ރާއްޖޭގެ ކަނޑުގެ ސަރަހައްދު ބެލެހެއްޓުމުގެ ގާބިލުކަން އިތުރުކުރުމަށްޓަކައި، ކޯސްޓްގާޑަށް އަލަށް 17 އުޅަނދެއް ގެނައުމުގެ މަސައްކަތް ކުރަމުން އަންނަކަމަށް ޑިފެންސް މިނިސްޓަރު ހަސަން ރަޝީދު މިރޭ ވިދާޅުވެއްޖެއެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގައި ވާހަކަދައްކަވަމުން ހަސަން ރަޝީދު ވިދާޅުވީ ސިފައިންނަކީ ކިތަންމެ މަތީ ފެންވަރަކަށް ތަމްރީނުވެފައިވާ ބައެއް ނަމަވެސް، ގައުމުގެ ދިފާއީ މަސައްކަތްތައް އެންމެ ފުރިހަމައަށް ކުރެވޭނީ ޒަމާނީ ވަސީލަތްތައް ލިބިގެން ކަމަށެވެ. އަދި ރައީސް ޑރ. މުހައްމަދު މުއިއްޒުގެ ސަރުކާރުން ދަނީ އެމްއެންޑީއެފްގެ އޮޕަރޭޝަނަލް ގާބިލުކަން އިތުރުކުރުމަށް ބޭނުންވާ މުހިންމު ވަސީލަތްތައް ފަހިކޮށްދެމުންކަމަށް މިނިސްޓަރު ވިދާޅުވިއެވެ.

އެގޮތުން، އެމްއެންޑީއެފް ވަރުގަދަކުރުމަށް ތުރުކީއާއި އޮސްޓްރޭލިއާ އިން މަނަވަރު ހަދިޔާކޮށްފައިވާއިރު، ވައިގެ ސަރަހައްދު ބެލެހެއްޓުމަށް އަލަށް ޑްރޯންވެސް ތައާރަފުކޮށްފައިވާކަމަށް ހަސަން ރަޝީދު ވިދާޅުވިއެވެ.

"މީގެ އިތުރުންވެސް ކޯސްޓްގާޑަށް ބޭނުންވާ އެހެނިހެން ޕެޓްރޯލްކުރުމަށް ބޭނުންވާ އެކިއެކި އުޅަނދުތައްވެސް ގެންދަވަނީ ހޯއްދަވަމުން. މިހާރުވެސް މިއަދާ ހަމައަށް ތިން ޕެޓްރޯލްކުރާ އުޅަނދެއްވެއްޖެ އެމްއެންޑީއެފްއަށް ހޯދައިދެއްވާފައި. އިތުރު 17 އުޅަނދެއް ލިބުމުގެ މަގުމަތީގައިވަނީ. އޭގެ ތެރޭގައި ނޮވެމްބަރު މަސްތެރޭގައި އޭގެ އެއްބައި ލިބޭނެ. ބާކީ ދެން ހުރި އުޅަނދުތައްވެސް ލިބިގެންދާނެ." ހަސަން ރަޝީދު ވިދާޅުވިއެވެ.

އަދި އާންމު ރައްޔިތުންނަށް ދެމުން އަންނަ ސިއްހީ ކުއްލި ފަރުވާގެ ހިދުމަތްތައް ހަރުދަނާކުރުމުގެ ގޮތުން، ކޯސްޓްގާޑުން އޮޕަރޭޓްކުރާ ސީ އެމްބިއުލޭންސްގެ ފްލީޓަށް އިތުރު 12 އުޅަނދު ބަނުމުގެ އަމަލީ މަސައްކަތްވެސް ކުރިއަށްދާކަމަށް މިނިސްޓަރު ވިދާޅުވިއެވެ.

ހަސަން ރަޝީދު ވިދާޅުވީ، 3 ނޮވެމްބަރު 1988 ގައި ރާއްޖެއަށް ކުރިމަތިވި ފަދަ ނުރައްކާތެރި ހަމަލާއެއް ދިނުމުގެ ފުރުސަތު ދެން އެއްވެސް ފަރާތަކަށް ނުދޭނެ ކަމަށާއި، ކަނޑާއި ވައިގެ މަގުން ކުރިމަތިވެދާނެ ކޮންމެ ނުރައްކަލަކާ ދެކޮޅަށް ސިފައިން އަބަދުވެސް ތިބޭނީ ފުރިހަމަ ތައްޔާރީ ހާލަތުގައިކަމަށް މިނިސްޓަރު ވިދާޅުވިއެވެ.