އަންނަ މަހު މެލޭޝިއާގައި ކުރިއަށްދާ އައިސީސީ ޓީ20 ކްރިކެޓް ވޯލްޑް ކަޕް 2028 ގެ ސަބް ރީޖަނަލް ކޮލިފައިންގައި ވާދަކުރުމަށް ތައްޔާރުވާން ރާއްޖޭގެ ކްރިކެޓް ޓީމުން ސްރީ ލަންކާއަށް ފުރައިފިއެވެ.

ކްރިކެޓް ބޯޑް އޮފް މޯލްޑިވްސް (ސީބީއެމް) އިން ބުނީ ރާއްޖޭގެ ޓީމު ލަންކާގައި ކޭމްޕް ކުރާނީ ނުވަ ދުވަހުގެ ތަމްރީނު ކޭމްޕަކަށް ކަމަށެވެ. ޓީމުން މިއަދު ވަނީ ލަންކާއަށް ފުރައިފައެވެ.

ޓީ20 ކްރިކެޓް ވޯލްޑް ކަޕްގެ ސަބް ރީޖަނަލް ކޮލިފިކޭޝަން މެޗުތައް މެލޭޝިއާގައި އޮންނާނީ އަންނަ އޮކްޓޯބަރު މަހު ހަޔަކުން 15 އަށެވެ. ސަބް ރީޖަނަލް ކޮލިފިކޭޝަން މެޗުތައް ދެ ގްރޫޕަކަށް ބަހާލައިގެން ކުރިއަށް ގެންދަން ނިންމާފައިވާ އިރު، ރާއްޖެ ހިމެނެނީ ގްރޫޕް ބީގައެވެ. އެ ގްރޫޕްގައި ދެން ހިމެނެނީ ޗައިނާ، ސައުދީ އަރަބިއާ، ސިންގަޕޫރުގެ އިތުރުން ހޯސްޓް މެލޭޝިއާއާއި ހޮން ކޮންގް ޗައިނާއެވެ.

ގްރޫޕް އޭގައި ހިމެނެނީ ބަހްރެއިން، ބޫޓާން، ކުވައިތު، މޮންގޯލިއާ، މިޔަންމާގެ އިތުރުން ގަތަރާއި ތައިލެންޑެވެ.

ތަމްރީނު ކޭމްޕްގެ ކުރިން ރާއްޖޭގެ ސްކޮޑު ފައިނަލް ކޮށްފައިވާ އިރު، ކޭމްޕް ކުރިއަށްދާނީ އަންނަ މަހު ފަސް ވަނަ ދުވަހާ ހަމައަށެވެ. ކޭމްޕްގެ ތެރެއިން ލަންކާގެ ހައި ޕާފޯމަންސް ޓީމަކާ ދެކޮޅަށް އެކުވެރިކަމުގެ ދެމެޗުވެސް ކުޅެން ހަމަޖައްސާފައިވެއެވެ. އެއީ ގައްލޭ އިންޓަނޭޝަނަލް ކްރިކެޓް ސްޓޭޑިއަމްގައެވެ.

ރާއްޖޭގެ ކްރިކެޓް ޓީމުން ތަމްރީނު ކޭމްޕްގައި ނެޗުރަލް ޓާފްގައި ތަމްރީނުކުރަން ނިންމާފައިވާ އިރު، ތަމްރީނު ކޭމްޕްގެ އެންމެ ބޮޑު މަގުސަދެއްގެ ގޮތުގައި ކްރިކެޓް ބޯޑުން ފާހަގަކޮށްފައި ވަނީވެސް ނެޗުރަލް ޓާފަށް ހޭނުން ކަމަށެވެ. ޓީމުގެ ތަމްރީނުތައް ކުރިއަށްދާނީ އަފްގާނިސްތާން ކޯޗު، އަސަދުﷲ ހާންގެ އިރުޝާދުގެ ދަށުންނެވެ. މިފަހަރު ރާއްޖޭ ޓީމުގެ ކެޕްޓަނަކީ ހަސަން ހާޒިގެވެ.

ރާއްޖޭން ކޮލިފިކޭޝަންގައި ކުޅޭ ފުރަތަމަ މެޗުގައި ޗައިނާއާ ދެކޮޅަށް ނުކުންނާނީ އޮކްޓޯބަރު އަށްވަނަ ދުވަހުއެވެ.