އަމީނީ މަގު އަލުން މަރާމާތުކުރުމަށް ސަރުކާރުން ހިންގާ މަޝްރޫއުގެ ތެރެއިން، ދެވަނަ ސެގްމަންޓުގައި ތާރު އެޅުމުގެ ހުރިހާ މަސައްކަތެއް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ނިންމާލައިފިއެވެ.

އަމީނީ މަގުގެ ތާރުގަނޑު ހަލާކުވެގެން އެ މަގު ޒަމާނީ ފެންވަރަކަށް އަލުން މަރާމާތުކުރުމުގެ މަސައްކަތް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ ތެރޭގައެވެ.

މި މަޝްރޫއު އެކި ފިޔަވަހިތަކަކަށް ބަހާލައިގެން ކުރިއަށްގެންދާއިރު، އިއްޒުއްދީން މަގުން ފެށިގެން ދަރުމަވަންތަ ހޮސްޕިޓަލު ކައިރީގައިވާ ޕާކާ ހަމައަށް ހިމެނޭ ފުރަތަމަ ސެގްމަންޓުގެ މަސައްކަތް ނިންމާލާފައިވަނީ މި ހިނގާ މަހުގެ 15 ވަނަ ދުވަހުއެވެ.

އޭގެ ފަހުން، ދެވަނަ ސެގްމަންޓުގެ އަމަލީ މަސައްކަތް މިމަހުގެ 23 ގައި ފަށައި، ކުރީގެ ބާ ތާރުފަށަލަ ނެގުމަށްފަހު މިހާރު ވަނީ އާ ތާރު އަޅައި ފުރިހަމަކޮށްފައެވެ.

މަގުގެ ދެމެހެއްޓެނިވިކަން އިތުރުކުރުމަށްޓަކައި، މިފަހަރު ތާރު އަޅަމުންދަނީ ދެ ފަށަލައަށެވެ.