ޔޫކްރެއިނުން ރަސްމީކޮށް މާފަށް އެދުމަށް ދެކުނު ކޮރެއާއިން މިއަދު ގޮވާލައިފިއެވެ. ދެކުނު ކޮރެއާއިން މިކަމަށް ގޮވާލީ، އުތުރު ކޮރެއާގެ ހަނގުރާމައިގެ ދެ އަސީރަކު އެ ގައުމާ ހަވާލުކުރި މައްސަލަ ސިއްރުކުރުމަށް ވެފައިވާ އެއްބަސްވުމާ ހިލާފަށް ޔޫކްރެއިނުން އެކަން ހާމަކުރުމުން ކަމަށް ދެކުނު ކޮރެއާގެ ރިޔާސީ ގަނޑުވަރުން ބުނެފައިވެއެވެ.

ދެކުނު ކޮރެއާގެ ރިޔާސީ ގަނޑުވަރުގެ ސީނިއަރ ޕްރެޒިޑެންޝަލް ސެކްރެޓަރީ ފޯ ޕަބްލިކް ރިލޭޝަންސް ސޮންގް ގީ-ހޮންގް ނެރުއްވި ބަޔާނެއްގައި ވިދާޅުވި ގޮތުގައި، ޔޫކްރެއިނުން އެކަން ހާމަކުރުމަށްފަހު، ސިއްރުކުރުމުގެ އެއްބަސްވުމެއް ނެތް ކަމަށް ބުނެ ދޮގު މައުލޫމާތު ފަތުރާފައިވާތީ އެކަމާ ހިތާމަކުރައްވައެވެ. އަދި މިކަމާ ގުޅިގެން ރަސްމީކޮށް މާފަށް އެދުމަށާއި، އިތުރު ފިޔަވަޅުތައް އަޅަން ޖެހިދާނެ ކަމަށް އޭނާ ވިދާޅުވިއެވެ.

މި މައްސަލަ ފެންމަތިވީ، މިދިޔަ ހަފުތާގައި އދ. ގެ އާންމު މަޖިލީހުގައި ވާހަކަދައްކަވަމުން ޔޫކްރެއިންގެ ރައީސް ވޮލޮޑިމިއަރ ޒެލެންސްކީ، އުތުރު ކޮރެއާގެ ދެ އަސީރަކު ދެކުނު ކޮރެއާއަށް ފޮނުވާފައިވާކަން ހާމަކުރެއްވުމާ ގުޅިގެންނެވެ. ރޮއިޓާސްއިން ރިޕޯޓުކޮށްފައިވާ ގޮތުގައި، މި ދެ މީހުންނަކީ 2025 ވަނަ އަހަރުގެ ޖެނުއަރީ މަހު ރަޝިޔާގެ ކުރުސްކް ސަރަހައްދުން ޔޫކްރެއިންގެ ސިފައިން އަތުލައިގަތް ދެ މީހުންނެވެ.

ދެކުނު ކޮރެއާގެ ރައީސް ލީ ޖޭ މިޔަންގް ވިދާޅުވި ގޮތުގައި، މިކަން ސިއްރުކުރުމަށް ދެ ގައުމުން އެއްބަސްވީ އަސީރުންނާއި އެ މީހުންގެ އާއިލާތަކުގެ ސަލާމަތާއި ރައްކާތެރިކަމަށް ބަލައި، ޑިޕްލޮމެޓިކް އަދި ސަލާމަތީ ސަބަބުތަކަށްޓަކައެވެ. އަދި ޔޫކްރެއިނުން ވެސް މިކަން ސިއްރުކުރުމަށް އެދުނީ، ޔޫކްރެއިންގެ އަސީރުންނާ ބަދަލުކުރުމުގެ ފުރުސަތު ދޫކޮށްލުމުން އަމާޒުވެދާނެ ފާޑުކިޔުންތަކުން ސަލާމަތްވުމަށް ކަމަށް ދެކުނު ކޮރެއާގެ އޮފިޝަލުން ބުނެފައިވެއެވެ.

މިކަމާ ގުޅިގެން ޔޫކްރެއިންގެ ރިޔާސީ އޮފީހާ ހަވާލާދީ ދެކުނު ކޮރެއާގެ ޔޮންހަޕް ނިއުސް އެޖެންސީން ރިޕޯޓުކޮށްފައިވާ ގޮތުގައި، ޔޫކްރެއިނުން މިކަން ހާމަކުރީ މުޅި ޕްރޮސެސްގެ ތަފްސީލުތައް ނުހިމަނައެވެ. އަދި މިފަދަ ކަމެއް މުޅިން ސިއްރުކޮށްގެން ތިބުމަކީ އާދަޔާ ހިލާފު ކަމެއް ކަމަށް ޔޫކްރެއިންގެ އޮފިޝަލުން ބުނެފައިވެއެވެ. މީގެ އިތުރުން، ސިއްރުކުރުމުގެ އެއްބަސްވުމެއް އޮތްކަމަށް ޔޫކްރެއިންގެ އޮފިޝަލުން ވަނީ ދޮގުކޮށްފައެވެ.