އީރާނަށް ދެމުންގެންދާ އަސްކަރީ ހަމަލާތައް އިތުރަށް ކުރިއަށް ނުގެންގޮސް ވަގުތީގޮތުން މެދުކަނޑާލުމަށް އެމެރިކާގެ ރައީސް ޑޮނަލްޑް ޓްރަމްޕް، އެ ގައުމުގެ އަސްކަރިއްޔާއަށް އަންގަވައިފިއެވެ.

އެމެރިކާގެ ނޫހެއް ކަމަށްވާ 'އެކްސިއޯސް' އިން ރިޕޯޓުކޮށްފައިވާ ގޮތުގައި، ރޭގެ ވަގުތެއްގައި ޓްރަމްޕް މިގޮތަށް ނިންމެވީ، މައްސަލަ ހައްލުކުރުމަށް ޑިޕްލޮމެސީއަށް އިސްކަންދެއްވުމުގެ ގޮތުންނެވެ.

ވައިޓް ހައުސްގެ ދެ މަސްދަރަކާ ހަވާލާދީ އެކްސިއޯސް އިން ބުނި ގޮތުގައި، ފާއިތުވި 13 ދުވަހު މެދުކެނޑުމެއްނެތި އީރާނަށް ހަމަލާދިނުމަށްފަހު، ހުކުރު ދުވަހުގެ ހަމަލާތައް ހުއްޓާލުމަށް ޓްރަމްޕް ވަނީ ނިންމަވާފައެވެ. މި ނިންމެވުމަކީ، ބޮޑު ހަނގުރާމައަކަށް ނުގޮސް، ސުލްހަވެރިކަމާއެކު މަޝްވަރާކުރުމަށް ފުރުސަތު ދިނުމުގެ ގޮތުން ނިންމެވި ނިންމެވުމެއް ކަމަށް އެ މަސްދަރުތަކުން ބުނެފައިވެއެވެ. މީގެ އިތުރުން، މިހާރު ދެމުންދާ ހަމަލާތަކުގެ ސަބަބުން ހާސިލުކުރަން ބޭނުންވާ ނަތީޖާ ހާސިލުވެފައިވާ ކަމަށް ޓްރަމްޕް ގަބޫލުފުޅުކުރައްވާ ކަމަށްވެސް އެ ފަރާތްތަކުން ފާހަގަކޮށްފައިވެއެވެ.

ވައިޓް ހައުސްގައި ވާހަކަފުޅުދައްކަވަމުން ޓްރަމްޕް ވިދާޅުވި ގޮތުގައި، ހަމަލާތައް އިތުރަށް ވަރުގަދަކުރުމުގެ ގާބިލުކަން އެމެރިކާގައި އެބަހުއްޓެވެ. ނަމަވެސް އެންމެ ރަނގަޅު ގޮތަކީ އީރާނާއެކު އެއްބަސްވުމަކަށް އައުން ކަމަށް އެމަނިކުފާނު ވިދާޅުވިއެވެ.

ހަމަލާތައް ވަގުތީގޮތުން މެދުކަނޑާލި ނަމަވެސް، އެމެރިކާގެ އަސްކަރިއްޔާއިން ދަނީ ހާލަތު ގޯސްވެއްޖެނަމަ ފުޅާ ދާއިރާއެއްގައި ހަމަލާދިނުމަށް ވާންޖެހޭ ތައްޔާރީތައް ވަމުން ކަމަށް ރިޕޯޓުތައް ބުނެއެވެ. އެގޮތުން، އަސްކަރީ ކޮންޓިންޖެންސީ ޕްލޭންތައް އެކުލަވާލައި، ކޮންމެ ވަގުތަކުވެސް ބޮޑު ހަނގުރާމައެއް ފަށަން ޖެހިދާނެ ކަމަށް ބަލައި ސިފައިން ތިބީ ތައްޔާރީ ހާލަތެއްގައެވެ. ނަމަވެސް، މިވަގުތު އެމެރިކާގެ ސަރުކާރުގެ ސިޔާސަތަކީ އަސްކަރީ ބާރުގެ ބޭނުންކުރުމުގެ ބަދަލުގައި، ވާހަކަދައްކައިގެން މައްސަލައަށް ސުލްހަވެރި ހައްލެއް ހޯދުން ކަމަށް އޮފިޝަލުންނާ ހަވާލާދީ މީޑިއާތަކުން ރިޕޯޓުކޮށްފައިވެއެވެ.

މި ދަނޑިވަޅަކީ އޮމާން ފަދަ ގައުމުތައް މެދުވެރިކޮށް އީރާނާއެކު މަޝްވަރާތަކެއް ފެށުމަށް މަސައްކަތްކުރަމުން އަންނަ ވަގުތެއް ކަމަށްވާއިރު، ޓްރަމްޕްގެ މި ނިންމެވުމުގެ ސަބަބުން އެ މަޝްވަރާތަކަށް އިތުރު ކުރިއެރުމެއް ލިބިދާނެ ކަމަށް ބެލެވޭ ކަމަށް އެކްސިއޯސް އިން ބުނެފައިވެއެވެ. އެހެންނަމަވެސް، މި މެދުކަނޑާލުމަކީ ކިހާ މުއްދަތަކަށް ދެމިއޮންނާނެ ކަމެއް ކަމާމެދު ރަސްމީ ފަރާތްތަކުން އަދި ވަކި އެއްޗެއް ބުނެފައެއް ނުވެއެވެ.