ސަޗިން ޓެންޑުލްކާއަށްފަހު ވަން ޑޭ އިންޓަނޭޝަން ކްރިކެޓް (އޮޑީއައި) ގައި އިންޑިއާ ގައުމީ ޓީމަށް 15،000 ލަނޑު ހަމައެކަނި ކުޅުންތެރިޔަކަށް ވިރާތު ކޯލީ ވެއްޖެއެވެ.

އިންޑިއާއިން ރޭ ވެސްޓް އިސްޑީސްއާ ދެކޮޅަށް ކުޅުނު އޯޑީއައި ސީރީސްގެ ފުރަތަމަ މެޗު ކާމިޔާބުކުރީ އަށް ވިކެޓުންނެވެ. ތިން މެޗުގެ ސީރީސްގެ ފުރަތަމަ މެޗުގައި ވިރާތު ވަނީ ނުބައިނުވެ 88 ބޯޅައިން 139 ލަނޑު ހަދައިފައެވެ. ވެސްޓް އިންޑީސްއިން 50 އޯވަރުން 295 ލަނޑު ހެދި އިރު، އިންޑިއާއިން ރަނގަޅަށް ކުޅެ، 41.4 އޯވަރުން 300 ލަނޑު ހަމަކުރިއެވެ.

ކޯލީ 86 ސެންޗަރީ މިހާރު އިންޑިއާއަށް ހަދާދީފައިވާ އިރު، އޭނާއަކީ އެގައުމަށް އެންމެ ގިނަ ސެންޗަރީ ހެދި ކުޅުންތެރިޔާއެވެ.

ސަޗިން 18،426 ލަނޑު އޮޑީއައި މެޗުތަކުގައި ހަދާފައިވާ އިރު، ވިރާތު ވަނީ މިހާތަނަށް 15،080 ލަނޑު ހަދައިފައެވެ. ވިރާތު އެ އަދަދަށް ލަނޑު ހެދީ 74 އިނިން އަވަހަށެވެ.

ކޯލީ މިހަފުތާ ތެރޭގައި ވާހަކަ ދައްކަމުން ބުނީ އަންނަ އަހަރު އޮންނަ ވޯލްޑް ކަޕަށްފަހު އޯޑީއައި މެޗުތަކުގައިވެސް ގައުމީ ޓީމަށް ކުޅުނު ހުއްޓާލަން ނިންމާފައިވާ ކަމަށެވެ. އަދި އެ މުބާރާތް ކާމިޔާބުކޮށްދޭން ކުރެވެން ހުރި ހުރިހާ ކަމެއް ކުރާނެ ކަމަށްވެސް ވިރާތު ބުނެފައިވެއެވެ.

އުމުރުން 37 އަހަރުގެ ކޯލީ މިހާރު ޓީ20 މުބާރާތްތަކުން ގައުމީ ޓީމުން ރިޓަޔާކޮށްފައިވާ އިރު، އަންނަ އަހަރުގެ ވޯލްޑް ކަޕް ވެގެން ދާނީ ފަސްވަނަ އޯޑީއައި ވޯލްޑް ކަޕަށެވެ. ވިރާތު ވަނީ 2011 ވަނަ އަހަރު އަމިއްލަ ދަނޑުގައި ވޯލްޑް ކަޕް ހޯދައިފައެވެ. އަދި 2023 ވަނަ އަހަރުގެ ފައިނަލުގައި ވިރާތަށް ވަނީ ނާކާމިޔާބީއާ ކުރިމަތިލާން ޖެހިފައެވެ.