އީރާނުގެ ކުރީގެ ރޫހީ ލީޑަރު އަލީ ހާމަނާއީގެ ޖަނާޒާގައި ބައިވެރިވަމުން އަންނަ އެ ގައުމުގެ އެންމެހައި އިސްވެރިން އެއް ހަމަލާއަކުން ނައްތައިލުމުގެ ގާބިލުކަން އެމެރިކާއަށް ލިބިގެންވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާގެ ނޫހެއް ކަމަށްވާ އެކްސިއޯސްއަށް ދެއްވި އިންޓަވިއުއެއްގައި ޓްރަމްޕް ވިދާޅުވި ގޮތުގައި، ހާމަނާއީގެ ޖަނާޒާއަށް އީރާނުގެ ހުރިހާ އިސްވެރިން އެއްތަނަކަށް ޖަމާވެފައިވާއިރު، އެންމެން އެއްފަހަރާ ނައްތައިލުމުގެ ފުރުސަތު އެމެރިކާއަށް އޮތެވެ. ނަމަވެސް އެ ފިޔަވަޅު ނޭޅުއްވީ، އެފަދަ ކަމެއް ކޮށްފިނަމަ ކުރިމަގުގައި އެމެރިކާއާއެކު މަޝްވަރާކުރާނެ އެއްވެސް ބަޔަކު އީރާނުގައި ނުތިބޭނެތީ ކަމަށް އޭނާ ވިދާޅުވިއެވެ. މީގެ އިތުރުން، އެމެރިކާގެ މިނިވަން ދުވަހުގެ މުނާސަބަތުގައި މައުންޓް ރަޝްމޯގައި ވާހަކަދައްކަވަމުން ޓްރަމްޕް ވަނީ، ޖަނާޒާގެ ކަންކަން ކުރިއަށް ގެންދިއުމަށްޓަކައި އެމެރިކާއިން އީރާނަށް ހަފުތާއެއްގެ މުއްދަތު ދީފައިވާ ކަމަށްވެސް ވިދާޅުވެފައެވެ.

މިދިޔަ ފެބްރުއަރީ މަހުގެ 28 ވަނަ ދުވަހު އެމެރިކާއާއި އިސްރާއީލުން ގުޅިގެން ދިން ހަމަލާތަކެއްގައި ހާމަނާއީ އަވަހާރަކޮށްލުމާ ގުޅިގެން، މެދުއިރުމަތީގެ މަސްރަހު ވަނީ ވަރަށް ބޮޑަށް ހޫނުވެފައެވެ. ސިޔާސީ މަސްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި، ޓްރަމްޕްގެ މި ހަރުކަށި ބަޔާންތަކުގެ ސަބަބުން އެމެރިކާއާއި އީރާނާ ދެމެދު އުފެދިފައިވާ ނުތަނަވަސްކަން އިތުރަށް ގޯސްވެ، ޑިޕްލޮމެޓިކް ގުޅުންތަކަށް ބޮޑެތި ހުރަސްތަކެއް ކުރިމަތިވުމަކީ އެކަށީގެންވާ ކަމެކެވެ. އަދި މިއީ ވާދަވެރި ގައުމުތަކާ މެދު ޓްރަމްޕް ގެންގުޅުއްވާ ހަރުކަށި ސިޔާސަތުގެ ތެރެއިން ދެއްވި އިންޒާރެއް ކަމަށްވެސް ތަޖުރިބާކާރުން ބުނެއެވެ.

އީރާނުގެ ވެރިރަށް ތެހެރާންގައި މިހާރު ކުރިއަށްދާ ޖަނާޒާގެ ރަސްމިއްޔާތުތަކުގައި އެތައް މިލިއަން ބަޔަކު ބައިވެރިވަމުން އަންނައިރު، އީރާނުގެ އޮފިޝަލުން ވަނީ އެމެރިކާގެ އިންޒާރުތަކަށް ރައްދުދީފައެވެ. އެގޮތުން، އީރާނުން ބުނެފައިވަނީ އެ ގައުމުގެ ލީޑަރުންނަށް ހަމަލާދިން ނަމަވެސް، އީރާނުގެ ފިކުރާއި އަޒުމް ނައްތައިނުލެވޭނެ ކަމަށެވެ.

ދެ ގައުމުގެ ދެމެދުގައި ކުރިއަށްދާ މަޝްވަރާތައް މިވަގުތު މެދުކަނޑާލާފައިވާއިރު، ޖަނާޒާގެ ކަންކަން ނިމުމުން އަލުން މަޝްވަރާތައް ފެށުމަށް ހަމަޖެހިފައިވާ ކަމަށް އަލްޖަޒީރާއިން ރިޕޯޓުކޮށްފައިވެއެވެ.