ސައޫދީ އަރަބިއްޔާގެ ރިޔާދުގައި ހުންނަ ކިންގް އަބްދުالله ފައިނޭންޝަލް ޑިސްޓްރިކްޓްގެ އިމާރާތަކަށް ހޫތީ ޖަމާއަތުން ދިން ހަމަލާއެއްގައި ބޮޑެތި ގެއްލުންތަކެއް ވެފައިވާ ކަމަށް ސައޫދީ ކަމާބެހޭ އިދާރާތަކުން ހާމަކުރުމާ ގުޅިގެން ގަރަރާއި ކުވޭތުގެ އިތުރުން ގަލްފު އެއްބާރުލުން ދޭ ކައުންސިލް (ޖީ.ސީ.ސީ) އިން އެ ހަމަލާ ހަރުކަށި އިބާރާތުން ކުށްވެރިކޮށްފިއެވެ.

ސައޫދީ ސިވިލް ޑިފެންސުން މައުލޫމާތު ދީފައިވާ ގޮތުގައި، ހޫތީންގެ މި ހަމަލާ އަމާޒުވެފައިވަނީ ރިޔާދުގެ އެންމެ އުސް އިމާރާތް ކަމަށްވާ ޕަބްލިކް އިންވެސްޓްމަންޓް ފަންޑު (ޕީ.އައި.އެފް) ޓަވަރަށެވެ. މި ހަމަލާގެ ސަބަބުން އިމާރާތުގެ އެކި ބުރިތަކާއި ކައިރީގައި ހުރި އެހެން އިމާރާތްތަކަށް މާއްދީ ގެއްލުންތަކެއް ލިބުނު ނަމަވެސް، އެއްވެސް މީހަކަށް އަނިޔާއެއް ވެފައެއް ނުވެއެވެ.

ޤަތަރާއި ކުވޭތުގެ ޚާރިޖީ ވުޒާރާތަކުން ނެރުނު ބަޔާންތަކުގައި، އާންމުންގެ އުމްރާނީ ވަސީލަތްތަކަށް އަމާޒުކޮށް ދޭ މިފަދަ ހަމަލާތަކަކީ ސައޫދީގެ ސިއާދަތަށް އަރައިގަތުމާއި ބައިނަލްއަގުވާމީ ގާނޫނުތަކާ ހިލާފު އަމަލެއްގެ ގޮތުގައި ސިފަކޮށްފައިވެއެވެ. އަދި ޖީ.ސީ.ސީގެ ސެކްރެޓަރީ ޖެނެރަލް ޖާސިމް މުހައްމަދު އަލްބުދައިވީ ވިދާޅުވީ، ސައޫދީގެ ސަލާމަތާއި ރައްކާތެރިކަން ދެމެހެއްޓުމަށް އެ ގައުމުން އަޅާ ކޮންމެ ފިޔަވަޅަކަށް ގަލްފުގެ އިއްތިހާދުން ފުރިހަމައަށް ތާއީދުކުރާ ކަމަށެވެ.

މި ހަމަލާއާ ގުޅިގެން ސައޫދީ ހާރިޖީ ވުޒާރާއިން ބުނީ، މިފަދަ އަމަލުތަކުން ގައުމުގެ ރައްޔިތުންނާއި ވަސީލަތްތައް ރައްކާތެރިކުރުމަށްޓަކައި އަޅާން ޖެހޭ އެންމެހައި ފިޔަވަޅުތައް އެޅުމުގެ ފުރިހަމަ ހައްގު ސައޫދީއަށް ލިބިގެންވާ ކަމަށެވެ. މިއީ ފާއިތުވި 2 ހަފުތާގެ ތެރޭގައި ރިޔާޟްގެ މާލީ ސަރަހައްދަށް އަމާޒުވި މިފަދަ ދެވަނަ ހަމަލާއެވެ.

ޔަމަނުގެ މަޝްރަހަށް ބަލާއިރު، ހޫތީންގެ ބާރުގެ ދަށުގައިވާ ވެރިރަށް ސަންޢާއަށް ސައޫދީ އިސްވެ އޮންނަ އިއްތިހާދުން ދިން ހަމަލާތަކުގައި ފާއިތުވި 2 ދުވަހުގެ ތެރޭގައި 10 މީހުން މަރުވެފައިވާ ކަމަށް ހުތީންގެ ސިއްހީ ވުޒާރާއިން ވަނީ ބުނެފައެވެ. ބައިނަލްއަގުވާމީ ގޮތުން ގަބޫލުކުރާ ޔަމަނުގެ ސަރުކާރާއި ސައޫދީ އިއްތިހާދުން، އީރާނުގެ މަދަދު ލިބޭ ހޫތީ ހަނގުރާމަވެރިންނާ ދެކޮޅަށް ދެމުންދާ ހަމަލާތައް ވަނީ އިތުރަށް ވަރުގަދަވެފައެވެ.