ގަތަރު ވޯލްޑް ކަޕް 2022 ގެ ގްރޫޕް އޭގެ ހަވަނަ މެޗުގައި އެކުއެޑޯއާއި ސެނެގާލް ވާދަކުރާ މެޗުގެ ލައިވް ބްލޮގަށް "ވަން"ގެ ކިޔުންތެރިންނަށް މަރުހަބާ!

ސެނެގާލުން ކުޅުނު ފުރަތަމަ މެޗުގައި ނެދަލޭންޑްސް ކައިރިން ބަލިވީ 2-0 ގެ ނަތީޖާއަކުން. އެ ބަލިން އަރައިގަނެ، ސެނެގާލުން ގަދަ 16 އަށް އުންމީދު އާކުރީ 3-1 ގެ ނަތީޖާއަކުން ގަތަރު ބަލިކޮށްގެން. އެކުއެޑޯން ފުރަތަމަ ކުޅުނު މެޗުގައި ގަތަރު ބަލިކޮށްފައިވަނީ 2-0 ގެ ނަތީޖާއަކުން. ދެވަނަ މެޗުގައި ނެދަލޭންޑްސްއާ އެއްވަރުކުރީ 1-1 ގެ ނަތީޖާއަކުން.

ގަދަ 16 ޔަގީންކުރަން ސެނެގާލަށް އޮތް މަގަކީ އެކުއެޑޯ ބަލިކުރުން. މެޗުން ޕޮއިންޓެއް ހޯދައިގެންވެސް އެކުއެޑޯއަށް ގަދަ 16 ޔަގީން ކުރެވޭނެ.

  • މިއީ ވޯލްޑް ކަޕްގައި އެކުއެޑޯން އެފްރިކާ ޓީމަކާ ދެކޮޅަށް ކުޅޭ ފުރަތަމަ މެޗު
  • މީގެ ކުރިން އެކުވެރިކަމުގެ ދެ މެޗެއްގައި ސެނެގާލާއި އެކުއެޑޯ ކުޅުނު
  • އެއީ 2002 ވަނަ އަހަރު ކުޅުނު މެޗެއްގެ އިތުރުން 2005 ވަނަ އަހަރު ކުޅުނު މެޗެއް
  • އެ ދެ މެޗުވެސް ކާމިޔާބުކުރީ ސެނެގާލުން، ފުރަތަމަ މެޗު 1-0 އިން އަދި ދެވަނަ މެޗު 2-1 އިން
  • މީގެ ކުރިން ސެނެގާލުން ދެކުނު އެމެރިކާގެ ޓީމުތަކާ ދެކޮޅަށް ވޯލްޑް ކަޕްގައި ކުޅުނު މެޗަކުން މޮޅުވެފައެއް ނުވޭ
  • ސެނެގާލުން އެންމެފަހުން ގްރޫޕް ސްޓޭޖު ފަހަނައަޅާ ދިޔައީ 2002 ވަނަ އަހަރު، އެފަހަރު ވޯލްޑް ކަޕްގައި ކުޅުނު ފަސް މެޗުގެ ތެރެއިން ހަތަރު މެޗުގައި މިހާރުގެ ކޯޗު ސީސޭ ކުޅުނު
  • އެކުއެޑޯ އެންމެފަހުން ގަދަ 16 އަށް ދިޔައީ 2006 ގެ ވޯލްޑް ކަޕްގައި