"އަދަދު" ނޫހުން އާންމުކުރި "އައިޝާ" ޑޮކިއުމެންޓްރީއާ ގުޅިގެން ފުލުހުން ހިންގާ ތަހުގީގަށް ހާޒިރުކުރި ސ. މީދޫ/ އައިޝަތު އީޝާ އަޝްރަފްގެ މައްޗަށް ގަޒްފުކުރުމުގެ ދައުވާކޮށްފިއެވެ.

ޕްރޮސިކިއުޓާ ޖެނެރަލް އޮފީހުގެ މީޑިއާ އޮފިޝަލް އަދި ޕަބްލިކް ޕްރޮސިކިއުޓާ ޝަފީއު އަހުމަދު "ވަން" އަށް މިއަދު ވިދާޅުވީ އީޝާގެ މައްޗަށް ދައުވާކޮށްފައިވަނީ މިއަދު ކަމަށެވެ.

"އަދަދު" ނޫހުން އާންމުކުރި "އައިޝާ" ޑޮކިއުމެންޓްރީއާ ގުޅިގެން ފުލުހުން ހިންގި ތަހުގީގަށް މިއަހަރުގެ މޭމަހުގެ ފަސްވަނަ ދުވަހު ހުޅުމާލެ ޕޮލިސް ސްޓޭޝަނަށް އީޝާ ހާޒިރުކުރިއިރު ޖެހިގެން އައި ދުވަހު ވަނީ ހެންވޭރު ޕޮލިސް ސްޓޭޝަނަށް ހާޒިރުކޮށްފައެވެ.

އެ ދުވަހު އީޝާގެ ދިފާއީ ވަކީލު، ކުރީގެ ޕްރޮސިކިއުޓާ ޖެނެރަލް ހުސައިން ޝަމީމު މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ ފުލުހުން އީޝާއަށް ކޮށްފައިވަނީ މައިގަނޑު ގޮތެއްގައި ތިން ސުވާލެއް ކަމަށެވެ. އެ ސުވާލުތަކަކީ ކޮބައިކަން ޝަމީމް ހާމަނުކުރެއްވި ނަމަވެސް ވިދާޅުވީ ސުވާލުގައި ފާހަގަކުރި ކަންކަމަށް އީޝާވަނީ އިންކާރުކޮށްފައި ކަމަށެވެ.

"ގަޒްފުކުރިކަމަށް ތުހުމަތުކުރަނީ، އަޅުގަނޑުމެން ސާފުކުރަން އެހިން ކާކާތޯ އެކަމެއް ކުރީ. އެ ސުވާލަކަށް ފުލުހުން ޖަވާބެއް ނުދޭ،" ޝަމީމް ވިދާޅުވެފައިވެއެވެ.

"ދެން އަޅުގަނޑުމެން ދިފާއުގަ ވާހަކަދައްކަން ފުރުސަތަކަށް އެދުނީމާ، ދިފާއުގައި ވާހަކަދައްކާކަށް ފުރުސަތެއް ނުއެއްދެއްވާ. ހަމަ އެއްގޮތަކަށް ވެސް ދިފާއުގައި ވާހަކަދައްކާކަށް ފުރުސަތެއް ނުއެއް ދެއްވާ"

ނަމަވެސް ބަޔާނުގައި، ދިފާއުގައި ވާހަކަދައްކަން ފުރުސަތު ނުދިންކަމަށް ފުލުހުން ފާހަގަކުރި ކަމަށާއި މި މައްސަލައިގެ ތަހުގީގުގައި އީޝާގެ ބަޔާން ނިމުނީކަމަށް ފުލުހުން މައުލޫމާތު ދީފައިވާކަމަށް ޝަމީމް ވިދާޅުވެފައިވެއެވެ.

ހުޅުމާލެ ޕޮލިސް ސްޓޭޝަނަށް އީޝާ ހާޒިރުކުރި ދުވަހު ޝަމީމު ވިދާޅުވެފައިވަނީ އީޝާ، ބޭނުންވަނީ ހުރިހާ ތަފުސީލެއް ތަހުގީގަށް ކިޔައިދޭންކަމަށް ކަމަށެވެ. ޝަމީމް ވިދާޅުވެފައިވަނީ މައްސަލައިގެ ތަހުގީގަށް ބަޔާންދިނުމަށް އީޝާ އެއްބަސްވެފައިވާ ކަމަށެވެ. އީޝާ، ބަޔާން ދިނުމުން އެކަމާ ގުޅޭ އިތުރު މައުލޫމާތު ދޭނެކަމަށް ޝަމީމް ވިދާޅުވެފައިވެއެވެ.

އީޝާއަކީ މި މައްސަލައިގައި އަނިޔާ ލިބިފައިވާ ފަރާތެއް ނުވަތަ ވިކްޓިމްއެއްކަމަށް ޝަމީމު ވިދާޅުވެފައިވެއެވެ. ކުރިއަށް އޮތް ތަނުގައި އީޝާ ވިކްޓިމްއަކަށްވި ގޮތްވެސް މީޑިއާތަކަށް ހާމަކުރާނެކަމަށް ޝަމީމު ވިދާޅުވެފައިވެއެވެ.

މައްސަލައިގެ ތަހުގީގަށް ބޭނުންވާ ވަރަށް ފުލުހުންނަށް މިހާރު މައުލޫމާތު ލިބިފައިވާކަމަށްވެސް ޝަމީމު ވިދާޅުވެފައިވެއެވެ.

މި މައްސަލާ ގުޅިގެން "އަދަދު" ނޫހަށް ފުލުހުންވަދެ އެތަން ބަލާ ފާސްކުރީ މިއަހަރުގެ މާޗު މަހުގެ 27 ގައެވެ.

މި މައްސަލައަކީ ރައީސް ޑރ. މުހައްމަދު މުއިއްޒަށް ގަޒްފުގެ ތުހުމަތުކޮށް އުފައްދާފައިވާ ޑޮކިއުމެންޓްރީއަކާ ގުޅިގެން ހިންގާ ތަހުގީގެކެވެ. މި މައްސަލައިގައި އަދަދުގެ ސީއީއޯ ހުސެއިން ފިޔާޒާއި އެޑިޓަރު ހަސަން މުހައްމަދުގެ މައްޗަށް ފަސް ޖިނާއީ ތުހުމަތެއް ފުލުހުން ކުރެއެވެ. އޭގެ ތެރޭގައި ގަޒްފުގެ ކުށާއި، ކުށެއް ކުރުމަށް ރޭވުމާއި ބައިވެރިވުމުގެ ތުހުމަތު ހިމެނެއެވެ.

މި މައްސަލައިގައި އެ ދެ މީހުން ވެސް ވަނީ ފުލުހަށް ހާޒިރު ކޮށްފައެވެ.

މި މައްސަލާގައި ހަސަން އާއި ފިޔާޒުގެ އިތުރުން، ޑޮކިއުމެންޓްރީއަށް މައުލޫމާތު ދިންކަމަށް ތުހުމަތުކުރާ އީޝާ އަޝްރަފްގެ ޕާސްޕޯޓުވެސް ވަނީ ހިފަހައްޓައިފައެވެ.