ޓިއުޝަންދޭނެ ކަމަށް ބުނެ ގެންގޮސް ފިރިހެން ދަރިވަރަކާ ބެހުނު ކަމަށް ބުނާ މައްސަލައިގައި ހުޅުމާލޭން އިއްޔެ ރޭ ހައްޔަކުރި ޓީޗަރުގެ ބަންދަށް ފަސް ދުވަސް ޖަހައިފި އެވެ.

ފުލުހުން ބުނީ، އެ މައްސަލައިގައި ހައްޔަރުކުރި 29 އަހަރުގެ ފިރިހެން ޓީޗަރުގެ ބަންދާ މެދު ގޮތެއް ނިންމަން ހުޅުމާލޭ މެޖިސްޓްރޭޓް ކޯޓަށް އިއްޔެ ހާޒިރުކުރުމުން އޭނާގެ ބަންދަށް ފަސް ދުވަސް ޖަހައިފައިވާ ކަމަށެވެ.

އެ މައްސަލަ ފެންމަތިވުމާއެކު އެޑިއުކޭޝަން މިނިސްޓްރީން ވަނީ އެ ޓީޗަރު ސަސްޕެންޑްކޮށްފައެވެ.

ފުލުހުން ބުނެފައިވާ ގޮތުގައި އެ މައްސަލަ އެ ސާވިސްއަށް ހުށަހަޅާފައިވަނީ މިމަހުގެ 15 ވަނަ ދުވަހުއެވެ. ނަމަވެސް އިއްޔެ ރެއާ ހަމައަށްވެސް އޭނާ ހައްޔަރުކޮށްފައި ނުވާތީ، އޭނާ ދިރިއުޅޭ ހުޅުމާލޭގެ ދެވަނަ ފޭހުގެ ފްލެޓުން ނެރެ، ބަޔަކު ވަނީ އޭނާއަށް އަނިޔާކޮށްފައެވެ.

އެގޮތުން އެ ފިރިހެން މީހާ ރުކެއްގެ ކައިރީގައި ބަހައްޓާފައި އަނިޔާކުރާ ވީޑިއޯއެއް ވަނީ އާންމުވެފައެވެ. ފިރިހެން ކުއްޖާއާ މެދު އޭނާ ކަންތައް ކުރީ ކިހިނެއްތޯ މީހުން ސުވާލު ކުރާ އަޑު އެ ވީޑިއޯ އިން އިވެއެވެ. އަދި ކިތައް ކުދިންނާ ބެހުނުތޯ ވެސް ސުވާލު ކުރެއެވެ. އެ ސުވާލުތަކަށް ޖަވާބުދެމުން އޭނާ ވަނީ ކުއްޖަކާ ބެހުނު ކަމަށް އެއްބަސްވެފައެވެ. ނަމަވެސް އެތާ ކައިރީގައި ތިބި މީހުން ވަނީ އިތުރު ކުދިންނާ ބެހުނު ކަމަށް ވެސް ތުހުމަތުކޮށްފައެވެ.

ވީޑިއޯއިން ފެންނަ އަންހެން މީހަކު ބުނީ، އެ ކުއްޖާ ޓިއުޝަނަށް ފޮނުވީ އެ ފިރިހެން މީހާ އަމިއްލައަށް ޓިއުޝަން ދޭން ބޭނުންވާ ކަމަށް ބުނުމުން ކަމަށެވެ. އަދި އެ ކުއްޖާ ޓިއުޝަނަށް ގޮސްފައި އައިސް ބަދުއަހުލާގީ ވީޑިއޯ ދެއްކި ކަމަށާއި ޓިއުޝަނަށް ފޮނުވި ފުރަތަމަ ދުވަހު ކުއްޖާއާ ބެހިފައިވާ ކަމަށެވެ.