންސްގައި ވާހަކަދައްކަވަމުން ރޭނޯލްޑްސް ވިދާޅުވި ގޮތުގައި، އިނގިރޭސިވިލާތަށް ތެޔޮ ފޯރުކޮށްދޭ އެކި މަގުތައް ހުރި ނަމަވެސް، އެމެރިކާއިން ޑީސަލް ބޭރުކުރުން އެއްކޮށް މަނާކޮށްފިނަމަ އެކަމުގެ ނޭދެވޭ އަސަރު އިނގިރޭސިވިލާތަށް ވަރަށް ބޮޑަށް ކުރާނެއެވެ.

އެމެރިކާގެ އެތެރޭގެ ބާޒާރުގައި ޑީސަލްގެ އަގު ރެކޯޑު މިންވަރަކަށް އުފުލިފައިވުމާއެކު، ކުރިއަށް އޮތް މިޑްޓާމް އިންތިހާބުގެ ކުރިން އަގުތައް ދަށްކުރުމުގެ ގޮތުން 90 ދުވަހުގެ މުއްދަތަށް ޑީސަލް އެކްސްޕޯޓްކުރުން މަނާކުރުމަށް ވިސްނަވަމުން ގެންދަވާ ކަމަށް ޓްރަމްޕް ވަނީ ވިދާޅުވެފައެވެ.

އިނގިރޭސިވިލާތުގައި ހިންގަމުން އައި ގްރޭންޖްމައުތު އަދި ލިންޑްސީ ރިފައިނަރީ ބަންދުކުރުމާ ގުޅިގެން، އެ ގައުމުގައި މިހާރު ހިންގަމުންދަނީ ތެޔޮ ސާފުކުރާ ހަތަރު ރިފައިނަރީއެވެ. ޕޮލިޓިކޯއިން ރިޕޯޓުކޮށްފައިވާ ގޮތުގައި، އިނގިރޭސިވިލާތަށް އެތެރެކުރާ ޑީސަލްގެ ގާތްގަނޑަކަށް ހަބައިކުޅަ އެއްބައި ގެންނަނީ އެމެރިކާއިންނެވެ.

ޑީސަލް އެކްސްޕޯޓްކުރުން މަނާކުރުމުގެ ރަސްމީ ނިންމުމެއް އެމެރިކާގެ ސަރުކާރުން އަދި އިއުލާންކޮށްފައެއް ނުވެއެވެ. ވައިޓް ހައުސްއިން ވަނީ ޑީސަލް ބޭރުކުރުން 90 ދުވަހަށް މަނާކުރުމަށް ތައްޔާރުވަމުންދާ ކަމަށް ދެކެވޭ ވާހަކަތައް ދޮގުކޮށްފައެވެ.

މި ފިޔަވަޅާ ގުޅިގެން ޔޫރަޕްގެ އިސް އޮފިޝަލުންނާއި ފަރަންސޭސިވިލާތުގެ ރައީސް އެމެނުއެލް މެކްރޯން ވެސް ވަނީ ކަންބޮޑުވުން ފާޅުކުރައްވާފައެވެ. ޔޫރަޕިއަން ޔޫނިއަން (އީޔޫ)ގެ ތަރުޖަމާނު އޮލޮފް ގިލް ވިދާޅުވިގޮތުގައި، މިފަދަ ފިޔަވަޅެއްގެ ސަބަބުން އެމެރިކާއާއި ޔޫރަޕަށް ވެސް އޭގެ ނޭދެވޭ އަސަރު ކުރާނެއެވެ.

މީގެ އިތުރުން، އެމެރިކާގެ އެނާޖީ ސެކްރެޓަރީ ކްރިސް ރައިޓް ވިދާޅުވި ގޮތުގައި، ޑީސަލް އެކްސްޕޯޓްކުރުން އެއްކޮށް މަނާކުރުމަކީ އޭގެ ސަބަބުން އެމެރިކާގެ އެތެރޭގެ ތެލުގެ ސަޕްލައިއަށް ވެސް ގެއްލުންވެދާނެ ކަމެކެވެ.