ކ. މާފުށި މީހުންނަށް ފުރުސަތު ބޮޑުވާ ގޮތަށް އެ ރަށުން ގޯތި ދޫކުރާ އުސޫލު އިސްލާހުކޮށްފިއެވެ.

މާފުށިން ދޫކުރަން ނިންމާފައިވަނީ 2000 އަކަފޫޓުގެ 308 ގޯއްޗެވެ. މި ގޯތިތައް ދޫކުރުމަށް ނިންމާފައިވަނީ މާފުށިގައި އަލަށް ހިއްކާފައިވާ ސަރަހައްދުންނެވެ.

މާފުށިން ގޯތި ދޫކުރުމަށް ހުޅުވާލާ އިއުލާންކުރީ މިދިޔަ މަހުއެވެ. ނަމަވެސް އެ އުސޫލު ބާތިލުކޮށް މާފުށީ ކައުންސިލުން އިއްޔެ ކުރި އިއުލާނުގައި ބުނެފައިވަނީ ގޯތި ދޫކުރުމަށް ނިންމި އުސޫލަށް ދެ އިސްލާހެއް ގެނެސްފައިވާ ކަމަށެވެ.

އެގޮތުން އުސޫލަށް ގެނެސްފައިވާ އިސްލާހުގައި ބުނެފައިވަނީ އުމުރުން 40 އަހަރު ފުރިފައިވާ ނުވަތަ އެއަށްވުރެ ދޮށީ މީހުންނަށް 20 ޕޮއިންޓު ދޭނެ ކަމަށާއި އަދި މާފުށީ ރަށްވެއްސަކަށް ނުވާނަމަ 30 ޕޮއިންޓު އުނިކުރާނެ ކަމަށެވެ. މިއާއެކު މާފުށީ ރަށްވެހިން ނޫން މީހުންނަށް އެރަށުން ގޯތި ލިބުމުގެ ފުރުސަތު ވަރަށް ބޮޑަށް ހަނިވާނެއެވެ.

  • ދިވެހި ރައްޔިތަކަށްވުން
  • މީލާދީގޮތުން އުމުރުން 18 އަހަރު ފުރިފައިވާ މީހެއްކަމުގައިވުން
  • ރާއްޖޭގެ އެއްވެސް ރަށަކުން ލިބިގެން ބަންޑާރަ ގޯއްޗެއް ނުވަތަ އަމިއްލަގޯއްޗެއް ނުވަތަ އެފަދަ ގޯއްޗަކުން 600 ފޫޓަށްވުރެ ބޮޑު ބައެއް ލިބިފައިވާ ނުވަތަ އެމީހެއްގެ ނަމުގައި ރަޖިސްޓަރީ ކޮށްފައިވާ މީހަކަށް ނުވުން
  • އަމިއްލަ ނުވަތަ ބަންޑާރަ ގޯއްޗެއްގައިވާ ނުއުފުލޭ މުދަލުން ލިބިގެން އެފަދަ ގޯއްޗަކުން 600 އަކަފޫޓަށްވުރެ ކުޑަ ބިމެއް ލިބިފައިވާނަމަ، މިފަދަ ބައެއް މި ގަވައިދާއި އެއްގޮތްވާ ގޮތުގެމަތިން ދޫކޮށްލުން
  • ސަރުކާރުން ހަދާފައިވާ އިމާރާތެއްގެ ފުލެޓެއް އެމީހެއްގެ ނަމުގައި ރަޖިސްޓަރީވެފައި ނެތުން، އަދި މިފަދަ ތަނެއް އަމިއްލަ ނަމުގައިއޮވެ، މިތަން ދޫކޮށްލާ ނުވަތަ ވިއްކާލާފައިވާތާ 2 އަހަރު ދުވަހަށްވުރެ ގިނަދުވަސް ވެފައިވުން
  • އެއްމެދު އިމާރާތެއްގެ ފުލެޓެއް އެމީހެއްގެ ނަމުގައި ރަޖިސްޓަރީވެފައި ނެތުން އަދި މިފަދަ ތަނެއް އަމިއްލަ ނަމުގައި އޮވެ، މިތަން ދޫކޮށްލާ ނުވަތަ ހިބައިން ދީފައިވާނަމަ ނުވަތަ ވިއްކާލާފައިވާތާ 2 އަހަރަށްވުރެ ގިނަދުވަސް ވެފައިވުން

މާފުށި ކައުންސިލުގެ އިއުލާނުގައި ބުނެފައިވާ ގޮތުން، ގޯއްޗަށް އެދޭ ފޯމު ސަރުކާރުގެ ގެޒެޓުންނާއި އެ ކައުންސިލްގެ އިދާރާގެ ކައުންޓަރުން ލިބޭނެއެވެ. އަދި އަންނަ މަހުގެ 15 ވަނަ ދުވަހުގެ ކުރިން ފޯމު ހުށަހަޅަންޖެހޭއިރު، މި މަހުގެ ނުވަވަނަ ދުވަހުން ފެށިގެން މާފުށީ ކައުންސިލް އިދާރާއިން ފޯމު ބަލައިގަންނަން ފަށާނެ ކަމަށް ބުނެފައިވެއެވެ.