ގދ. ތިނަދޫގައި ހުންނަ ކޮވިޑު ފެސިލިޓީގައި ފަރުވާ ދެމުންދިޔަ އުމުރުން ދުވަސްވީ މީހަކު މަރުވެއްޖެ އެވެ.

ތިނަދޫގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލްގެ މީޑިއާ އޮފިސަރު ހުސައިން ސާލިމް "ވަން" އަށް ވިދާޅުވީ ތިނަދޫ ކޮވިޑު ފެސިލިޓީގައި ފަރުވާ ދެމުންދިޔަ އުމުރުން 88 އހަރުގެ ދިވެހި ފިރިހެނަކު ރޭ ފަތިހު 5:30ގައި މަރުވެފައިވާ ކަމަށެވެ.

މިއީ އެ ބަލީގައި ތިނަދޫން މަރުވި ފުރަތަމަ މީހާއެވެ. އަދި މިއީ މި ބަލީގައި މިއަދު ރާއްޖޭގައި މަރުވި 173 ވަނަ މީހާ އެވެ. ރޭ ދަންވަރުގެ ވަގުތެއްގައި ވަނީ ހުޅުމާލޭ މެޑިކަލް ފެސިލިޓީގައި ފަރުވާ ދެމުން އައި އުމުރުން 62 އަހަރުގެ ދިވެހި ފިރިހެނަކު ވެސް މަރުވެފަ އެވެ.

ރާއްޖޭގައި ކޮވިޑު ޖެހިގެން އެންމެ ގިނަ މީހުން މަރުވީ މިދިޔަ މަހުގެ 25 ވަނަ ދުވަހުއެވެ. އެ ދުވަހު ބަލީގައި 13 މީހަކު މަރުވެފައިވެއެވެ.

ކޮވިޑުގައި ރާއްޖެއިން އެންމެ ފުރަތަމަ މީހަކު މަރުވީ މިދިޔަ އަހަރުގެ އޭޕްރީލް މަހުގެ 29 ވަނަ ދުވަހުއެވެ. އެއީ އުމުރުން 83 އަހަރުގެ ދިވެހި އަންހެނެކެވެ.

ރާއްޖޭގައި ކޮވިޑަށް ޕޮޒިޓިވް ވާ މީހުންގެ އަދަދުތައް އާދަޔާ ހިލާފަށް މަތީގައި ހުރުމަށް ފަހު މިދިޔަ ދެތިން ދުވަހަކު ވަނީ އެ އަދަދުތައް މަޑުމަޑުން ދަށަށް ޖެހެން ފަށައިފަ އެވެ. އެ ގޮތުން މީގެ ހަފުތާއެއްހައި ދުވަސް ކުރީން 1000 އާއި 1500 އާ ދެމެދުގައި ހުރި އަދަދުތައް މިހާރު ވަނީ 800 އިން ތިރިޔަށް ޖެހިލައިފަ އެވެ.

ކޮވިޑުގެ އަދަދުތައް ތިރިކުރުމަށް މިހާރު ރާއްޖޭގައި ވަނީ ހަރުކަށި ފިޔަވަޅުތަކެއް އަޅައިފަ އެވެ. އެ ގޮތުން ކަރަންޓީނުގައި ހުންނަ ހުރިހައި ރަށެއްގައި ވެސް ވަކި ވަގުތު ތަކެއްގައި ކާފިއު ހިންގުމުގެ އިތުރުން ކާފިއު ނޫން ގަޑިތަކުގައި ވެސް ހުއްދަ ނަގައިގެން ނޫނީ ބޭރުގައި ނޫޅެވޭނެ ގޮތަށް ވަނީ ހަދައިފަ އެވެ. މީހުން އެއްވާ ޒާތުގެ ހުރިހައި ކަމެއް ވަނީ މަނާކޮށްފަ އެވެ.