ހޮރުމުޒް ކަނޑުއޮޅި އަލުން ހުޅުވާލުމަށް އީރާނުން ހުށަހެޅި ހަތް ދުވަހުގެ ހުށަހެޅުން އެމެރިކާއިން ގަބޫލު ނުކުރީ، ދަތިކުރުމުގެ ފިޔަވަޅުތައް އުވާލުމަށް އީރާނުން ޝަރުތުކުރުމުން ކަމަށް އދ. އަށް ކަނޑައަޅާފައި ހުންނަވާ އެމެރިކާގެ ސަފީރު މައިކް ވޯލްޓްޒް ވިދާޅުވެއްޖެއެވެ.

ވޯލްޓްޒް ވިދާޅުވި ގޮތުގައި، ވޮޝިންޓަނުން މި ހުށަހެޅުން އަނބުރާ ފޮނުވާލީ، ހިފަހައްޓާފައިވާ އެތައް ބިލިއަން ޑޮލަރެއްގެ ފައިސާ ދޫކޮށްލުމަށާއި ދަތިކުރުމުގެ ފިޔަވަޅުތައް އުވާލުމަށް އީރާނުން އެދިފައި ވާތީއެވެ.

އެންބީސީ ނިއުސްއަށް ދެއްވި އިންޓަވިއުއެއްގައި ވޯލްޓްޒް ވިދާޅުވީ، އީރާނާ ދެކޮޅަށް އަޅާފައިވާ ފިޔަވަޅުތަކަކީ ހަމައެކަނި އެމެރިކާގެ ފިޔަވަޅުތަކެއް ނޫން ކަމަށާއި، އެއީ މުޅި ދުނިޔެއިން އަޅާފައިވާ ފިޔަވަޅުތަކެއް ކަމަށެވެ. އެއީ މުޅި ދުނިޔޭގެ ވެސް ސްޓޭންޑްކަން މީހުންނަށް ހަނދާންކޮށްދޭން ޖެހޭ ކަމަށް އޭނާ ފާހަގަކުރެއްވިއެވެ.

ވޯލްޓްޒް އިތުރަށް ވިދާޅުވި ގޮތުގައި، އީރާނުގައި ނިއުކްލިއާ ހަތިޔާރު އުފެއްދުމުގެ ޕްރޮގްރާމެއް އޮވެގެން ނުވާނެ ކަމަށް ބުނެ ވޭތުވެދިޔަ 20 އަހަރުގެ ތެރޭގައި އދ. ގެ ސަލާމަތީ މަޖިލީހުން ވަނީ ހަތް ގަރާރެއް ފާސްކޮށްފައެވެ.

މީގެ އިތުރުން، އދ. ގެ ނިއުކްލިއާ ކަންކަން ބަލަހައްޓާ އިދާރާ ކަމަށްވާ އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) އިން ވެސް އީރާނުގެ މައްސަލަ ސަލާމަތީ މަޖިލީހަށް ހުށަހަޅާފައިވާ ކަމަށް އޭނާ ވިދާޅުވިއެވެ. އެ އިދާރާއިން އެ މައްސަލަ ހުށަހެޅީ، އީރާނުގެ ނިއުކްލިއާ މަރުކަޒުތަކަށް އިންސްޕެކްޓަރުން ވަނުމަށް ހުރަސްއެޅުމާއި، ޔުރޭނިއަމް ފައްކާކުރުމުގެ މަސައްކަތް އެކަށީގެންވާ ގޮތެއްގައި މޮނިޓާކުރުމުގެ ފުރުސަތު ނުދިނުން ފަދަ އުސޫލުތަކާ ހިލާފު އެތައް ކަމެއް ފާހަގަކުރެވިގެން ކަމަށް ވޯލްޓްޒް ވިދާޅުވިއެވެ.