އެމެރިކާއާއި އީރާނާ ދެމެދު ބަދަލުކުރަމުންދާ އަސްކަރީ ހަމަލާތައް ވަގުތުން ހުއްޓާލައި، މަޝްވަރާތައް އަލުން ފެށުމަށް އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޒް ގޮވާލައްވައިފިއެވެ.

އދ. ގެ ތަރުޖަމާނު ސްޓެފަން ޑުޖަރިކް ނެރުއްވި ބަޔާނަކާ ހަވާލާދީ އަރަބް ނިއުސްއިން ރިޕޯޓުކޮށްފައިވާ ގޮތުގައި، ގަލްފުގެ ސަރަހައްދުގައި ހިނގަމުންދާ ހަމަނުޖެހުންތަކާ މެދު ސެކްރެޓަރީ ޖެނެރަލް ވަނީ ކަންބޮޑުވުން ފާޅުކުރައްވައިފައެވެ. މިގޮތުން، އީރާނުން ހޮރްމުޒް ކަނޑުއޮޅީގައި ދަތުރުކުރާ ބޯޓުފަހަރަށް ދެމުންދާ ހަމަލާތަކާއި، އެމެރިކާއިން އީރާނަށް ދެމުންދާ ހަމަލާތަކުގެ އިތުރުން، އީރާނުން އަވަށްޓެރި ގައުމުތަކަށް އަމާޒުކޮށް ދެމުންދާ ހަމަލާތައް ހުއްޓާލުމަށް އޭނާ ގޮވާލެއްވިއެވެ.

މި ހަމަލާތައް ވަގުތުން ހުއްޓާލަން ޖެހޭނެ ކަމަށާއި، މަސްރަހު އިތުރަށް ގޯސްވިޔަ ނުދިނުމަށްޓަކައި ހުރިހާ ފަރާތްތަކުން ވެސް ކެތްތެރިކަން އިސްކުރަން ޖެހޭކަމަށް ޑުޖަރިކް ވިދާޅުވިއެވެ. ފުރިހަމަ ހަނގުރާމައަކަށް ހިނގައްޖެނަމަ، އެ ސަރަހައްދުގެ ރައްޔިތުންނަށާއި، ބައިނަލްއަގުވާމީ ސުލްހައާއި ސަލާމަތުގެ އިތުރުން ދުނިޔޭގެ އިގުތިސޯދަށް އޭގެ ނޭދެވޭ އަސަރު ވަރަށް ބޮޑަށް ކުރާނެ ކަމުގެ އިންޒާރު ވެސް އޭނާ ދެއްވިއެވެ.

މީގެ އިތުރުން، ބައިނަލްއަގުވާމީ ވިޔަފާރީގެ މުހިންމު މަގެއް ކަމަށްވާ ހޮރްމުޒް ކަނޑުއޮޅީގައި މިނިވަންކަމާއެކު ދަތުރުފަތުރު ކުރެވޭނެ އިންތިޒާމު އަލުން ގާއިމުކުރުމުގެ މުހިންމުކަން ގުޓަރޭޒް ފާހަގަކުރެއްވިއެވެ. ޑިޕްލޮމެޓިކް ހަމަތަކުގެ މަތިން މައްސަލަތައް ހައްލުކުރުމަށްޓަކައި އެމެރިކާއާއި އީރާނުން ވެސް ލަސްނުކޮށް މަޝްވަރާގެ މޭޒަށް އައުމަށް އޭނާ ވަނީ އިލްތިމާސްކުރައްވައިފައެވެ.

މި ގޮވާލުން އައިސްފައިވަނީ، އެމެރިކާއިން އީރާނުގެ 140 އަށްވުރެ ގިނަ އަސްކަރީ އަމާޒުތަކަށް ހަމަލާދީފައިވާ ދަނޑިވަޅެއްގައެވެ. މީގެ ރައްދުގައި އީރާނުން ވަނީ ކުވައިތާއި ބަހުރައިން ފަދަ ގަލްފުގެ ބައެއް ގައުމުތަކުގައި ހުރި އެމެރިކާގެ އަމާޒުތަކަށް ހަމަލާދީފައެވެ. މި ހަމަލާތަކުގެ ސަބަބުން ތެލުގެ އަގު އުފުލި، ކަނޑު ދަތުރުފަތުރުކުރާ ގިނަ ބޯޓުތަކެއް ވަނީ އެ ސަރަހައްދުގައި ތާށިވެފައެވެ.