މެލޭޝިއާގައި ހިނގި އެކްސިޑެންޓެއްގައި ދިވެހި ދަރިވަރަކު މިއަދު މަރުވެއްޖެއެވެ.

އެކަމާ ގުޅޭގޮތުން "ވަން" އަށް މައުލޫމާތުދެއްވަމުން ސަރުކާރުގެ އިސް ތަރުޖަމާނު މުހައްމަދު ހުސެއިން ޝަރީފު (މުންދު) މިރޭ ވިދާޅުވީ މެލޭޝިއާގައި ދެ ކާރު ޖެހިގެން ހިނގި ނުރައްކާތެރި އެކްސިޑެންޓެއްގައި މަރުވީ 22 އަހަރުގެ ދިވެހި އަންހެން ދަރިވަރެއް ކަމަށެވެ. މެލޭޝިއާގެ ޓެއިލާ ޔުނިވާސިޓީގައި ތައުލީމު ހާސިލުކުރަމުންދާ އެ ދަރިވަރަކީ އައްޑޫ ސިޓީ ހިތަދުއަށް ނިސްބަތްވާ ދަރިވަރެކެވެ.

އެ އެކްސިޑެންޓު ހިނގި އުޅަނދުގައި އިތުރު ދިވެހި ފިރިހެން ދަރިވަރަކު ވެސް ދަތުރުކުރި ކަމަށާއި އޭނާއަށް އަނިޔާތަކެއްވީ ނަމަވެސް، ހާލު ސީރިއަސް ނޫން ކަމަށެވެ. އެ ހާދިސާއާ ގުޅިގެން މެލޭޝިއާގައި ހުންނަ ދިވެހި އެމްބަސީން ހަރަކާތްތެރިވަމުން އަންނަ އިރު، ދަރިވަރުންގެ އާއިލާއާ ވާހަކަދައްކަމުން އަންނަ ކަމަށް މުންދު ވިދާޅުވިއެވެ.

މެލޭޝިއާ އަކީ ގިނަ އަދަދެއްގެ ދިވެހިން ތައުލީމު ހާސިލުކުރަމަށް ދަތުރުކުރާ ގައުމެކެވެ.