ވޯލްޑް ކަޕްގައި ދެކުނު އެފްރިކާއަށް ކުޅުނު އެޑަމްސް މަރުވެއްޖެ

މިއަހަރު ވޯލްޑް ކަޕްގައި ދެކުނު އެފްރިކާއަށް ކުޅުނު ޖޭޑަން އެޑަމްސް މަރުވެފައި އޮއްވާ ފެނިއްޖެއެވެ.

ދެކުނު އެފްރިކާ ގައުމީ ޓީމު އަދި މަމެލޮޑީ ސަންޑައުންސްގެ މިޑްފީލްޑަރު، އުމުރުން 25 އަހަރު އެޑަމްސް މަރުވެފައި އޮއްވާ ފެނިފައި ވަނީ ކޭޕް ޓައުންގެ އަވަށެއް ކަމަށްވާ ޝޮޓްޝެކްލޫފްގެ ގެއެއްގެ ތެރެއިންނެވެ. އެޑަމްސް މަރުވެފައި ވަނީ ކޮން ސަބަބަކާ ހުރެ ކަމެއް އިދާރާތަކުން އަދި ހާމަ ކޮށްފައެއް ނުވެއެވެ.

ދެކުނު އެފްރިކާއިން މިފަހަރު ވޯލްޑް ކަޕްގެ ގަދަ 32 އަށް ގޮސްފައިވާ އިރު، އެޑަމްސް ވަނީ ގްރޫޕް ސްޓޭޖުގެ ތިން މެޗާއި ގަދަ 32 ގައި ކެނެޑާއާ ދެކޮޅަށް ކުޅުނު މެޗުގައިވެސް ކުޅެފައެވެ.

ދެކުނު އެފްރިކާގެ ކުޅިވަރާ ބެހޭ ވުޒާރާއިން ބުނެފައި ވަނީ މިއަދު އެގައުމަށް ގެއްލިގެން ދިޔައީ އަރަމުން އަންނަ ޒުވާން ހުނަރުވެރި ތަރިއެއް ކަމަށެވެ. އެޑަމްސްގެ ކުއްލި މަރާއެކު އާއިލާއާއެކު މުޅި ގައުމުވެސް ހިތާމަކުރާ ކަމަށް ކުޅިވަރާ ބެހޭ ވުޒާރާއިން ބުނެފައިވާ އިރު، މަރުގެ ތަހުގީގު މިހާރު ދަނީ ހިނގަމުންނެވެ.

އިދާރާތަކުން ބުނެފައި ވަނީ އެކަމުގެ ސައްހަ މައުލޫމާތު ހޯދައި، އެ މައުލޫމާތު ފޯރުކޮށްދޭނެ ކަމަށާއި، އާއިލާއަށް އިހުތިރާމުކުރުމުގެ ގޮތުން ސާބިތު ނުހިފޭ ވާހަކަތައް ނުފެތުރުމަށެވެ.

ދެކުނު އެފްރިކާއިން 2023 ވަނަ އަހަރުގެ އެފްރިކާ ކަޕް އޮފް ނޭޝަންސްގެ ސެމީ ފައިނަލަށް ދިޔަ ޓީމުގައިވެސް އެޑަމްސް ހިމެނިފައިވާ އިރު، އޭނާގެ އާއިލާއަށް ފީފާގެ ރައީސް ޖިއާނީ އިންފަންޓީނޯވެސް ވަނީ ތައުޒިއާ ފޮނުއްވައިފައެވެ.