EURO mubaaraathuge thaareehun... uss alithah

"ޔުއެފާ ޔޫރަޕިއަން ފުޓްބޯލް ޗެމްޕިއަންޝިޕް" ނުވަތަ "ޔޫރަޕިއަން ޗެމްޕިއަންޝިޕް" ނުވަތަ "ޔުއެފާ ޔޫރޯ" ފުޓުބޯޅަ މުބާރާތަކީ، ޔޫރަޕުގެ ބައްރުގެ ޤައުމުތަކުގެ ސީނިއަރ ޤައުމީ ޓީމުތައް ވާދަ ކުރާ އެންމެ ބޮޑު އަދި އެންމެ މުހިއްމު ފުޓުބޯޅަ މުބާރާތެވެ. ޔޫރަޕުގެ ޤައުމީ ޓީމުތަކުގެ ވާދަވެރި ފުޓުބޯޅައިގެ އަސާސީ މުބާރާތެވެ. ފީފާ ދުނިޔޭގެ ފުޓުބޯޅަ މުބާރާތަށް ފަހު، ދުނިޔޭގައި އެންމެ ގިނަ މީހުން ބަލާ ފުޓުބޯޅަ އިވެންޓަކީ ޔޫރޯއެވެ. މެޗުތައް ބެލުމަށް ޓަކައި ދަނޑަށް ހާޒިރު ވާ މީހުންނާއި، ދުނިޔޭގެ އެކިއެކި ކަންކޮޅުތަކުގައި ތިބެގެން ޓީވީގެ ޒަރީޢާއިން މެޗުތައް ބަލާ މީހުންނާ އެކު، ޔޫރޯ ފުޓުބޯޅަ މުބާރާތް ބަލާ މީހުންގެ ޢަދަދު ގުނެނީ އެތައް ސަތޭކަ މިލިއަނަކުންނެވެ.

ޔޫރަޕުގެ ޤައުމުތައް ވާދަ ކުރާ ބައިނަލްއަޤްވާމީ ފުޓުބޯޅަ މުބާރާތެއް ބޭއްވުމުގެ ޚިޔާލު އެންމެ ފުރަތަމަ ހުށައެޅީ 1927 ގައި، ފަރަންސޭސި ވިލާތުގެ ފުޓުބޯޅަ ޝަޚްސިއްޔަތެއް ކަމަށް ވާ ހެންރީ ޑިލޯނޭއެވެ. ޔޫރަޕުގެ ފުޓުބޯޅަ އިދާރާ "ޔުއެފާ" ގެ ފުރަތަމަ ސެކްރެޓަރީ ޖެނެރަލަކީ ވެސް އޭނާއެވެ. ނަމަވެސް، އޭނާގެ ޚިޔާލަށް ޢަމަލީ ސިފަ އައިސް، ޔޫރޯ ފުޓުބޯޅަ މުބާރާތް ތަޢާރަފު ކުރެވުނީ އޭނާ މަރު ވި ފަހުން، 1960 ވަނަ އަހަރުއެވެ.

1960 ވަނަ އަހަރުން ފެށިގެން، ޔުއެފާ ޔޫރޯ ފުޓުބޯޅަ މުބާރާތް ކޮންމެ ހަތަރު އަހަރުން އެއް އަހަރު ޤަވާޢިދުން ބޭއްވެއެވެ. މުބާރާތް ކެންސަލް ކުރެވުނީ ހަމައެކަނި 2020 ގައެވެ. އެއީ ކޮވިޑު-19 ޢާލަމީ ވަބާގެ ސަބަބުންނެވެ. 2020 ވަނަ އަހަރުގެ މުބާރާތް ވެސް، ކޮވިޑާ ގުޅިގެން ލަސް ކުރެވުމަށް ފަހު، ޖެހިގެން އައި 2021 ގައި ބޭއްވުނެވެ. ޔޫރޯ ފުޓުބޯޅަ މުބާރާތް އެންމެ ފުރަތަމަ ބޭއްވުނީ "ޔޫރަޕިއަން ނޭޝަންސް ކަޕް" މި ނަމުގައެވެ. "ޔުއެފާ ޔޫރަޕިއަން ފުޓްބޯލް ޗެމްޕިއަންޝިޕް" މި ނަން ތަޢާރަފު ކުރެވުނީ 1968 ގެ މުބާރާތާ އެކުގައެވެ.

މިހައިތަނަށް ބޭއްވުނު ޔުއެފާ ޔޫރޯގެ ސޯޅަ މުބާރާތުގައި، ޔޫރަޕުގެ 36 ޓީމެއް ކުޅެފައި ވެއެވެ. އޭގެ ތެރެއިން، މުބާރާތް ކާމިޔާބު ކުރެވިފައި ވަނީ 10 ޓީމަކަށެވެ. މި ފަހަރުގެ މުބާރާތަށް ޖޯރޖިއާ ފުރަތަމަ ފަހަރަށް ކޮލިފައި ވެފައި ވާތީ، މި ފަހަރު ހިމަނައިގެން ގުނާ ނަމަ، މުބާރާތަށް ކޮލިފައި ވެފައި ވާ ޓީމުތަކުގެ ޖުމުލައަކީ 37 އެވެ.

ޖަރުމަން (ހުޅަނގު ޖަރުމަން) 1972، 1980، 1996
ސްޕޭން 1964، 2008، 2012
ފްރާންސް 1984، 2000
އިޓަލީ 1968، 2020
ރަޝިއާ (ސޮވިއެޓް ޔޫނިއަން) 1960
ނެދަރލޭންޑްސް 1988
ޗެކް ރިޕަބްލިކް (ޗެކޮސްލޮވޭކިއާ) 1976
ސްލޮވޭކިއާ (ޗެކޮސްލޮވޭކިއާ) 1976
ޑެންމާކު 1992
ޕޯޗުގަލް 2016
ގްރީސް 2004
އިންގްލެންޑް
ސްވިޑްން
ބެލްޖިއަމް
ކްރޮއޭޝިއާ
ސާރބިއާ
ތުރުކީ ވިލާތް
ސްވިޓްޒަރލެންޑް
ރޮމޭނިއާ
ހަންގޭރީ
ޕޯލަންޑް
ޔޫކްރެއިން
އޮސްޓްރިއާ
ރިޕަބްލިކް އޮފް އަޔަރލެންޑް
ސްކޮޓްލެންޑް
ވޭލްސް
ބަލްގޭރިއާ
ނޯދަރން އަޔަރލެންޑް
ނޯރވޭ
ސްލޮވީނިއާ
ލެޓްވިއާ
އަލްބޭނިއާ
ފިންލެންޑް
ނޯދަރން މެސެޑޯނިއާ
އައިސްލެންޑް
ޔޫގޮސްލާވިއާ
ޖޯރޖިއާ

މި ލިސްޓުގައި ހިމެނޭ ގައުމުތަކުގެ ތެރެއިން، ޖަރުމަން ޔޫރޯގައި 1972، 1976، 1980، 1984، އަދި 1988 ގައި ކުޅެފައި ވަނީ ހުޅަނގު ޖަރުމަނުގެ ގޮތުގައެވެ. ފަހުން، ހުޅަނގު ޖަރުމަނާއި އިރުމަތީ ޖަރުމަނު އެއްކޮށްލުމަށް ފަހު، ހުޅަނގު ޖަރުމަނުގެ ރިކޯޑުތައް ވަނީ ޖަރުމަނަށް ދެވިފައެވެ. ރަޝިއާ ވެސް އެންމެ ފުރަތަމަ މުބާރާތް ކުޅެފައި ވަނީ، އަދި 1960 ގައި މުބާރާތް ކާމިޔާބު ކުރީ އެހެން ދައުލަތެއްގެ ގޮތުގައި – ސޮވިއެޓް ޔޫނިއަން – އޮވެގެންނެވެ.

ސްލޮވޭކިއާ އާއި ޗެކް ރިޕަބްލިކް މިހާރު ދެ ގައުމެއްގެ ގޮތުގައި އަދި ދެ ޓީމެއްގެ ގޮތުގައި ޔޫރޯގައި ވާދަ ކުރިޔަސް، ކުރީން މިއީ އެއް ގައުމެކެވެ. 1960 އާއި 1992 އާ ދެމެދު ބޭއްވުނު ޔޫރޯ މުބާރާތްތަކުގައި އެ ގައުމު ވާދަ ކުރީ ޗެކޮސްލޮވޭކިއާގެ ނަމުގައެވެ. 1976 ވަނަ އަހަރު ޔޫރޯ ކާމިޔާބު ކުރީ ވެސް ޗެކޮސްލޮވޭކިއާއެވެ. 1992 ވަނަ އަހަރު ޗެކޮސްލޮވޭކިއާ ރޫޅިގެން ދިޔަ އިރު، އެ ގައުމުގެ ރައްޔިތުންނާއި ސަރަޙައްދު ޗެކް ރިޕަބްލިކް އަދި ސްލޮވޭކިއާ މި ދެ ޤައުމަށް ބަދަލު ވީއެވެ. ޔުއެފާއިން ވަނީ 1976 ގެ ޗެމްޕިއަންކަމުގެ ރިކޯޑު މި ދެ ގައުމަށް ވެސް ދީފައެވެ. މިއިން ކޮންމެ ގައުމެއްގެ ރިކޯޑުގައި އެއް ރަން މެޑެލް އޮންނަ ސަބަބަކީ މިއީއެވެ.

ޔޫރޯގެ ފުރަތަމަ ތިން ދަހަރުގެ ތެރޭގައި، މުބާރާތުގެ ކާމިޔާބު އެއް ޓީމަކީ ޔޫގޮސްލާވިއާއެވެ. އެ ޓީމު ފަސް މުބާރާތެއްގައި ކުޅެފައި ވާ އިރު، 1960 އާއި 1968 ގައި މުބާރާތުގެ ރަނަރއަޕް ޓީމަކީ ވެސް ޔޫގޮސްލާވިއާއެވެ. 1992 ވަނަ އަހަރު ޔޫގޮސްލާވިއާ ރޫޅިގެން ދިޔުމަށް ފަހު، އެ ގައުމުގެ ރައްޔިތުންނާއި ސަރަޙައްދު އެތައް ގައުމަކަށް ބެހިގެން ދިޔައެވެ. އޭގެ ތެރެއިން، ޔޫރޯ މުބާރާތަށް ކޮލިފައި ވެ މުބާރާތުގައި ކުޅެފައި ވަނީ ކްރޮއޭޝިއާ، ސާރބިއާ، ސްލޮވީނިއާ، އަދި ނޯދަރން މެސެޑޯނިއާއެވެ. ޔޫރޯ މުބާރާތް ކުޅުނު ޤައުމުތަކުގެ ލިސްޓުތަކުގައި ވަރަށް ގިނަ ފަހަރު ޔޫގޯސްލާވިއާ ހިމަނައިފައި ނޯންނާތީ، ގިނަ ލިސްޓުތަކުގައި ހިމެނޭނީ 36 ގައުމެވެ. "ވަން ގައިޑް" ގައި 37 ހަމަ ކޮށްފައި ވަނީ ވަކި ގައުމެއްގެ ގޮތުގައި ޔޫގޯސްލާވިއާ ގުނައިގެންނެވެ.

ޔޫރޯ ފައިނަލަށް ދަތުރު ކުރި ޓީމުތަކުގެ ތެރެއިން، މުބާރާތް ކާމިޔާބު ކުރުމުގެ ޝަރަފު ލިބިފައި ނުވަނީ ޔޫގޯސްލާވިއާ، ބެލްޖިއަމް، އަދި އިންގްލެންޑަށެވެ. މި ތިން ގައުމަކީ ވެސް ޔޫރަޕުގެ ފުޓުބޯޅައިގެ ބޮޑެތި ބާރުތަކެވެ. ޔޫގޯސްލާވިއާ ފަހުން ރޫޅި، ވަކިވަކި އެތައް ގައުމަކަށް ވެގެން ދިޔަ ކަމުގައި ވިޔަސް، ބެލްޖިއަމާއި އިންގްލެންޑަކީ މިހާރު ވެސް ކޮންމެ ޔޫރޯއެއްގައި މެ، މުބާރާތް ކާމިޔާބު ކޮށްފާނޭ ކަމަށް ބެލެވޭ ޓީމުތަކުގެ ތެރެއިން ދެ ޓީމެވެ. ޚާއްސަކޮށް، މި ފަހަރުގެ ޔޫރޯ ފެށޭ އިރު، މުބާރާތުގެ އެންމެ މޮޅު ޓީމެއްގެ ގޮތުގައި ފެންނާނީ އިންގްލެންޑް ކަމަށް އެތައް ބަޔަކު ދެކެއެވެ.

ޔުއެފާ ޔޫރޯ އަބަދުވެސް ބޭއްވެމުން އަންނަނީ، ޔޫރަޕުގެ ހުރިހައި ޤައުމެއްގެ ޓީމުތަކަށް ވެސް މުބާރާތުގައި ބައިވެރި ވުމަށް ޓަކައި ކޮލފައިން ބުރެއް ކުޅުމުގެ ފުރުޞަތު ދީގެން، އެ ކޮލިފައިން ބުރުން އެންމެ ރަނގަޅު ނަތީޖާތައް ނެރޭ ވަކި ޢަދަދެއްގެ ޓީމުތައް މުބާރާތުގައި ކުޅޭ އުޞޫލުންނެވެ. ކޮލިފައިން ފަހަނައަޅައި މުބާރާތާ ހަމަޔަށް ގޮސް، މުބާރާތުގައި ކުޅޭ ޓީމުތަކުގެ ޢަދަދަށް ތާރީޚުގައި އެކި ފަހަރުފަހަރު މަތީން ބަދަލު ގެނެވިފައި ވެއެވެ.

1960 އިން ފެށިގެން 1976 ވަނަ އަހަރާ ހަމަޔަށް، މުބާރާތުގައި ކުޅުނީ 4 ޓީމެވެ. 1980 އިން ފެށިގެން 1992 ވަނަ އަހަރާ ހަމަޔަށް، 8 ޓީމެވެ. 1996 އިން ފެށިގެން 2012 އާ ހަމަޔަށް، 16 ޓީމެވެ. 2016 އިން ފެށިގެން މުބާރާތުގައި ކުޅޭ ޓީމުތަކުގެ ޢަދަދަކީ 24 އެވެ.

މުބާރާތުގައި 4 ޓީމު ކުޅުނު އިރު، ކޮލިފައިން ބުރު އިންތިޒާމު ކުރެވިފައި އޮންނަނީ ކޮންމެ ގުރޫޕެއްގައި 4 ޓީމު ހިމެނިގެން ކުޅެ، އޭގެ ތެރެއިން މުބާރާތަށް ކޮލިފައި ވާ 4 ޓީމު، މުބާރާތުގައި ފުރަތަމަ ވެސް ސެމީ ފައިނަލް ކުޅޭ ގޮތަށެވެ. ދެ ލެގު ހިމެނޭ ސެމީ ފައިނަލް ބުރަކަށް ފަހު، ދެން އޮންނަނީ ފައިނަލް މެޗެވެ.

މުބާރާތުގައި 8 ޓީމު ކުޅޭން ފެށީއްސުރެ، މުބާރާތް ބާއްވަނީ 4 ޓީމުގެ ގުރޫޕުތަކަކަށް ޓީމުތައް ބަހައިލައިގެންނެވެ. ފުރަތަމަ ކުޅެނީ ގުރޫޕް ސްޓޭޖެވެ. އެޔަށްފަހު، ގުރޫޕްތަކުން އެންމެ ރަނގަޅު ހޯދާ ޓީމުތައް ނޮކައުޓް ބުރުތަކަށް ދަނީއެވެ. ޓީމުތައް ގިނަ ވާ ވަރަކަށް، ނޮކައުޓް ބުރުތައް ވެސް ގިނަ ވެއެވެ. މިހާރު ނޮކައުޓް ތިން ބުރު ކުޅެއެވެ. އެއީ "ރައުންޑް އޮފް 16" ގެ ނަމުގައި ކުޅޭ ބުރާއި، ކުއާޓަރ ފައިނަލް ބުރާއި، ސެމީ ފައިނަލް ބުރެވެ. މި ތިން ބުރު ނިމޭ އިރު، ސެމީ ފައިނަލް ބުރު ކާމިޔާބު ކުރާ ދެ ޓީމު މުބާރާތުގެ ފައިނަލުގައި ކުޅެނީއެވެ. ފައިނަލް ކާމިޔާބު ކުރާ ޓީމަކީ، ފެށުނީއްސުރެ މިއަދާ ހަމަޔަށް ވެސް، މުބާރާތުގެ ޗެންޕިއަން ޓީމެވެ.

ޔޫރޯގެ ތާރީޚުގައި އެންމެ ކާމިޔާބު ޓީމަކީ ޖަރުމަނެވެ. ޖަރުމަން ވަނީ 3 ފަހަރު ޗެމްޕިއަންކަން ހޯދައިފައެވެ. އެއީ 1972، 1980 އަދި 1996 ގައެވެ. މީގެ އިތުރުން، 3 ފަހަރު ރަނަރއަޕްކަން، އަދި 3 ފަހަރު މުބާރާތުގެ ތިންވަނަ ވެސް ޖަރުމަން ޓީމު ހޯދިއެވެ. ޖަރުމަނުގެ މެޑެލް ޖުމުލައަކީ 9 އެވެ.
ޔޫރޯގެ ތާރީޚުގައި ދެވަނައަށް އެންމެ ކާމިޔާބު ޓީމަކީ ސްޕޭނެވެ. ސްޕޭން ވެސް 3 ފަހަރު މުބާރާތް ކާމިޔާބު ކޮށްފައި ވެއެވެ. އެއް ފަހަރު ރަނަރއަޕްކަން، އެއް ފަހަރު ތިންވަނަ ހޯދިއެވެ. ސްޕޭނުގެ މެޑަލް ޖުމުލައަކީ 5 އެވެ.
ޔޫރޯގެ ތާރީޚުގައި ތިންވަނައަށް އެންމެ ކާމިޔާބު ޓީމަކީ އިޓަލީއެވެ. މުޅި ޖުމުލަ 5 މެޑަލް ހޯދި އިޓަލީ ވަނީ ޗެންޕިއަންކަން 2 ފަހަރު، ރަނަރއަޕްކަން 2 ފަހަރު، އަދި ތިންވަނަ 1 ފަހަރު ހޯދައިފައެވެ.
ޔޫރޯގެ ފައިނަލް މެޗެއް އެންމެ ތަފާތު ބޮޑުކޮށް ކާމިޔާބު ކުރި ޓީމަކީ ސްޕޭނެވެ. ސްޕޭން 2012 ވަނަ އަހަރުގެ މުބާރާތް ކާމިޔާބު ކުރީ 4-0 އިން އިޓަލީ ބަލި ކޮށްފައެވެ.
ޔޫރޯގައި އެންމެ ގިނަ މެޗު ކާމިޔާބު ކުރި ޓީމަކީ ޖަރުމަނެވެ. އެއީ 27 މެޗެވެ. ޔޫރޯގައި އެންމެ ގިނަ މެޗުން ބަލި ވި ޓީމަކީ ޑެންމާކެވެ. ޑެންމާކު ވަނީ 17 މެޗުން ބަލި ވެފައެވެ. 18 މެޗާ އެކު، ޔޫރޯގައި އެންމެ ގިނައިން އެއްވަރު ނަތީޖާ ނެރެފައި ވަނީ އިޓަލީއެވެ.
ޔޫރޯގައި އެންމެ ގިނަ ލަނޑު ޖެހި ޓީމަކީ ވެސް ޖަރުމަނެވެ. އެ ޓީމު ވަނީ 13 މުބާރާތުގައި ޖުމުލަ 78 ލަނޑު ޖަހައިފައެވެ. ޔޫރޯގައި އެންމެ މަދުން ލަނޑު ޖެހި ޓީމުތަކަކީ އަލްބޭނިއާ، ލެޓްވިއާ، ނޯރވޭ، އަދި ފިންލޭންޑެވެ. މިއިން ކޮންމެ ޓީމަކަށް މުބާރާތުގައި ޖެހިފައި ވަނީ އެންމެ ލަނޑެކެވެ.
ޔޫރޯގެ މުބާރާތެއް ކާމިޔާބު ކުރުމުގައި، އެންމެ މޮޅު ކުޅުމެއް ދެއްކި ޓީމަކީ ސްޕޭން ކަމަށް ބުނެވިދާނެއެވެ. ސްޕޭން ޓީމު 1964، 2008، އަދި 2012 މި ތިން މުބާރާތް ކާމިޔާބު ކުރީ އެންމެ މެޗަކުން ވެސް ބަލި ނުވެއެވެ.
އިންގްލެންޑް ޓީމަށް ޔޫރޯ ކާމިޔާބު ކުރެވިފައި ނުވިޔަސް، 1996، 2012، އަދި 2020 މި ތިން މުބާރާތުން އިންގްލެންޑްގެ ދުވެލި ނިމިފައި ވަނީ ޕެނެލްޓީން ނޫން ގޮތަކަށް ބަލި ނުވެއެވެ.
ތަށި ކާމިޔާބު ނުކުރެވި، މުބާރާތުގައި އެންމެ ގިނަ މެޑެލް ހޯދި ޓީމަކީ އިންގްލެންޑެވެ. އިންގްލެންޑް ވަނީ 1 ފަހަރު ރަނަރއަޕްކަން، 2 ފަހަރު ތިންވަނަ ހޯދައިފައެވެ. އިންގްލެންޑުގެ މެޑަލް ޖުމުލައަކީ 3 އެވެ.
މިހައިތަނަށް ޔޫރޯ ބޭއްވިފައި ވަނީ އިޓަލީ، އިންގްލެންޑް، ފްރާންސް، ޖަރުމަން، ބެލްޖިއަމް، ނެދަރލޭންޑްސް، ސްޕޭން، އޮސްޓްރިއާ، އާޒަރްބައިޖާން، ޑެންމާކް، ހަންގޭރީ، ޕޯލަންޑް، ޕޯޗުގަލް، ރޮމޭނިއާ، ރަޝިއާ، ސްކޮޓްލެންޑް، ޔޫގޯސްލާވިއާ، ސްވިޑްން، ސްވިޓްޒަރލޭންޑް، އަދި ޔޫކްރެއިން މި ގައުމުތަކުގައެވެ.
ޔޫރަޕުގެ ބައްރަށް ނިސްބަތް ވާ އަދި ޔުއެފާގެ މެންބަރު ގައުމުތަކުގެ ތެރެއިން، ޔޫރޯގެ ކޮލިފައިން ކުޅެ އެކަމަކު އެއްވެސް މުބާރާތަކަށް ކޮލިފައި ނުވާ ޤައުމުތަކުގެ ޢަދަދަކީ 14 އެވެ. އެ ގައުމުތަކަކީ، އެންޑޯރާ، ބެލަރޫސް، ބޮސްނިއާ އެންޑް ހާރޒެގޯވިނާ، އެސްޓޯނިއާ، ފެރައޯ އައިލެންޑްސް، ޖިބްރޯލްޓަރ، ކޮސޯވޯ، ލީޚްޓެންސްޓެއިން، ލިތުއޭނިއާ، ލަގްޒެމްބާގް، މޯލްޓާ، މޮލްޑޯވާ، މޮންޓެނީގްރޯ، އަދި ސާން މަރީނޯއެވެ. މި ގައުމުތަކުގެ އިތުރުން، އޭޝިއާ ބައްރަށް ނިސްބަތް ވާ، އެކަމަކު ޔުއެފާ މެންބަރުކަން ލިބިފައި ވާ އަރްމީނިއާ، އާޒަރްބައިޖާން، ސައިޕްރަސް، އަދި ކަޒަކިސްތާނަކީ ވެސް ޔޫރޯ ކޮލިފައިން ކުޅެ، މުބާރާތަށް ދުވަހަކުވެސް ކޮލިފައި ވެފައި ނުވާ ގައުމުތަކެވެ. މި ގައުމުތަކުގެ އިތުރުން، ޔޫރޯ ކޮލިފައިން ކުޅެ މުބާރާތަށް ކޮލިފައި ވެފައި ނުވާ ބަޔަކީ، ފަލަސްޠީނުގެ ބިން ގަދަބާރުން ފޭރިގެން އެ ބިމުގައި ދައުލަތެއްގެ ގޮތުގައި ޔޫރަޕު މީހުން އުފައްދައިގެން އުޅޭ އިސްރާއީލޭ ކިޔާ ޣައިރުގާނޫނީ ކިޔާނެވެ.
ޔޫރޯގައި އެންމެ ގިނަ މެޗު ކުޅުނު ކުޅުންތެރިޔަކީ ޕޯޗުގަލްގެ ކްރިސްޓިއާނޯ ރޮނާލްޑޯއެވެ. އޭނާ ވަނީ މުބާރާތުގައި 25 މެޗު ކުޅެފައެވެ. މި ލިސްޓުގައި ދެން ހިމެނޭ 9 ކުޅުންތެރީންނަކީ، 19 މެޗާ އެކު ޕޯޗުގަލްގެ ޕެޕޭ، 19 މެޗާ އެކު ޕޯޗުގަލްގެ ޖާއޯ މޫޓީނިއޯ، 18 މެޗާ އެކު ޖަރުމަނުގެ ބަސްޓިއަން ޝްވެއިންސްޓެއިގަރ، 18 މެޗާ އެކު އިޓަލީގެ ލިއޮނާރޑޯ ބޮނޫޗީ، 17 މެޗާ އެކު އިޓަލީގެ ޖިއޯޖިއޯ ޗިއެލީނީ، 17 މެޗާ އެކު އިޓަލީގެ ޖިއާންލުއިޖި ބުފޯން، 16 މެޗާ އެކު ޕޯޗުގަލްގެ ރުއި ޕެޓްރީޝިއޯ، 16 މެޗާ އެކު ސްޕޭނުގެ ސެސްކް ފަބްރެގާސް، އަދި 16 މެޗާ އެކު ސްޕޭނުގެ އަންދްރޭސް އިނިއެސްޓާއެވެ.

ޔޫރޯގެ ތާރީޚުގައި އެންމެ ގިނަ ލަނޑު ޖެހި ކުޅުންތެރީންގެ ލިސްޓު ތިރީގައި އެވަނީއެވެ.