ޓެކްސީ ލައިންގެ ހިދުމަތަށް ޑްރައިވަރުން ހޯދުމަށް "ވޯކް އިން" އިންޓަވިއު މާދަމާ ކުރިއަށްގެންދަން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނިންމައިފިއެވެ.

މާލޭ ސަރަހައްދުގައި ސަރުކާރުގެ ޓެކްސީ ލައިންގެ ހިދުމަތް ފަށަން އެމްޓީސީސީއާއި ޓްރާންސްޕޯޓު މިނިސްޓްރީއާއެކު އެމްޔޫއޯއެއްގައި ސޮއިކުރީ ފެބްރުއަރީ 15، 2025 ގައެވެ.

ޓެކްސީ ލައިންގެ ހިދުމަތަށް ޑްރައިވަރުން ހޯދުމަށް ވޯކް އިން އިންޓަވިއު ކުރިއަށްގެންދިއުމަށް ހަމަޖެހިފައިވަނީ މާދަމާ ހެނދުނު 10:00 އިން ހަވީރު 4:00 އަށް މާލޭގައި ހުންނަ މާފަންނު ބަސް ޓާމިނަލްގައެވެ.

އެމްޓީސީސީން ވަނީ މީގެ ކުރިންވެސް ސަރުކާރުގެ ޓެކްސީ ހިދުމަތް ފަށަން 400 އަށްވުރެ ގިނަ ޑްރައިވަރުން ހޯދަން އިއުލާނުކޮށްފައެވެ.

އެމްޓީސީސީން މީގެ ކުރިން ބުނެފައިވާ ގޮތުގައި މާލެ ސަރަަހައްދަށް ޕާޓްޓައިމްކޮށް މަސައްކަތްކުރާނެ 122 ޑްރައިވަރުން އަދި ފުލްޓައިމްއަށް 285 ޑްރައިވަރުން ހޯދާ ކަމަށެވެ.

އެ ވަޒީފާއަށް ކުރިމަތިލާ ފަރާތްތަކުން ވަޒީފާ އަދާކުރަން ޖެހެނީ މާލެ ސަރަހައްދުގައެވެ. އެ ވަޒީފާތައް ދިނުމުގައި ޓްރާންސްޕޯޓް މިނިސްޓްރީގެ ޓެކްސީ ޑްރައިވަރުންގެ ދަފުތަރުގައި ޖެހިފައިވާ ފަރާތްތަކަށް އިސްކަން ދޭނެ ކަމަށް އެމްޓީސީސީން ބުނެއެވެ.

ރައީސް އޮފީހުގައި މިމަހުގެ ހަތަރުވަނަ ދުވަހު ބޭއްވި ނޫސްވެރިންގެ ބައްދަލުވުމުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެފައިވަނީ، ޓެކްސީ ލައިންގެ ހިދުމަތް ރޯދަމަސް ނިމުމުގެ ކުރިން ފެށުމަށް މަސައްކަތް ކުރަމުންދާ ކަމަށެވެ.

ޓެކްސީ ހިދުމަތް ފެށުމަށް ތައްޔާރުކުރާ ކާރުތަކަށް ރާއްޖޭގެ މާހައުލާ ގުޅޭނެ ފަދަ ބަދަލުތަކެއް ގެނެސް މިހާރު ނިމިފައިވާ ކަމަށެވެ. އެގޮތުން ރާއްޖެއަކީ ޖަޒީރާ ރަށްތަކެއްގެ މައްޗަށް އެކުލެވިގެންވާ، މޫދާ ކައިރި ސަރަހައްދުތަކެއްގައި ޓެކްސީ ދުއްވަންޖެހޭ ގައުމަކަށްވާތީ، ކާރުތަކުގެ އިލެކްޓްރޯނިކް ވަސީލަތްތަކަށް އެކަމާ ގުޅޭ ބަދަލުތައް ގެންނަން ޖެހުނުކަން އަމީން ވިދާޅުވެފައިވެއެވެ.

އަމީން ވިދާޅުވެފައިވަނީ ޓެކްސީ ލައިން ހިދުމަތުގައި ތިން މޮޑެލްއެއްގެ ކާރު ބޭނުންކުރުމަށް ހަމެޖެހިފައިވާ ކަމަށާއި ކާރުތައް ރާއްޖެ ގެނައުމުގެ މަސައްކަތް، ދެ ބެޗަކަށް ބަހާލައިގެން ކުރަމުންދާ ކަމަށެވެ. އެގޮތުން އެއް ބެޗުގައި ތައިލެންޑުން 60 ކާރު ގެނައުމަށް ހަމަޖެހިފައިވާ އިރު، ބާކީ ކާރުތައް ގެންނާނީ ޗައިނާއިންނެވެ. ޗައިނާއިން ދެ މޮޑެލްއެއްގެ ކާރު ގެންނާނެ ކަމަށް މިނިސްޓަރު ވިދާޅުވެފައިވެއެވެ.

ޓެކްސީ ލައިންގެ ހިދުމަތް ފެށުމަށް ހަމަޖެހިފައިވަނީ ޖުމުލަ 150 ކާރާއެކުއެވެ.