ސުލްހަވެރި ހަރަކާތްތަކުން ގައުމީ ސަލާމަތަށް ނުރައްކާވާކަމަށް ކަނޑަނޭޅޭގޮތަށް ހުށަހެޅި ބިލު ބޭރުކޮށްލައިފި

ގާނޫނުތަކާ ހިލާފު ނުވެ ހިންގާ ސުލްހަވެރި ހަރަކާތްތައް ގައުމީ ސަލާމަތަށް ނުރައްކާވުން ކަމަށް ނުހެދޭ ގޮތަށް އިދިކޮޅު ޕީއެންސީގެ މަޑުއްވަރީ ދާއިރާގެ މެންބަރު އާދަމް ޝަރީފް ރައްޔިތުންގެ މަޖިލީހަށް ހުށަހެޅި ބުލި މަޖިލީހުން ބޭރުކޮށްލައިފިއެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މި ބިލު ބަލައިގަތުމަށް ނެގި ވޯޓުގައި، ޖަލްސާގައި ތިއްބެވި 53 މެންބަރުންގެ ތެރެއިން ބިލު ބަލައިގަތުމަށް ވޯޓު ދެއްވީ އެންމެ 11 މެންބަރުންނެވެ. ބިލު ބަލައިނުގަތުމަށް 40 މެންބަރުން ވޯޓު ދެއްވިއެވެ. ބިލު ބަލައިގަތުމަށް 26 މެންބަރުންގެ ވޯޓު ބޭނުންވެއެވެ.

ދިވެހިރާއްޖޭގެ ގައުމީ ސަލާމަތާބެހޭ ބިލުގެ ނަމުގައި ހުށަހެޅި އެ ބިލުގައި ގައުމީ ސަލާމަތަށް ހުރި ނުރައްކާތައް ހިމެނުމަށްފަހު ސުލްހަވެރި ހަރަކާތްތަކަކީ ގައުމީ ސަލާމަތަށް ނުރައްކާވުން ކަމަށް ނުހެދޭނެ ކަމަށް ހުށަހާޅާފައިވަނީ އިސްތިސްނާގެ ގޮތުގައެވެ.

ރާއްޖޭގެ ގައުމީ ސަލާމަތަށް ނުރައްކާވާ ކަންތައްތައް ހިމަނާފައިވަނީ އެ ބިލުގެ ހަތަރު ވަނަ މާއްދާގައެވެ. ފަނަރަ ކަމެއް ހިމެނޭ އެ މާއްދާގައި ބުނެފައިވަނީ އިސްލާމް ދީނާއި ދިވެހި ގައުމުގެ މިނިވަންކަމާއި ސިޔާދަތާއި އިސްތިގުލާލާއި ރާއްޖޭގެ ގާނޫނުއަސާއާއި ރައްޔިތުންގެ އަސާސީ ހައްގުތަކާއި އަދުލު އިންސާފާއި ރާއްޖޭގެ އިގުތިސާދާއި ދަތުރުފަތުރާއި މުއާސަލާތީ ހިދުމަތްތަކާއި ރައްޖޭގެ ތިމާވެއްޓާއި އަދި ސިޔާސީ މަސްލަހަތުތަކަށް ނިކަމެތިކަން ނުވަތަ އުނިކަން ލިބޭ ފަދަ ކަމެއް ކުރުން ނުވަތަ ކުރިމަތިވުމަކީ ގައުމީ ސަލާމަތަށް ނުރައްކާވުން ކަމަށެވެ.

ގައުމީ ސަލާމަށް ނުރައްކާވާ ކަމަށް ބިލުގައި ހިމަނާފައިވާ ކަންތައްތައް:

ނަމަވެސް ރައްޔިތުންނަށް ލިބިދޭ އަސާސީ ހައްގުތަކުގެ ދަށުން، އެކި ކަންކަމަށް އިހުތިޖާޖުކުރުމަށް ގާނޫނުތަކާ ހިލާފު ނުވެ ހިންގާ ސުލްހަވެރި ހަރަކާތްތައް ގައުމީ ސަލާމަތަށް ނުރައްކާވުމުގެ ތެރެއިން އިސްތިސްނާ ވާނެ ކަމަށާއި ގައުމީ ސަލާމަތަށް އުނިކަމެއް ނުވަތަ ނުރައްކަލެއް ކުރިމަތިވެދާނެ ކަމަކާ ބެހޭގޮތުން މީޑިއާއިން މައުލޫމާތު ހޯދުމަކީ ޖާސޫސްކުރުން ކަމުގައި ނުބެލެވޭނެ ކަމަށް އިސްތިސްނާގެ ގޮތުގައި ބިލުގައި ވަނީ ހިމަނައިފައެވެ.

ގައުމީ ސަލާމަތާބެހޭ އާ ކައުންސިލެއް އެކުލަވައިލުމަށްވެސް ބިލުުގައި ވަނީ ހިމަނައިފައެވެ. އެ ކައުންސިލް އެކުލަވާލާނީ ރައީސުލްޖުމްހޫރިއްޔާ ކަމަށްވެސް ބުނެފައިވެއެވެ.

ގައުމީ ސަލާމަތާބެހޭ ކައުންސިލް، ބިލުގައި އެކުލެވިފައިވާ ގޮތް:

ގައުމީ ސަލާމަތަށް ނުރައްކަލެއް ކުރިމަތިވެދާނެ އެއްވެސް އަމަލެއް ހިންގުމަކީ ނުވަތަ ހިންގަން އުޅުމަކީ ގާނޫނީ ކުށެއް ކަމަށާއި އަދަބަކީ ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުން ކަމަށް ބިލުގައި ވަނީ ކަނޑައަޅައިފައެވެ.

ގައުމީ ސަލާމަތަށް ނުރައްކާވެދާނެ މައުލޫމާތެއް އެނގިހުރެ، އެ މައުލޫމާތު ގައުމީ ސަލާމަތާބެހޭ ކައުންސިލަށް ނުވަތަ ސަލާމަތީ ހިދުމަތްތަކަށް ނުދިނުމަކީ ކުށެއް ކަމަށާއި ގައުމީ ސަލާމަތަށް އުނިކަމެއް ނުވަތަ ނުރައްކަލެއް ކުރިމަތިވެދާނެ އެއްވެސް ކަމެއްގައި ޖާސޫސް ކުރުމަކީ އަދި ޖާސޫސުކުރުމަށް އެހީތެރިވެދިނުމަކީ ކުށެއް ކަމަށް ކަނޑައަޅައި އަދަބަކީ އެއް އަހަރާއި ފަސް އަހަރާ ދެމެދުގެ މުއްދަތަކަށް ޖަލަށް ލުން ކަމަށްވެސް ހިމަނާފައިވެއެވެ.