މިޔަންމާގެ އަސްކަރީ ސަރުކާރުން އެ ގައުމުގެ ބޯޑަރު ސަރަހައްދުތަކުގައި ހިންގާ އޮންލައިން ސްކޭމް ނެޓްވޯކްތައް ރޫޅާލުމަށް ފަށާފައިވާ ބޮޑު އޮޕަރޭޝަނެއްގެ ދަށުން، ގާތްގަނޑަކަށް 57،000 ބިދޭސީން ޑީޕޯޓުކޮށްފިއެވެ.

މި އޮޕަރޭޝަނަކީ މިޔަންމާއާއި ޗައިނާ އަދި ތައިލެންޑު ގުޅިގެން ކުރިއަށްގެންދާ ހަރަކާތެކެވެ. ޑީޕޯޓުކުރި މީހުންގެ ތެރޭގައި އެންމެ ގިނައީ ޗައިނާގެ ރައްޔިތުންނެވެ. މީގެ އިތުރުން އޭޝިއާއާއި އެފްރިކާގެ ބައެއް ގައުމުތަކުގެ މީހުންވެސް ހިމެނެއެވެ. މިޔަންމާގެ ދައުލަތުގެ މީޑިއާއިން ރިޕޯޓުކޮށްފައިވާ ގޮތުގައި، މި ފިޔަވަޅަކީ ގައުމީ ސަލާމަތް ރައްކާތެރިކުރުމަށާއި، ބޯޑަރު ސަރަހައްދުތަކުގައި ހިންގާ ޓެލެކޮމް ފްރޯޑާއި ގަވާއިދާ ހިލާފު ޖުވާކުޅުމުގެ ނެޓްވޯކްތައް ނައްތާލުމަށް އެޅި ފިޔަވަޅެކެވެ.

ނަމަވެސް، މި މައްސަލައިގައި އިންސާނީ ހައްގުތަކަށް މަސައްކަތްކުރާ ފަރާތްތަކާއި މިނިވަން މުފައްކިރުން ވަނީ ކަންބޮޑުވުން ފާޅުކޮށްފައެވެ. ތަޖުރިބާކާރުން ފާހަގަކުރާ ގޮތުގައި، ޑީޕޯޓުކުރި ގިނަ މީހުންނަކީ ވަޒީފާގެ ދަޅަ ދައްކައިގެން އޮޅުވާލައިގެން މިޔަންމާއަށް ގެންގޮސް، ސްކޭމް ސެންޓަރުތަކުގައި މަޖުބޫރުން މަސައްކަތްކުރުވި މީހުންނެވެ. އދ. އިން ލަފާކުރާ ގޮތުގައި މިޔަންމާގައި ހިންގާ މިފަދަ ސްކޭމް ސެންޓަރުތަކުން އަހަރެއްގެ މައްޗަށް 40 ބިލިއަން ޑޮލަރުގެ އާމްދަނީއެއް ހޯދައެވެ.

މިޔަންމާގެ އަސްކަރީ ސަރުކާރުން ބުނެފައިވަނީ، މި ކުށްތަކުގެ އަޑީގައި ތިބި ބިދޭސީ އިސްވެރިން ހޯދައި ފިޔަވަޅު އެޅުމުގެ މަސައްކަތް މެދުކެނޑުމެއްނެތި ކުރިއަށްގެންދާނެ ކަމަށެވެ. އެހެންނަމަވެސް، މިފަދަ އޮޕަރޭޝަންތަކާ ގުޅިގެން ކުށްކުރާ ގްރޫޕުތަކުން އެހެން ސަރަހައްދުތަކަށް ބަދަލުވެ، އާ ސެންޓަރުތައް ގާއިމުކުރަމުންދާ ކަމަށް ބައިނަލްއަގުވާމީ ރިޕޯޓުތަކުން ދައްކައެވެ.