ފިޝަރީޒް، އެގްރިކަލްޗާ އެންޑް އޯޝަން ރިސޯސަސް މިނިސްޓްރީއާއި ކަމާގުޅޭ އިދާރާތައް ގުޅިގެން ހިންގާ ގައުމީ ފެންވަރުގެ މަޝްރޫއު "ޕްރޮޖެކްޓް ބައޯކަލޯ" މިއަދު ހުޅުމާލޭގައި އިފްތިތާހުކޮށްފިއެވެ.

"ޕްރޮޖެކްޓް ބައޯކަލޯ" އަކީ މަގުމަތީގައި އުޅޭ ބުޅަލުގެ އާބާދީ އިތުރުވަމުންދާ މައްސަލައަށް ހައްލެއް ހޯދުމަށާއި، އާންމު ސަރަހައްދުތަކުގެ ސާފުތާހިރުކަން ދެމެހެއްޓުމަށް ފެށި މަސައްކަތެކެވެ.

ދިވެހި ކާބަފައިންގެ ވާހަކަތަކުގައި ބިރުވެރިކަމާ ގުޅުވައިގެން ބޭނުންކުރާ "ބައޯކަލޯ" މި ނަމަށް، މި މަޝްރޫއުގެ ތެރެއިން ވަނީ އާ މާނައެއް ދީފައެވެ. އެއީ އޯގާތެރިކަމާއި، ޒިންމާދާރުކަމާއި، ރައްކާތެރިކަމުގެ އިތުރުން މުޖުތަމައަށް ފައިދާހުރި ހަރަކާތެއްގެ ރަމްޒެއްގެ ގޮތުގައެވެ.

ފިޝަރީޒް، އެގްރިކަލްޗާ އެންޑް އޯޝަން ރިސޯސަސް މިނިސްޓްރީން މިއަދު ބުނި ގޮތުގައި މި މަޝްރޫއު ބިނާކޮށްފައިވަނީ މައިގަނޑު ހަ އަސާސެއްގެ މައްޗަށެވެ. އެއީ ކޮންޓްރޯލްކުރުމާއި، އަޅާލުމާއި، ސާފުތާހިރުކަމާއި، އެކުގައި އުޅުމާއި (ކޯ-އެގްޒިސްޓް)، އޯގާތެރިކަމުގެ އިތުރުން ގާބިލުކަން (ކެޕޭސިޓީ) އިތުރުކުރުމެވެ.

މި މަޝްރޫއުގެ ފުރަތަމަ މަރުހަލާ ޕައިލެޓް ޕްރޮޖެކްޓެއްގެ ގޮތުގައި ހުޅުމާލޭގައި ކުރިއަށްގެންދާ އިރު، މީގެ މައިގަނޑު މަގުސަދަކީ މުޅި ރާއްޖެއަށް ފުޅާކުރެވޭނެ ފަދަ ނަމޫނާ ނިޒާމެއް ބިނާކުރުމެވެ. މި ޕައިލެޓް މަޝްރޫއުގެ ދަށުން، "ޓްރެޕް-ނިއުޓާ-ރިޓާން" (ޓީއެންއާރު) ޕްރޮގްރާމެއް މެދުވެރިކޮށް ބުޅާ ދަރިމައިވުން ހުއްޓުވުމުގެ މަސައްކަތް ކުރިއަށްދާނެއެވެ. މީގެ އިތުރުން، ވެޓެރިނަރީ ފަރުވާ ދިނުމާއި، ޒިންމާދާރުކަމާއެކު ކާނާ ދިނުމާއި، ބުޅާ އެޑޮޕްޓްކުރުމަށް ބާރުއެޅުމުގެ ހަރަކާތްތައްވެސް ހިމެނެއެވެ.

މިނިސްޓްރީން ބުނީ މިއީ ރައީސް ޑރ. މުހައްމަދު މުއިއްޒުގެ ސަރުކާރުން ޖަނަވާރުންގެ ހިމާޔަތަށް ދޭ ހާއްސަ އަހަންމިއްޔަތުގެ ދަށުން ކުރިއަށްގެންދާ މަސައްކަތެއް ކަމަށާއި ރައީސްގެ 2024 ވަނަ އަހަރުގެ ރިޔާސީ ބަޔާނުގައި މަގުމަތީގައި އުޅޭ ޖަނަވާރުންގެ މައްސަލަތަކަށް ދާއިމީ ހައްލެއް ހޯދުމުގެ މުހިންމުކަން ފާހަގަކުރައްވާފައިވާ ކަމަށެވެ.

މި މަގުސަދު ހާސިލުކުރުމަށްޓަކައި، 2025 ވަނަ އަހަރުގެ ނޮވެމްބަރު މަހު ރައްޔިތުންގެ މަޖިލީހުން ފާސްކުރި "ޖަނަވާރުންގެ ހިމާޔަތާއި ރައްކާތެރިކަމުގެ ބިލު"، 3 ޑިސެމްބަރު 2025 ގައި ރައީސް ވަނީ ތަސްދީގުކުރައްވައިފައެވެ. ގާނޫނު ނަންބަރު 23/2025 ގެ ދަށުން ޖަނަވާރުންގެ ވެލްފެއާއާ ގުޅޭ ގައުމީ އޮނިގަނޑެއް މިހާރު ވަނީ އެކުލަވާލައިފައެވެ.

މި މަޝްރޫއުގައި ފިޝަރީޒް މިނިސްޓްރީގެ އިތުރުން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)، އަމިއްލަ ޖަމިއްޔާތައް، ވެޓެރިނަރީ ކްލިނިކްތައް، އެނިމަލް ޝެލްޓާތައް، ސްކައުޓް އަދި ގާލް ގައިޑްގެ އިތުރުން ޕީއެސްއެމް ހިމެނެއެވެ. ކުރިއަށް އޮތް އަހަރުގެ ތެރޭގައި ޓީއެންއާރު ޕްރޮގްރާމްތަކާއި، "ކެޓް ސޭފް ޕާކް"ތައް ގާއިމުކުރުމާއި، ކުޑަކުދިންނާއި ޒުވާނުންނަށް ހާއްސަ ހަރަކާތްތައް ހިންގުމަށް ވަނީ ރޭވިފައެވެ.

މި މަޝްރޫއުގެ ކާމިޔާބީތަކާއި ދަސްވި ފިލާވަޅުތައް ދައްކާލުމަށްޓަކައި 4 އޮކްޓޯބަރު 2027 ގައި ދުނިޔޭގެ ޖަނަވާރުންގެ ދުވަހާ ގުޅުވައިގެން ބޮޑު ހަރަކާތެއް ބޭއްވުމަށް ވެސް މިނިސްޓްރީން ވަނީ އަމާޒު ހިފައިފައެވެ.