ޖަރުމަނު ލީގުގެ އެންމެފަހުގެ ޗެމްޕިއަން ބަޔާން މިއުނިކުން ލީގުގައި ކުޅުނު ފުރަތަމަ މެޗުގައި ސްޓަޓްގާޓް ބަލިކޮށް، ވަރުގަދަ ފެށުމަކުން ފަށައިފިއެވެ.

އަމިއްލަ ދަނޑުގައި ރޭ ބަޔާނުން ސްޓަޓްގާޓް ބަލިކުރީ 5-1 ގެ ނަތީޖާއަކުންނެވެ. ބަޔާނުން ރޭގެ މެޗަށް ނުކުތީ ޖަރުމަނުގެ ސީޒަން ހުޅުވަން ކުޅުނު ސުޕަ ކަޕް ކާމިޔާބުކޮށްގެންނެވެ.

ފުރަތަމަ ހާފުގައި ޑަޔޮޓް އުޕަމެކާނޯ، ބޮލުން ޖެހި ގޯލާއެކު ބަޔާނުން ލީޑު ނެގި ނަމަވެސް، ފުރަތަމަ ހާފުގައި އިތުރު ގޯލެއް ފެނިގެން ގޮސްފައެއް ނުވެއެވެ. އެކަމަށް ހުރަސް އެޅީ ސްޓަޓްގާޓްގެ ގޯލްކީޕަރު ފަބިއަން ބްރެޑްލޯއެވެ. އޭނާ ވަނީ ފުރަތަމަ ހާފުގެ ފަހު ބައިގައި މޮޅު ސޭވްތަކެއް ކޮށްފައެވެ.

ނަތީޖާއެއްގެ ގޮތުން، މެޗުގެ ދެވަނަ ހާފު ފެށިގެން މާގިނައިރެއް ނުވެ، ސްޓަޓްގާޓުން މެޗު އެއްވަރުކުރިއެވެ. އެ ގޯލް ޖަހައިދިނީ ޖޯޝާ ވަގްނޯމަންއެވެ.

އެ ގޯލާއެކު މެޗު އެއްވަރުވި ނަމަވެސް، ބަޔާން މަޑުޖައްސާލެވޭ ގޮތެއް ނުވިއެވެ. އެ ގޯލަށް މާގިނައިރެއް ނުވަނީސް، 55 ވަނަ މިނެޓުގައި މައިކަލް އޮލީސޭ ވަނީ އަނެއްކާވެސް ބަޔާނަށް ލީޑު ނަގައިދީފައެވެ. އެއީ ޖޯޝުއާ ކިމިކް ނަގައިދިން ބޯޅައިން ޖެހި ގޯލެކެވެ.

އޭގެފަހުން އަލްފޮންސޯ ޑޭވީސް ނަގައިދިން ހުރަސް ސާފުކޮށްލަން އުޅެނިކޮށް، ވަގްނޯމަން އަތުން ބައިކޮޅަށްވެސް ގޯލެއް ވަދެފައިވާ އިރު، ބަޔާންގެ އަނެއް ގޯލްތައް ޖަހައިދިނީ އެލެކްސެންޑާ ޕަވްލޮވިޗާއި ލުއިސް ޑިއާޒެވެ. އެ ދެ ގޯލަށްވެސް އެސިސްޓް ކޮށްދިނީ އަލަށް މި ސީޒަނަށް ގެންދިޔަ އިސްމާއީލް ސައިބާރީއެވެ.

މޮރޮކޯ އެޓޭކަރު ސައިބާރީ ބަޔާނާ ގުޅުނީ ޕީއެސްވީންނެވެ. އެއީ 43 މިލިއަން ޕައުންޑްގެ އަގަކަށެވެ.