ޔޫއެފާ ޔޫރޯ 2024 ގެ އެގާރަވަނަ މެޗުގައި ތުރުކީއާއި ޖޯޖިއާ ވާދަކުރާ މެޗުގެ ލައިވް ބްލޮގަށް "ވަން ސްޕޯޓްސް"ގެ ކިޔުންތެރިންނަށް މަރުހަބާ!

މިއީ ޖޯޖިއާގެ ތާރީހުގައި އެގައުމުން ކުޅޭ ފުރަތަމަ ބޮޑު މުބާރާތް. އެހެންކަމުން އެގައުމުގެ ތާރީހަށްވެސް މިއީ ބޮޑު މުބާރާތެއް. ހަބަރުތައް ބުނެފައިވާ ގޮތުގައި މިރޭ ޖޯޖިއާ މެޗު އެގައުމުގައި ބެލުމަށް، ރައްޔިތުން ސްޓޭޑިއަމްތަކަށް އެއްވާނެ. އަދި ޖަރުމަނަށްވެސް ގިނަ ސަޕޯޓަރުންތަކެއް ވަނީ ގޮސްފައި. އަނެއްކޮޅުން ތުރުކީއަކީ މީގެ ކުރިން ޔޫރޯގައި ކުޅުނު ނަމަވެސް، އެޓީމަށް ފަހުގެ ތާރީހެއްގައި ރަނގަޅު ކާމިޔާބީއެއް ހޯދިފައެއް ނެތް. ތުރުކީން ނުކުންނަނީ އެ ތާރީހު ބަދަލުކުރުން.

  • ވިލީ ސަގްނޯލް - ޖޯޖިއާ

"ޕްލޭ އޮފްއަށް ފަހު އަހަރެމެންގެ ބައެއް ކުޅުންތެރިންނަށް އާންމު ދިރިއުޅުމުގައި ކުރާ ކަންކަން ކުރަންވެސް އުނދަގޫވި. އެއީ އުފަލުން. އޭރުގައި އުޅެމުންދިޔައީ ހުވަފެނީ ދުނިޔެއެއްގައި. އެހެންވިޔަސް، އެ ހުވަފެނުން ނުކުންނަން ޖެހިއްޖެ. އަހަރެމެން އަނެއްކާވެސް ފޯކަސް ކުރަން ޖެހިއްޖެ. އަހަރެން ޔޫރޯ ކޭމްޕް ފެށި ހިސާބުންވެސް ބުނަމުން މިދަނީ އެވާހަކަ. އެހެންވެ މިހާރު އެ ޑިސިޕްލިންނަށް ކުޅުންތެރިން ގެނެވިއްޖެ،"

  • ވިންސެންޒޯ މޮންޓޭލާ - ތުރުކީ

"ތިޔައީ ހަގީގަތެއް. އަހަރެމެން މިހާތަނަށް ޔޫރޯއެއްގައި ކުޅުނު ފުރަތަމަ މެޗަކުން މޮޅުވެފައެއް ނުވޭ. އެހެންވިޔަސް، އެކަމަށް ވަރަށް މަގުބޫލު އިނގިރޭސި ހަރުބަހެއް އޮންނާނެ. ކޮންމެ ކަމަކަށްވެސް ފުރަތަމަ ފަހަރެއްވޭ. އަހަރެމެން މިފަހަރު މިތިބީ ވަރުގަދަ ފެށުމަކުން ފެށޭ ވަރަށް ތައްޔާރުވެފައި. އޮގަނައިޒް ތުރުކީ ޓީމެއް ފެނިގެންދާނެ،"