އަމީނީ މަގުގެ ތިންވަނަ ސެގްމަންޓު މަރާމާތުކުރުމުގެ މަސައްކަތް ފަށައިފި

އަމީނީ މަގުގެ ތިންވަނަ ސެގްމަންޓު މަރާމާތުކުރުމުގެ މަސައްކަތް ފަށައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މިއަދު ބުނި ގޮތުގައި އެ މަސައްކަތުގެ ދަށުން ތާރު ނެގުމުގެ މަސައްކަތް މިހާރު ވަނީ ފަށައިފައެވެ.

އިއްޒުއްދީން ހިނގުމުން ފެށިގެން ކޯރުކެނޑި ހިނގުމާ ހަމައަށް ހިމެނޭ ސެގްމަންޓް 3 ގައި 1،924.77 އަކަމީޓަރުގެ ސަރަހައްދެއްގެ ތާރު ނަގައި، އަލުން އޭބީސީއާއި ތާރުއެޅުމަށް ވަނީ ހަމަޖެހިފައެވެ.

ސެގްމަންޓް 3 ގެ މަސައްކަތަށްފަހު ކޯރުކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ ދަށުން 1،148.91 އަކަމީޓަރުގެ ސަރަހައްދެއްގައި ވެސް ހަމަ މިފަދައިން ތާރު ނެގުމަށްފަހު އަލުން ތާރުއަޅައި، މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށްގެންދިއުމަށް ހަމަޖެހިފައިވެއެވެ.

މަގުގެ އުމްރާނީ ތަރައްގީއާ ގުޅޭގޮތުން އެމްޓީސީސީން ބުނި ގޮތުގައި، މި މަޝްރޫއުގެ ސަބަބުން މާލޭގައި ދިރިއުޅޭ ރައްޔިތުންނަށް ދަތުރުފަތުރުކުރުމުގައި މިހާރަށް ވުރެ ބޮޑަށް ލުއިފަސޭހަވެގެންދާނެއެވެ. އަދި އަމީނީ މަގު ޒަމާނީ ފެންވަރަށް ތަރައްގީކުރެވިގެން ދިއުމަކީ، މާލެއަކީ އެއްތަނުން އަނެއްތަނަށް ފަސޭހައިން ދަތުރުކުރެވޭ ގޮތަށް ގުޅިފައިވާ، އަދި އާންމުންނަށް ފަސޭހައިން ބޭނުންކުރެވޭނެ ފަދަ ސިޓީއަކަށް ހެދުމަށް މަގުފަހިކޮށްދޭނެ ކަމެއް ކަމަށް ވެސް އެ ކުންފުނިން ފާހަގަކުރިއެވެ.

އަމީނީ މަގުގެ ތާރުގަނޑު ހަލާކުވެގެން އެ މަގު ޒަމާނީ ފެންވަރަކަށް އަލުން މަރާމާތުކުރުމުގެ މަސައްކަތް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ ތެރޭގައެވެ. އެ މަޝްރޫއުގެ ދަށުން އެމްޓީސީސީން ވަނީ ސެގްމަންޓް އެކެއް އަދި ދޭއްގެ މަސައްކަތް ނިންމައިފައެވެ. އެ މަސައްކަތަށްފަހު މަރާމާތު ކުރި ސަރަޙައްދު އާންމު ދަތުރުފަތުރަށް ރޭ ވަނީ ހުޅުވާލައިފައެވެ.