މާލެ ސަރަހައްދަކީ ސިއްހީގޮތުން ރައްކާތެރި، ސާފު ވެއްޓަކަށް ހެދުމުގެ ގޮތުން ދުންފަތުގެ އިސްތިއުމާލުކުރާ ފަރާތްތަކަށް ހާއްސަ ކިއޮސްކްތަކެއް ގާއިމުކުރުމުގެ މަޝްވަރާތައް މާލެ ސިޓީ ކައުންސިލާއި ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ކޮށްފިއެވެ.

މާލެ ސިޓީ ކައުންސިލުން މިއަދު އެކްސްގައިކުރި ޕޯސްޓެއްގައި ބުނީ މިކަމާ ގުޅޭގޮތުން ބޭއްވި ބައްދަލުވުމުގައި ޑެޕިއުޓީ މޭޔަރު މީކާއީލް މުހައްމަދު ރިޔާޒާއި، އެޗްޕީއޭގެ އިސްވެރިންގެ އިތުރުން ސިޓީ ކައުންސިލްގެ ބައެއް މެންބަރުން ބައިވެރިވެވަޑައިގެންނެވި ކަމަށެވެ.

މި މަޝްވަރާތަކުގެ މައިގަނޑު އަމާޒަކީ މާލޭގެ މަގުތަކާއި އާންމު ތަންތަނުގައި ދުންފަތުގެ އިސްތިއުމާލުކުރާ މިންވަރު ބޮޑުތަނުން ކުޑަކުރުންކަމަށް ސިޓީ ކައުންސިލުން ބުންޏެވެ.

އާންމު ތަންތަނުގައި ދުންފަތުގެ އިސްތިއުމާލުކުރުން ހުއްޓުވުމަށް ކަމާބެހޭ މުއައްސަސާތަކާ ގުޅިގެން ފިޔަވަޅުތަކެއް އެޅުމަށް ސިޓީ ކައުންސިލުން ފާސްކުރީ މިދިޔަ އޮގަސްޓު 12 ގައި ބޭއްވި ޖަލްސާގައެވެ.

ހުޅުމާލޭ އުތުރު ދާއިރާގެ ކައުންސިލަރު ފާތިމަތު ޒަހިއްޔާ ހުށަހެޅުއްވި މި މައްސަލައިގައި ބަޔާންކޮށްފައިވަނީ، ޕާކުތަކާއި މައިޒާންތަކަށް ކުޑަކުދިން ގޮވައިގެންދާ އާއިލާތަކަށް ދުންފަތުގެ ދުމުގެ ސަބަބުން ސިއްހީ ގޮތުންނާއި އެހެނިހެން ގޮތްގޮތުން ބޮޑެތި ތަކުލީފުތަކެއް އުފުލަންޖެހޭ ކަމުގެ ޝަކުވާ އިންތިހާއަށް ލިބެމުންދާ ކަމަށެވެ. އަދި އެފަދަ ފަރާތްތަކާ މެދު ގާނޫނީ ފިޔަވަޅު އެޅުމަށް ފުލުހުންނަށް ދެންނެވުމަށް ވެސް އޭނާ އެދިވަޑައިގެންނެވިއެވެ.