ޔޫރޯ 2020 ގެ ގްރޫޕް ސީގެ ފުރަތަމަ މެޗުގެ ލައިވް ބްލޮގަށް "ވަން" ގެ ކިޔުންތެރިންނަށް މަރުހަބާ!

ޔޫރޯ 2020 ގެ ގްރޫޕް ސީގައި އޮސްޓްރިއާ އާއި ނޯތު މެސަޑޯނިއޯ ކުޅޭ މެޗަކީ ދެޓީމަށްވެސް މުހިއްމު ވާނެ މެޗެއް. ނޯތު މެސަޑޯނިއާ ޔޫރޯގައި ކުޅޭ ފުރަތަމަ މެޗަކީ މިރޭގެ މެޗު ކަމަށްވާ އިރު، އޮސްޓްރިއާ ނުކުންނާނީ ޔޫރޯގައި ފުރަތަމަ ފަހަރަށް މޮޅެއް ހޯދުމުގެ ވިސްނުމުގައި. މެޗު ކުޅެވިގެންދާނީ ރޮމޭނިއާގެ ބުޗަރެސްޓްގެ ނޭޝަނަލް އެރީނާގައި.

  • ބުޗަރެސްޓް އަދި ނޭޝަނަލް އެރީނާގެ ބައެއް މުހިއްމު މައުލޫމާތު

ސިޓީ: ބުޗަރެސްޓް

ސްޓޭޑިއަމް : އެރީނާ ނޭޝިއޮނާލޭ

ސަޕޯޓަރުންގެ ޖާގަ: 55،600 މީހުން

އުސޫލުތަކާއެކު ސަޕޯޓަރުން ވެއްދޭނެ ކަމަށް ބުނެފައިވާ އަދަދު: 13،000 (25 ޕަސެންޓް)

ބުޗަރެސްޓް

- ރޮމޭނިއާގެ ވެރިރަށް

- "މުކެލް ޕެރިސް" (ކުޑަކުޑަ ޕެރިސް)އެއްގެ ގޮތުގައި 1918-47 ވަނަ އަހަރަށް މަޝްހޫރު ސިޓީއެއް

އެރީނާ ނޭޝިއޮނާލޭ

- ކުރިން ގައުމީ ސްޓޭޑިއަމް އޮތް ތަނުގައި އިމާރާތް ކޮށްފައިވާ ސްޓޭޑިއަމެއް

- މައިކަލް ޖެކްޝަންގެ ދެ ކޮންސެޓެއް ކުރިން ހޯސްޓް ކުރި

- 2012 ވަނަ އަހަރު ޔޫރޮޕާ ލީގުގެ ފައިނަލުގައި އެތުލެޓިކޯ މެޑްރިޑާއި ބިލްބާއޯ ވާދަކުރި މެޗު ބޭއްވި ސްޓޭޑިއަމް

މިފަހަރުގެ މުބާރާތުގައި ވާދަކުރާ އެންމެ ކުޑަ ގައުމަކީ ނޯތު މެސެޑޯނިއާ. ނޯތު މެސެޑޯނިއާ އިން އަންނަނީ 1996 ވަނަ އަހަރުން ފެށިގެން ޔޫރޯ ކޮލިފައިންތަކުގައި ވާދަކުރަމުން. އެހެންނަމަވެސް މިއީ ގައުމުގެ ތާރީހުގައި ފުރަތަމަ ބޮޑު މުބާރާތެއް. ފުރަތަމަ ޔޫރޯވެސް މެ. އަނެއްކޮޅުން އޮސްޓްރިއާއަކީވެސް ޔޫރޯގައި މާ ކާމިޔާބު ޓީމެއް ނޫން. އޮސްޓްރިއާއިން 2008 ވަނަ އަހަރު އަދި އެންމެ ފަހުން ބޭއްވި ޔޫރޯ 2016ގައި އޮސްޓްރިއާއިން ވާދަކުރި ނަމަވެސް އެޓީމަށް މިހާތަނަށް ޔޫރޯގައި މޮޅެއް ހޯދިފައެއް ނުވޭ.

މި ދެޓީމު މިހާތަނަށް ކުޅެފައި ވަނީ ވާދަވެރި ދެ މެޗެއް. އެ ދެމެޗުންވެސް މޮޅުވީ އޮސްޓްރިއާ.