ބާރުގަދަ ޑްރަގެއް ކަަމަށްވާ ޑައިމޯފިން ޓްރެފިކް ކުރި މީހަކު އުމުރަށް ޖަލަށްލުމަށް ކުރިމިނަލް ކޯޓުން ހުކުމްކޮށްފިއެވެ.

މި މައްސަލައިގައި ކުރިމިނަލް ކޯޓުން ހުކުމް ކުރީ، ވ. ފެލިދޫ، އަނބުގަސްދޮށުގެ، ސާޖިދު އަބްދުލް މުހައިމިންގެ މައްޗަށެވެ.

އޭނާގެ މައްޗަށް ދައުލަތުން ޑައިމޯފިން ޓްރެފިކް ކުރުުމުގެ ކުށުގެ ދައުވާކުރީ، ފުލުހުން ޕެޓްރޯލް ކުރަމުންދިޔަ ވަގުތެއްގައި، ދުއްވާފައިދިޔަ ސައިކަލެއްގެ ފަހަތުގައި އޭނާ އިންއިރު، އަމަލުތައް ހުރިގޮތުން އޭނާ މަސްތުވާތަކެތި ގެންގުޅޭކަަަމަށް ތުހުމަތު ކުރެވިގެން ފުލުހުން އެ ސައިކަލް ހުއްޓުވައި އޭނާ ފުލުހުންގެ ބެލުމުގެ ދަށަށް ގެންގޮސް ހަށިގަނޑު ބަލައި ފާސްކުރުމުން ޑައިމޯފިން ފެނިގެންނެވެ.

މި މައްސަލައިގައި ސާޖިދު ވަނީ ޑައިމޯފިން ޓްރެފިކް ކުރުުމުގެ ކުށަށް އިއުތިރާޒްކޮށްފައެވެ. ނަަމަވެސް ދައުލަތުން ހެކި ހުށަހެޅިއެވެ.

ސާޖިދުގެ ފަރާތުން ދިފާއުގައިވެސް ހެކި ހުށަހެޅިއެވެ. ނަމަވެސް އޭނާ ހެކި ހުށަހެޅި ހެކިން ކޯޓަކަށް ހާޒިރެއް ނުވެއެވެ. އެހެންކަމުން ސާޖިދުގެ ރުހުމާއެކު މައްސަލަ ކުރިއަށްގެންދިޔައީ އޭނާގެ ފަރާތުން ހުށަހެޅި ހެކިންގެ ހެކިބަސް ނުނަގައެވެ.

އެއަށްފަހު ހުށަހަޅާފައިވާ ހެކިތަކާއި ދެފަރާތުގެ ވާހަކަތަކަށްފަހު، ކޯޓުން ހުކުމްކުރީ ސާޖިދު އުމުރަށް ޖަލަށް ލުމާއެކު 100،000 ރުފިޔާއިން ޖޫރިމަނާ ކުރުމަށެވެ.

އެއަށްފަހު ޖޫރިމަނާ ފައިސާ 12 މަސް ދުވަހުގެ ތެރޭގައި މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކަން ވެސް މި ހުކުމުގައި ވަނީ އޭނާއަށް އަންގައިފައެވެ.