އީރާނުގެ ދެކުނުގައިވާ މިސައިލް އުދުއްސާ ސައިޓުތަކަކަށާއި ކަނޑުގެ އުޅަނދުތަކަކަށް އެމެރިކާގެ އަސްކަރިއްޔާއިން އިއްޔެ ހަމަލާދީފިއެވެ.

އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ބުނި ގޮތުގައި މިއީ އެމެރިކާގެ ސިފައިންގެ ރައްކާތެރިކަން ކަށަވަރުކުރުމަށްޓަކައި އަމިއްލަ ދިފާއުގައި ދިން ހަމަލާތަކެކެވެ.

ރޮއިޓާސް އަދި އަލްޖަޒީރާއިން ރިޕޯޓުކޮށްފައިވާ ގޮތުގައި، މި ހަމަލާތައް އަމާޒުކޮށްފައިވަނީ އީރާނުގެ ދެކުނުގެ ބަނދަރުމަތީ ރަށެއް ކަމަށްވާ ބަންދަރު އައްބާސް އަދި ގޭޝްމް ޖަޒީރާގެ ސަރަހައްދުތަކަށެވެ. މީގެ ތެރޭގައި ހިމެނެނީ ހޮރްމޫޒް ކަނޑުއޮޅީގައި މައިން ހަރުކުރަން މަސައްކަތް ކުރި ކަމަށް ތުހުމަތު ކުރެވޭ އީރާނުގެ ދެ އުޅަނދަކާއި، ސަފޭސް-ޓު-އެއާ މިސައިލް ސައިޓުތަކެކެވެ.

އެމެރިކާގެ އަސްކަރިއްޔާއިން ހާމަކޮށްފައިވާ ގޮތުގައި މި އޮޕަރޭޝަންގައި އެމެރިކާގެ ކަނޑުގެ ސިފައިންގެ ތިން މަނަވަރެއް ކަމަށްވާ 'ޔޫއެސްއެސް ޓްރަކްސްޓަން'، 'ޔޫއެސްއެސް ރަފައެލް ޕެރަލްޓާ' އަދި 'ޔޫއެސްއެސް މޭސަން' ވަނީ ހަރަކާތްތެރިވެފައެވެ.

ސެންޓްކޮމްގެ ތަރުޖަމާނު ކެޕްޓަން ޓިމް ހޯކިންސް ވިދާޅުވި ގޮތުގައި، އީރާނުގެ ފައުޖުތަކުން ކުރިމަތިވެދާނެ ނުރައްކާތަކުން އެމެރިކާގެ ސިފައިން ހިމާޔަތްކުރުމަށްޓަކައި މި ފިޔަވަޅުތައް އެޅުމަކީ ކޮންމެހެން މުހިންމު ކަމެކެވެ.

“މިހާރު ކުރިއަށްދާ ހަމަލާތައް މެދުކަނޑާލުމުގެ މުއްދަތުގައިވެސް، ކެތްތެރިކަން އިސްކުރުމާއެކު އެމެރިކާގެ ފައުޖުތަކުގެ ދިފާއުގައި ސެންޓްކޮމްއިން މަސައްކަތްކުރަމުން ގެންދާނެ،” އޭނާ ވިދާޅުވިއެވެ.

މި ހަމަލާތަކާ ގުޅިގެން އީރާނުގެ ރަސްމީ އިދާރާތަކުން އަދި ވަކި އެއްޗެއް ހާމަކޮށްފައެއް ނުވެއެވެ. ނަމަވެސް، އީރާނުގެ މީޑިއާތަކުން ވަނީ ބަންދަރު އައްބާސް އަދި ހޮރްމޫޒް ކަނޑުއޮޅީގެ ބައެއް ސަރަހައްދުތަކުން ގޮވުންތަކެއްގެ އަޑު އިވުނުކަން ރިޕޯޓުކޮށްފައެވެ.

މި ހާދިސާ ހިނގާފައި މިވަނީ، އެމެރިކާ އާއި އީރާނާ ދެމެދު ސުލްހައިގެ އެއްބަސްވުމަކަށް އައުމަށް ގަތަރުގައި މަޝްވަރާތައް ކުރިއަށްދާ ދަނޑިވަޅެއްގައެވެ.