ރާއްޖޭން މިރޭ ކުޅުނު އެކުވެރިކަމުގެ މެޗުގައި ކިރިގިސްތާން ކައިރިން ތަފާތު ބޮޑުކޮށް ބަލިވެފައިވާ އިރު، އެމެޗުގެ ފުރަތަމަ ހާފުގައި ކޮޅަށް ގޯލްތައް ވަނީ އަމިއްލަ ގޯސްތަކެއް ހެދިގެން ކަމަށާއި، ދެވަނަ ހާފުގައި ކުޅުންތެރިން ދެއްކި ހިތްވަރު ފާހަގަކުރާ ކަމަށް ކޯޗު އިސްތަވާން އުރުބާނީ ބުނެފިއެވެ.

ކިރިގިސްތާނުގެ ވެރިރަށް ބިޝްކެކްގައި ކުޅުނު މެޗުން ރާއްޖެ ބަލިވީ 5-0 އިންނެވެ. މިރޭ ކުޅުނު މެޗުގައި ކިރިގިސްތާނުން ރާއްޖެ ކޮޅަށް ފަސް ގޯލްވެސް ޖެހީ ފުރަތަމަ ހާފުގައެވެ. މިރޭގެ މެޗަކީ މިފަހަރު އިންޓަނޭޝަނަލް ބްރޭކްގައި ރާއްޖޭން ކުޅުނު ދެވަނަ މެޗެވެ. ފުރަތަމަ ޗައިނާއާ ދެކޮޅަށް އެގައުމުގައި ކުޅުނު މެޗުން ރާއްޖެ ބަލިވެފައި އޮތީ 3-0 ގެ ނަތީޖާއަކުންނެވެ.

"އަހަރެމެން ކޮޅަށް ފަސޭހަ ގޯލްތަކެއް ވަން ފުރަތަމަ ހާފުގައި. ބަލާލީމަވެސް ފެންނާނެ އަމިއްލަ ގިނަ ގޯސްތަކެއް ހެދިގެން ކޮޅަށް ގޯލްތައް ވަނީ. އެކަމަކު ދެވަނަ ހާފު ފެނުނީ ވާދަވެރި މެޗެއްގެ ގޮތަށް. އަހަންނަށް އެނގޭ ކުރިންވެސް ކިރިގިސްތާނަކީ އަހަރެމެންނަށް ވަރުގަދަ ޓީމެއްކަން. އެކަން އެނގޭ. ދެން އަނެއްކަމަކީ ފުރަތަމަ ހާފުގައި ކޮޅަށް ފަސް ގޯލް ވަނުމަކީ އެއްވެސް ކޯޗަކަށް ފަސޭހަވާނެ ކަމެއް ނޫން. މި ބަލިން ފެނުނު ރަނގަޅު ކަމަކީ ދެވަނަ ހާފަށް ނުކުމެ އެ ދެއްކި ކުޅުން. އެ ލީ އެފަޓް. އަހަރެމެން ދެވަނަ ހާފުގައި ގޯލަކާ ކައިރިއަށް ޖެހުނު،" މެޗަށްފަހު އުރުބާނީ ބުންޏެވެ.

އުރުބާނީ ބުނީ ކިރިގިސްތާނަކީ މިހާރު އޭޝިއާ ލެވެލްގެ ވަރުގަދަ މުބާރާތްތަކުގައި ވާދަކުރާ ޓީމެއްކަމުން މިއީ ރާއްޖެއަށް މޮޅެއް މަޖުބޫރު މެޗުތަކެއް ނޫންކަން އެނގޭ ކަމަށެވެ. އަދި ހާލަތު މިގޮތަށް އޮތް ނަމަވެސް ޒުވާން ހުނަރުވެރި ކުޅުންތެރިން ޓެސްޓް ކޮށްލުމަށް މެޗުން ފުރުސަތު ލިބުނު ކަމަށް އުރުބާނީ ބުންޏެވެ.

ކިރިގިސްތާނު މިރޭގެ މެޗު ތަފާތު ބޮޑުކޮށް ކާމިޔާބުކުރި ނަމަވެސް، މި ފަހަކަށް އައިސް ކިރިގިސްތާނުގެ މައްޗަށް ރާއްޖެ އޮތީ ދެމެޗުން ކުރި ހޯދައިފައެވެ. މިރޭ ކުޅުނު މެޗުގެ ކުރިން ރާއްޖޭން ހަތަރު މެޗެއް ކިރިގިސްތާނާ ދެކޮޅަށް ކުޅެފައިވެއެވެ. އެންމެ ފުރަތަމަ 1997 ވަނަ އަހަރު އެގައުމުގައި ކުޅުނު ވޯލްޑް ކަޕް ކޮލިފިކޭޝަން މެޗުގައި ކިރިގިސްތާނުން ރާއްޖެ ބަލިކުރީ 3-0 އިންނެވެ. އަދި އެފަހަރު ރާއްޖޭގައި ކުޅުނު މެޗުގައި ކިރިގިސްތާން މޮޅުވީ 6-0 އިންނެވެ. އެންމެފަހުން ދެޓީމުން އޭއެފްސީ ޗެލެންޖް ކަޕްގައި ކުޅުނު މެޗުން ރާއްޖެ 2-0 އިން މޮޅުވި އިރު، އޭގެ ކުރިން 2012 ވަނަ އަހަރު އޭއެފްސީ ޗެލެންޖް ކަޕް ކޮލިފިކޭޝަން ރާއްޖޭން ކުޅުނު މެޗުގައި 2-1 އިން ކިރިގިސްތާން ބަލިކުރިއެވެ.

އެހެންކަމުން މިއީ 1997 ވަނަ އަހަރަށްފަހު ކިރިގިސްތާނުން ރާއްޖެ ބަލިކުރި ފުރަތަމަ ފަހަރެވެ.

އުރުބާނީ އިތުރަށް ބުނީ ފަސޭހަ ނޫނަސް މި މެޗުތައް ކުޅުމަކީ މުހިއްމު ކަމެއްކަން ފާހަގަކޮށްފައެވެ. އަދި ރާއްޖޭގެ ކުޅުންތެރިން ހެދި ގޯސްތަކަށް ޝަކުވާއެއް ކުރަން ބޭނުންނުވާ ކަމަށާއި، އެއީ ދަސްކުރުމުގެ ބައެއްކަން އުރުބާނީ ފާހަގަކުރިއެވެ.

ރާއްޖެއަށް މިފަހަރު އިންޓަނޭޝަނަލް ބްރޭކްގައި ދެން އޮތީ ލުބުނާނާ ދެކޮޅަށް ކުޅޭ މެޗެވެ. އެމެޗާ ގުޅޭ ގޮތުން އުރުބާނީ ބުނީ، އިދިކޮޅު ޓީމު ވަރުގަދަ ނަމަވެސް ކުޅުންތެރިން ޓެސްޓް ކުރަން އެ މެޗުވެސް އެހީވާނެ ކަމަށެވެ.

"އަހަރެމެން މި ތައްޔާރު ވަނީ ސާފް ޗެމްޕިއަންޝިޕަށް. އެހެންވީމަ ލުބުނާން މެޗަކީވެސް ކުޅުންތެރިންގެ ފެންވަރު ވަޒަންކުރަން ލިބޭނެ މުހިއްމު މެޗެއް. ލުބުނާނަކީ ވަރުގަދަ ޓީމެއް. ސާފް ޗެމްޕިއަންޝިޕްވެސް މިހާރު ދަނީ ވަރުގަދަވަމުން. އަހަރެމެން ސާފްގެ ގްރޫޕް ސްޓޭޖުގައި ކުޅެން މި ޖެހެނީ އިންޑިއާއާއި ޕާކިސްތާނާ، އެހެންވީމަ މިކަހަލަ ޓަފް މެޗު ހަމަ ބޭނުންވަނީ،" އުރުބާނީ ފާހަގަކުރިއެވެ.

ރާއްޖޭން ދެން މިފަހަރުގެ އިންޓަނޭޝަނަލް ބްރޭކްގައި ލުބުނާނާ ދެކޮޅަށް ކުޅޭ މެޗުވެސް ކިރިގިސްތާނުގައި ކުޅެން އޮތް އިރު، އެމެޗު އޮންނާނީ އަންނަ ބުރާސްފަތި ދުވަހު ރާއްޖެ ގަޑިން ހަވީރު 5:00 ގައެވެ.