އޮޑިޓާ ޖެނެރަލްގެ އޮފީހުގެ ބަޖެޓު ވަކިން ފާސްކުރަން އޮންނަ ގޮތަށް، އެންޓި ކޮރަޕްޝަން ކޮމިޝަން (އޭސީސީ)ގެ ބަޖެޓް ވެސް ރައްޔިތުންގެ މަޖިލީހަށް ހުށަހަޅައި ވަކިން ފާސްކުރާ ގޮތަށް ބަދަލުކުރަން ޖެހޭ ކަމަށް މަޖިލީހުގެ ބާރަށު ދާއިރާގެ ޕީއެންސީ މެންބަރު އިބްރާހީމް ޝުޖާ މިއަދު ވިދާޅުވެއްޖެއެވެ.

އޮޑިޓާ ޖެެނެރަލް އޮޕީހާއި ރައްޔިތުންގެ މަޖިލީހުގެ ބަޖެޓް ފާސްކުރުން އޮންނަނީ ވަކިން، މަޖިލީހުގެ މާލިއްޔަތު ކޮމިޓީއަށް ހުށަހަޅައިގެންނެވެ.

މިނިވަން މުއައްސަސާތަކުގެ މެންބަރުންގެ މާލީ ބަޔާންތައް އާއްމުކުރަން ޖެހޭ ގޮތަށް އޮޑިޓް ގާނޫނު ބަދަލުކުރަން ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ހުށަހެޅުއްވި ބިލްގެ ބަހުސްގައި ވާހަކަ ދައްކަވަމުން ޝުޖާއު މިއަދު ވިދާޅުވީ، އެ ގޮތަށް އޭސީސީގެ ބަޖެޓް މަޖިލިހުން ފާސްކުރާ ގޮތަށް ގާނޫނުއަސާސީ އިސްލާހުކުރަން ޖެހޭ ކަމަށެވެ.

ސުޖާ ވިދާޅުވީ، އޮޑިޓާ ޖެނެރަލްގެ އޮފީހުގެ ބަޖެޓަކީ ވަކިން ފާސްކުރާ ބަޖެޓެއްގެ ގޮތުގައި އޮންނަ އިރު، އޮޑިޓާ ޖެނެރަލްގެ މަސްއޫލިއްޔަތު ފުރިހަމައަށް އަދާކުރޭތޯ ބަލަން ވެސް ޖެހޭ ކަމަށެވެ.

ގާނޫނުއަސާސީ ގެންނަ އިސްލާހެއްގެ ގޮތުގައި އެ ބަދަލު ގެންނަންޖެހޭ ކަމަށާއި އެ އިސްލާހުގައި އޭސީސީގެ ބަޖެޓަކީ ވެސް ވަކިން ފާސްކުރަން ޖެހޭ ބަޖެޓެއްގެ ގޮތުގައި ގާނޫނުއަސާސީގައި ކަނޑައަޅަންޖެހޭ ކަމަށްވެސް ވިދާޅުވިއެވެ.

ކޮރަޕްޝަނުގެ ތުހުމަތު އަބަދު ވެސް ރައްޔިތުންގެ މަޖިލީހުގެ މެންބަރުންގެ ބޮލުގައި އަޅުވާ އިރު، ކޮރަޕްޝަނުގެ ވަބާ މުޅި ދައުލަތުގެ ތެރޭގައި އޮންނަ ކަމަށް ވެސް ޝުޖާ ވިދާޅުވިއެވެ.