ރާއްޖޭގެ އުފެއްދުންތެރިކަން އިތުރުކޮށް ވިޔަފާރި ފުޅާ ކުރުމުގެ މަގުސަދުގައި ބާއްވާ ދިވެހީންގެ އުފެއްދުންތެރިކަމުގެ މައުރަޒު ނުވަތަ މޯލްޑިވްސް އެކްސްޕޯ 2025 ރައީސް ޑރ. މުހައްމަދު މުއިއްޒު މިރޭ ހުޅުވައިދެއްވައިފިއެވެ.

ދިވެހީންގެ އުފެއްދުންތެރިކަމުގެ މައުރަޒު 2025 ރައީސް ހުޅުވައިދެއްވީ އެ މައުރަޒު ބާއްވާ ހުޅުމާލެ ސެންޓްރަލް ޕާކުގައި މިރޭ ބޭއްވި ރަސްމިއްޔާތެއްގައެވެ. އެ ރަސްމިއްޔާތުގައި އެ މަނިކުފާނުގެ އަނބިކަނބަލުން، ފަސްޓް ލޭޑީ ސާޖިދާ މުހައްމަދު އަދި ކެބިނެޓް ބައެއް މިނިސްޓަރުން ބައިވެރިވެވަޑައިގެންނެވިއެވެ.

އެ މައުރަޒު ހުޅުވުމާ ގުޅިގެން މިރޭ ވަނީ ހަވާވެސް އަރުވައިފައެވެ.

ރައީސް އޮފީހުން ބުނި ގޮތުގައި މައުރަޒުގައި 3600 އަށްވުރެ ގިނަ ތަކެތި ބައިވެރި ކުރުމަށް އެޕްލިކޭޝަން ފޯމް ފުރާފައިވެއެވެ. އެގޮތުން އެންމެ ގިނައިން ބައިވެރިވެފައިވަނީ އަތްތެރި މަސައްކަތުގެ ދާއިރާއިންނެވެ. މައުރަޒުގައި އެންމެ ގިނަ ތަކެތި ބައިވެރިކޮށްފައިވަނީ މާލެއާއި ބ. ތުޅާދޫންނެވެ.

މިއަދުން ފެށިގެން މި މަހުގެ ނިޔަލަށް މި މައުރަޒު ކުރިއަށްގެންދާނެކަމަށް ރައީސް އޮފީހުން ބުންޏެވެ.