ކެނަބިސް އާއި ޑައިމޯފިން ޓްރެފިކް ކުރި މީހަކަށް އުމުރު ދުވަހަށް ޖަލަށް ލުމުގެ ދެ ހުކުމާއި 100،000 ރުފިޔާއިން ޖޫރިމަނާ ކުރުމުގެ ދެ ހުކުމް ކުރިމިނަލް ކޯޓުން ކޮށްފިއެވެ.

މި މައްސަލައިގައި ހުކުމް ކުރީ، ނ. ނޫމަރާ ހަވީރީގެ އަބްދުﷲ ފަލީހްގެ މައްޗަށެވެ.

އޭނާގެ މައްޗަށް ދައުލަތުން ދެ ދައުވާއެއް ކުރިއެވެ. އެއީ ކެނަބިސް ޓްރެފިކް ކުރުމުގެ ދައުވާ އާއި ޑައިމޯފިން ޓްރެފިކް ކުރުމުގެ ދައުވާއެވެ.

އޭނާގެ މައްޗަށް މި ދެ ދައުވާ ކުރީ، އޭނާ އިންޓަނޭޝަނަލް އެއާޕޯޓުން ގދ. ކޫއްޑުއަށް ފުރަން ގޮސް ޑިޕާޗާ ހޯލަށް ވަންނަން ވޯކްތުރޫއަށް ވަތް ވަގުތު ބީޕް ވުމުން އޭވިއެޝަން ސެކިއުރިޓީ އޮފިސަރުން އޭނާ ފިޒިކަލް ސާޗް ރޫމަށް ވެއްދުމުން މަސްތުވާތަކެތި ހުންނާނެ ކަމަށް ބުނެގެން ޗެކް ކުރިއިރު މަސްތުވާތަކެތި ފެނިގެންނެވެ.

އެގޮތަށް ފުލުހުން މީނާގެ ހަށިގަނޑު ބަލައި ފާސްކުރި އިރު، އޭނާ ލައިގެން ހުރި ޖިންސްގެ ދަށުން ލައިގެން ހުރި ސޯޓާއި ކަނާތް ފަރާތު ފައިގެ ފަލަމަސްގަނޑާއި ވާތް ފަރާތު ފައިގެ ފަލަމަސްގަނޑާއި އޭނާ ލައިގެން ހުރި ސޯޓާއެކު އަޅާފައި އިން ޑަކްޓޭޕްގަނޑު ދަށުން ނެގި ފިލްމު ހުސްކުރި ދަޅުތަކާއި ރަބަރު ޕެކެޓްތަކުގައި ޑްރަގު ހުއްޓެވެ.

އޭގެ ތެެރެއިން ފިލްމު ހުސްކުރި ދަޅުތަކުގައި ހުރީ ކެނެބިސްއެވެ. ރަބަރު ޕެކެޓުތަކުން ފެނުނީ ޑައިމޯފިންއެވެ.

އެ ދެ މައްސަލަ އޭނާގެ މައްޗަށް ވަނީ ސާބިތުވެފައެވެ.

އެހެންކަމުން ކެނަބިސް ޓްރެފިކް ކޮށްގެން އުމުރު ދުވަހަށް ޖަލަށް ކުމާއެކު 100،000 ރުފިޔާއިން ޖޫރިމަނާކޮށް 12 މަސް ދުވަހުގެ ތެރެގައި އެ ފައިސާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އަށް ދައްކަން ވަނީ ހުކުމް ކޮށްފައެވެ. އަދި ޑައިމޯފިން ޓްރެފިކް ކުރުމުގެ މައްސަލައިގައި ވެސް ހަމަ އެގޮތަށް އުމުރަށް ޖަލަށް ލުމާއެކު 100،000 ރުފިޔާއިން ޖޫރިމަނާކޮށް 12 މަސް ދުވަހުގެ ތެރެގައި އެ ފައިސާ މީރާ އަށް ދައްކަން ވަނީ ހުކުމް ކޮށްފައެވެ.