ރަޝިޔާއިން ޔޫކްރެއިންގެ ވެރިރަށް ކީވް އާއި އެހެނިހެން ބޮޑެތި ސިޓީތަކަށް އަމާޒުކޮށް ވަރުގަދަ ވައިގެ ހަމަލާތަކެއް ދީފިއެވެ. އިއްޔެ ދިން މި ހަމަލާތަކުގައި މަދުވެގެން 22 މީހުން މަރުވެ، 145 އަށް ވުރެ ގިނަ މީހުނަށް އަނިޔާވެފައިވާ ކަމަށް ކަމާބެހޭ ފަރާތްތަކުން ބުނެއެވެ.

ޔޫކްރެއިންގެ އަސްކަރިއްޔާއިން ހާމަކުރި ގޮތުގައި، ރަޝިޔާއިން ވަނީ 656 ޑްރޯން އާއި 73 މިސައިލް ބޭނުންކޮށްގެން ހަމަލާދީފައެވެ. މީގެ ތެރޭގައި އަޑަށްވުރެ ބާރަށް ދަތުރުކުރާ ޒިރްކޮން މަރުކާގެ 8 މިސައިލް ހިމެނެއެވެ. މި ހަމަލާތަކުގެ ސަބަބުން ކީވްގެ އާންމުން ދިރިއުޅޭ އިމާރާތްތަކަށާއި، ކަރަންޓު ފޯރުކޮށްދޭ މަރުކަޒުތަކަށް ބޮޑެތި ގެއްލުންތަކެއް ލިބިފައިވެއެވެ. އެގޮތުން، ކީވްގެ 140،000 އަށް ވުރެ ގިނަ މީހުންނަށް ވަގުތީގޮތުން ކަރަންޓުގެ ހިދުމަތް މެދުކެނޑުނު ކަމަށް ރިޕޯޓުތައް ބުނެއެވެ. ކީވްގެ އިތުރުން ޑްނީޕްރޯ ސިޓީއަށް ދިން ހަމަލާތަކުގައި 11 މީހުން މަރުވެފައިވާއިރު، އޭގެ ތެރޭގައި ކުޑަކުދީންވެސް ހިމެނޭ ކަމަށް ޔޫކްރެއިންގެ ކުއްލި ހާލަތްތަކާ ބެހޭ އިދާރާއިން ބުނެފައިވެއެވެ.

މި ހަމަލާތަކާ ގުޅިގެން ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވިދާޅުވީ، ޔޫރަޕަށް އަމިއްލަ އެންޓި-ބެލިސްޓިކް ދިފާއީ ނިޒާމެއް ބޭނުންވާ ކަމަށާއި، ޕެޓްރިއަޓް ނިޒާމުތަކަށް ބޭނުންވާ މިސައިލް ފޯރުކޮށްދިނުމުގައި އެމެރިކާގެ އެހީތެރިކަން ކޮންމެހެން ބޭނުންވާ ކަމަށެވެ. ނަމަވެސް، ރަޝިޔާގެ ދިފާއީ ވުޒާރާއިން ބުނި ގޮތުގައި އެ ގައުމުން އަމާޒުކޮށްފައިވަނީ ޔޫކްރެއިންގެ އަސްކަރީ ސިނާއަތުގެ މަރުކަޒުތަކަށެވެ.

އދ. ގެ އިންސާނީ ހައްގުތަކާ ބެހޭ މޮނިޓަރިން މިޝަނުން ފާހަގަކުރި ގޮތުގައި، ދުރު ރާސްތާގެ ހަތިޔާރު ބޭނުންކުރުން އިތުރުވުމުގެ ސަބަބުން، 2025 ވަނަ އަހަރާ އަޅައިބަލާއިރު މިއަހަރުގެ މިހާތަނަށް އާންމުންނަށް ލިބުނު ގެއްލުންތައް ވަނީ 20 އިންސައްތަ އިތުރުވެފައެވެ. މީޑިއާ ރިޕޯޓުތައް ބުނާ ގޮތުގައި ރަޝިޔާގެ މި ހަމަލާތަކަކީ ޔޫކްރެއިނުން ރަޝިޔާގެ ތެޔޮ ސާފުކުރާ ކާރުހާނާތަކަށް ދެމުންދާ ހަމަލާތަކަށް ރައްދުދިނުމުގެ ގޮތުންނާއި، ޔޫކްރެއިންގެ އާންމުންގެ މެދުގައި ބިރުވެރިކަން އުފެއްދުމަށް ދިން ހަމަލާތަކެކެވެ.