މާލެ ސަރަހައްދުގައި ހުރި އުސް އިމާރާތްތަކުގައި ހިނގާ އަލިފާނުގެ ނުރައްކާތެރި ހާދިސާތައް ކޮންޓްރޯލްކޮށް، އަލިފާން ނިއްވުމުގެ މަސައްކަތްތަކުގައި ޑްރޯން ބޭނުންކުރުމަށް ތައްޔާރުވަމުން އަންނަކަމަށް ޑިފެންސް މިނިސްޓަރު ހަސަން ރަޝީދު މިރޭ ވިދާޅުވެއްޖެއެވެ.

ރައީސް އޮފީހާއި، ޕީއެސްއެމް ގުޅިގެން ބާއްވާ "އަހާ" ފޯރަމްގެ އަށްވަނަ ޕްރޮގްރާމުގައި ވާހަކަދައްކަވަމުން ހަސަން ރަޝީދު ވިދާޅުވީ ޒަމާނީ ޓެކްނޮލޮޖީގެ އެހީގައި މިފަދަ ހާދިސާތަކަށް އިޖާބަދިނުމުގެ ގޮތުން ޑްރޯން ބޭނުންކޮށްގެން އަލިފާން ނިއްވުމުގެ ޓެސްޓުތައް މިހާރު ކާމިޔާބުކަމާއެކު ހަދާފައިވާ ކަމަށެވެ. އަދި މި އަހަރު ނިމުމުގެ ކުރިން ނުވަތަ އަންނަ އަހަރުގެ ކުރީކޮޅުގައި ޑްރޯން ބޭނުންކުރަން ފަށާނެ ކަމަށް އުއްމީދު ކުރެވޭކަމަށް މިނިސްޓަރު ވިދާޅުވިއެވެ.

"މިހާރު އަޅުގަނޑުމެން އެބަ ގަސްތުކުރަން. މާލޭގައި، މިހާރު އެކަމުގެ އެކްސްޕެރިމެންޓްވެސް ހެދިއްޖެ. އާދެ ޑްރޯން ބޭނުންކޮށްގެން އުސް އިމާރާތްތަކުގެ އަލިފާން ނިއްވުމުގެ މަސައްކަތް ކުރަން. އަޅުގަނޑު ގަބޫލުކުރާ ގޮތައި މި އަހަރު ނިމުމުގެ ކުރިން ނޫނީ އަންނަ އަހަރުގެ ކުރީކޮޅުގައި އެ މަސައްކަތް ފެށޭވަރުވާނެކަމަށް އަޅުގަނޑު ގަބޫލުކުރަނީ." ހަސަން ރަޝީދު ވިދާޅުވިއެވެ.

މިނިސްޓަރު ވިދާޅުވީ މާލޭގައި އަލިފާނުގެ ހާދިސާތައް ގިނަވަނީ ދިރިއުޅުމުގެ ހާލަތު ހުރިގޮތުން ކުދި ތަންތަނުގައި މީހުން ތޮއްޖެހިގެން ދިރިއުޅެން ޖެހުމުން ކަމަށެވެ. މީގެއިތުރުން، އެއްވެސް އުސޫލެއް ނެތި ނުރައްކާތެރިކޮށް ކަރަންޓު ވައިރުކުރުމުގެ ސަބަބުން ޝޯޓް ސާކިޓް ވެގެން ހިނގާ ހާދިސާތައް ގިނަކަމަށް ހަސަން ރަޝީދު ވިދާޅުވިއެވެ.

މަގުމަތީގައި ފަޔާ ހައިޑްރަންޓްތައް ހުރި ނަމަވެސް، ވެހިކަލްތައް ޕާކުކޮށްފައި ހުރުމާއި ގޯޅިތައް ހަނިވުމަކީ އަލިފާން ނިއްވާ ލޮރީތަކަށް ދިމާވާ ބޮޑު ހުރަހެއްކަމަށް މިނިސްޓަރު ވިދާޅުވިއެވެ.

ނަމަވެސް، ޗައިނާ ސަރުކާރުގެ އެހީގައި މާލޭގެ މަގުތައް އަލުން ހެދުމަށް ރޭވިފައިވާ ބޮޑު މަޝްރޫއޫއެކު މި މައްސަލައަށް ދާއިމީ ހައްލެއް ލިބިގެންދާނެކަމަށް ހަސަން ރަޝީދު ވިދާޅުވިއެވެ. މީގެއިތުރުން، ގޭސް ލީކުވެގެން ހިނގާ ނުރައްކާތައް ކުޑަކުރުމަށްޓަކައި، ބާޒާރުގައި ވިއްކާ ގޭސް ރެގިއުލޭޓަރުތަކަށް ވަކި ހާއްސަ މިންގަނޑެއް ކަނޑައަޅައި، ފެންވަރު ދަށް ތަކެތި ވިއްކުން ހުއްޓުވުމަށް މަސައްކަތް ކުރަމުންދާކަމަށް މިނިސްޓަރު ވިދާޅުވިއެވެ.

އަދި، ގޭސް ވިއްކާ ކުންފުނިތަކާ ގުޅިގެން ރައްކާތެރިކަމުގެ ފިޔަވަޅުތައް އެޅުމާއި ރައްޔިތުން ހޭލުންތެރިކުރުމުގެ ޕްރޮގްރާމްތައް ކުރިއަށްދާކަމަށްވެސް ވިދާޅުވިއެވެ.