ރ. ކުޑަކުރަތު ރިސޯޓުން ފުރައިގެން މާލެއަށް ދަތުރު ކުރަމުންދިޔަ ލޭންޑިން ކްރާފްޓެއް ބަންޑުން ޖަހާލައި އޭގެން ދަތުރުކުރި އެކަކު ގެއްލިގެން ހޯދަން ފަށައިފިއެވެ.

އެެމްއެންޑީއެފް އިން މިއަދު ބުނީ، "ލިއޯ ޕާލް" ނަމަކަށް ކިޔާ އެ ލޭންޑިން ކްރާފްޓް ބަންޑުން ޖަހާލި އިރު، އޭގައި ފަސް މީހުން ތިބި ކަމަށެވެ. އެ މީހުންގެ ތެރެއިން ހަތަރު މީހުން ކަނޑުވެފައި ވަނިކޮށް ފެނިގެން ރޭ ފަތިހު ސީ އެމްބިއުލޭންސް 21 އަށް ނަގާފައިވާ ކަމަށް ބުންޏެވެ.

އެމްއެންޑީއެފް އިން ބުނި ގޮތުގައި، ގެއްލިގެން ހޯދަމުންދަނީ ބިދޭސީ އެކެވެ. އޭނާ ހޯދުމުގެ މަސައްކަތް ފާސްޓް އިންޓަސެޕްޓަ ކްރާފްޓް ހަކުރާ ހަރަކާތްތެރިވަމުން އަންނަ ކަމަށްވެސް ބުންޏެވެ.