ރާއްޖޭގެ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ނައިބު ރައީސް، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް (ކައްޕި)އާއި އެކްސްކޯ މެމްބަރު ހައްވާ ރަޝީދާ އަދި އެފްއޭއެމްގެ މީޑިއާ އެންޑް ކޮމިއުނިކޭޝަން ކޮމިޓީގެ ޗެއާޕާސަން އަބްދުﷲ އަޒްމީން، ދެކުނު އޭޝިއާ ފުޓުބޯޅައިގެ މައި އިދާރާ، ސާފްގެ ސްޓޭންޑިން ކޮމިޓީތަކަށް އިންތިހާބު ވެއްޖެއެވެ.

ނިއު ރޭޑިއަންޓް ސްޕޯޓްސް ކްލަބުގެ ސީނިއާ ވައިސް ޗެއާމަންގެ މަގާމުވެސް އަދާކުރަމުންދާ ކައްޕި އިންތިހާބުވެވަޑައިގެންފައި ވަނީ ސާފްގެ މުބާރާތްތަކާ ބެހޭ ކޮމިޓީ، ސާފް ކޮމްޕެޓިޝަން ކޮމިޓީގެ މެމްބަރު ކަމަށެވެ.

ކުރީގެ މަޝްހޫރު ކުޅިވަރު ނޫސްވެރިޔާ އަދި ކޮމެންޓޭޓަރު އަޒްމީން، ސާފްގެ މާކެޓިން އެންޑް ކޮމިއުނިކޭޝަންސް ކޮމިޓީގެ މެމްބަރަކަށް އިންތިހާބުވެވަޑައިގެންފައިވާ އިރު، އޭނާއަކީ ކްލަބު ވެލެންސިއާގެ ޗެއާމަނެވެ. އަޒްމީންއަކީ މަގުބޫލު ފުޓުބޯޅަ ލިޔުންތެރިއެއްގެ އިތުރުން ފުޓުބޯޅަ ދިރާސާވެސް ކުރައްވާ ފަރާތެކެވެ.

އެފްއޭއެމްގެ އެކްސްކޯގައި ހިމެނޭ ހައްވާ ރަޝީދާ، ސާފް ވިމަންސް އެޑް ހޮކް ކޮމިޓީގެ މެމްބަރު ކަމަށް އިންތިހާބުވެވަޑައިގެންފައިވާ އިރު، އޭނާއަކީ އަންހެން ފުޓުބޯޅައިގެ ހިންގުމުގައި ހަރަކާތްތެރިވަމުންދާ ފަރާތެކެވެ.

ރާއްޖޭގެ ފުޓުބޯޅަ އިދާރާގެ އާ އެކްސްކޯއާއެކު ސަރަހައްދީ އަދި ދުނިޔޭގެ އެހެން ބައިނަލްއަގުވާމީ ޖަމިއްޔާތަކާވެސް ގުޅުން ބަދަހިކުރުމަށް މަސައްކަތް ކުރަމުންދާ އިރު، މީގެ ކުރިން އޮތް ބައްސާމް އަދީލް ޖަލީލްގެ ލީޑާޝިޕްގައި ސާފާއި ރާއްޖެއާ ދެމެދުވެސް އޮތީ މައްސަލަތަކެއް ދިމާވެފައެވެ. އެގޮތުން ފައިސާގެ މައްސަލަތައްވެސް އޭރު އޮތް އިރު، ރާއްޖޭން މިހާރު ދަނީ ބައިނަލްއަގުވާމީ އިދާރާތަކާ ގުޅުން ރަނގަޅު ކުރަމުންނެވެ.