ވޯލްޑް ކަޕް 2026 އަށް ތައްޔާރުވަމުން އަންނަ އިނގިރޭސި ގައުމީ ފުޓުބޯޅަ ޓީމުގެ ކުޅުންތެރިންގެ ބޫޓުތަކާއި ތަމްރީނުތަކުގައި ބޭނުންކުރާ ސާމާނުތަކެއް ވަގަށް ނަގައިފިއެވެ.

އެމެރިކާގެ ކެންސަސް ސިޓީގައި މި ހާދިސާ ހިނގާފައިވަނީ މުބާރާތުގެ ކުރިން އެ ޓީމު ކޭމްޕުކުރި ފްލޮރިޑާގެ މިސޫރީގައި ހުންނަ ސްވޯޕް ސޮކާ ވިލެޖުގެ ތަމްރީނު ކޭމްޕަށް ސާމާނުތައް ގެންދިއުމުގެ ތެރޭގައެވެ.

ވަގަށް ނެގި ތަކެތީގެ ތެރޭގައި އިނގިރޭސި ޓީމުގެ މަޝްހޫރު ކުޅުންތެރިންގެ ބޫޓުތަކާއި، މުބާރާތުގެ ރަސްމީ ބޯޅަތަކުގެ އިތުރުން ތަމްރީނުތަކަށް ބޭނުންކުރާ އެހެނިހެން ސާމާނު ހިމެނެއެވެ.

ކެންސަސް ސިޓީގެ ފުލުހުން މި މައްސަލަ ތަހުގީގުކުރަމުން އަންނަ އިރު، މިހާތަނަށް ދެ މީހަކު ވަނީ ހައްޔަރުކޮށްފައެވެ. ފުލުހުންގެ ތަރުޖަމާނަކު މީޑިއާތަކަށް މައުލޫމާތު ދިން ގޮތުގައި، އިތުރު ތަހުގީގުތައް ކުރިއަށް ގެންދިއުމަށްޓަކައި ތުހުމަތުކުރެވޭ ދެ މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ.

ކޯޗު ތޯމަސް ޓުޗެލްގެ އިރުޝާދުގެ ދަށުން އިނގިރޭސި ޓީމުން ހޮނިހިރު ދުވަހުގެ މެންދުރުފަހު އެ ޓީމުގެ ބޭސްގައި ފުރަތަމަ ފަހަރަށް ތަމްރީނުތައް ފަށާނެއެވެ. މި ހާދިސާގައި ވަގަށް ނަގާފައިވާ ތަކެތި ހޯދުމަށް އިނގިރޭސި އެފްއޭ އިން އަންނަނީ ކެންސަސް ސިޓީގެ ފުލުހުންނާ ގުޅިގެން މަސައްކަތް ކުރަމުންނެވެ.

1966 ވަނަ އަހަރަށްފަހު ފުރަތަމަ ފަހަރަށް ބޮޑު މުބާރާތެއް ކާމިޔާބުކުރުމަށް ޓުޗެލްގެ އިރުޝާދުގެ ދަށުން އިނގިރޭސި ޓީމުން ފުރިހަމައަށް ތައްޔާރުވަމުން އަންނަ އިރު، މި ހާދިސާގެ ސަބަބުން ޓީމުގެ އޮފިޝަލުންނަށް ގޮންޖެހުމަކާ ކުރިމަތިލާން ޖެހޭނެއެވެ.

ވޯލްޑް ކަޕްގެ "ގްރޫޕް އެލް" ގައި އިނގިރޭސިވިލާތް ކުޅޭ ފުރަތަމަ މެޗުގައި ބުދަ ދުވަހު ޑެލަސްގައި ނުކުންނާނީ ކްރޮއޭޝިއާއާ ދެކޮޅަށެވެ. މުބާރާތަށް ތައްޔާރުވުމުގެ ގޮތުން ފްލޮރިޑާގެ ވެސްޓް ޕާމް ބީޗުގައި ކުރިއަށްގެންދިޔަ ކޭމްޕުގައި ޓީމުގެ ފަރާތުން ރަނގަޅު ރޫހެއް ފެނިފައިވެއެވެ. އަދި އެކުވެރިކަމުގެ މެޗުތަކުގައި ނިއު ޒީލެންޑާއި ކޮސްޓަރީކާ އަތުން އިނގިރޭސި ޓީމު ވަނީ މޮޅުވެފައެވެ.

ކޮސްޓަރީކާއާ ދެކޮޅަށް ކުޅުނު މެޗުގައި ޖޫޑް ބެލިންހަމްގެ ފަރާތުން މޮޅު ކުޅުމެއް ފެނިފައިވާ އިރު، ކްރޮއޭޝިއާއާ ދެކޮޅަށް ކުޅޭ މެޗުގައި 10 ނަންބަރު މަގާމުގައި މޯގަން ރޮޖާސްގެ ބަދަލުގައި ފުރަތަމަ 11 ގައި ބެލިންހަމް ހިމެނުމުގެ ފުރުސަތު ވަނީ ބޮޑުވެފައެވެ. ފައިގެ ކުޑަހުޅަށް ލިބިފައިވާ އަނިޔާއެއްގެ ސަބަބުން ބުކާޔޯ ސާކާ ފިޓްނަސްއަށް މަސައްކަތްކުރަމުން އަންނަ އިރު، ޑިފެންސް ލައިނުގައި މާކް ގޭހީގެ ބަދަލުގައި އެޒްރީ ކޮންސާ އަދި ޖޯން ސްޓޯންސް ފެނުމަކީ އެކަށީގެންވާ ކަމެކެވެ.