ބ. ތުޅާދޫގައި ބަރަހަނާ ވީޑިއޯތަކެއް ބޭނުންކޮށްގެން މީހަކު ބްލެކްމެއިލްކުރި ކަމަށް ތުހުމަތު ކުރެވޭ މައްސަލައިގައި ހައްޔަރުކުރި މީހާ ބަންދުން ދޫކޮށްލައިފިއެވެ.

ފުލުހުން މީގެ ކުރިން ބުނީ ތުޅާދޫގައި މީހަކު ބްލެކްމެއިލްކޮށް ފައިސާ ހޯދަން އުޅުނު މައްސަލައެއް މިމަހުގެ ދެވަނަ ދުވަހު ފުލުހުންނަށް ހުށަހަޅާފައިވާ ކަމަށެވެ.

އެ މައްސަލައާ ގުޅިގެން މިމަހުގެ ހަތަރުވަނަ ދުވަހުގެ ރޭގެ ވަގުތެއްގައި 31 އަހަރުގެ ދިވެހި ފިރިހެނަކު ހައްޔަރުކޮށްފައިވާ ކަމަށްވެސް ބުނެފައިވެއެވެ. އަދި އޭނާގެ ބަންދަށް މި މަހުގެ ފަސް ވަނަ ދުވަހު ވަނީ ފަސް ދުވަސް ޖަހައިފައެވެ.

ފުލުހުންގެ މީޑިއާއިން "ވަން" އަށް މިއަދު ބުނީ މި މައްސަލައިގައި ހައްޔަރުކުރި މީހާގެ ބަންދު ދިރާސާ ކުރުމަށް ކޯޓަށް ހާޒިރުކުރުމުން ޝަރުތުތަކަކާއެކު އޭނާ ދޫކޮށްލާފައިވާ ކަމަށެވެ. ނަމަވެސް މި މައްސަލަ އަދިވެސް ތަހުގީގު ކުރަމުން އަންނަ ކަމަށް ބުންޏެވެ.

"ވަން" އަށް އެނގިފައިވާ ގޮތުގައި އޭނާ ބްލެކްމެެއިލް ކުރީ ދެ މަފިރިއެއްގެ ބަރަހަނާ ވީޑިއޯތައް ބޭނުންކޮށްގެންނެވެ.