ކޮންމެ ދިވެއްސަކަށް ފައިދާ ބަހާ ގޮތަށް ސަރުކާރުން 10 ރިސޯޓު ހެދުމަކީ އަނެއްކާ ވެސް ރާއްޖޭގެ ޓޫރިޒަމަށް އަންނާނެ ބޮޑު ބަދަލެއް ކަމަށް ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު) ވިދާޅުވެއްޖެއެވެ.

ރާއްޖޭގެ ޓޫރިޒަމް ދުވަސް ފާހަގަކުރުމަށް ރޭ ބޭއްވި ރަސްމިއްޔާތުގައި އަފީފު ވިދާޅުވީ، ސަރުކާރުން އިއުލާން ކޮށްފައިވާ ގޮތަށް 10 ރިސޯޓު ހަދައި، އޭގެ ފައިދާ ދިވެހިންނަށް ބެހުމަކީ އެ ދާއިރާއަށް އަނެއްކާ ވެސް ބޮޑު ބަދަލެއް ފެންނާނެ ކަމެއް ކަމަށެވެ.

އޭނާ ވިދާޅުވީ އެ މަޝްރޫއުގެ ސަބަބުން ޓޫރިޒަމް ކުރިއަރުވައި ތަރައްގީ ކުރުމުގައި ހުރިހާ ދިވެހީންގެ ބައިވެރިވުން ހިމެނިގެންދާނެ ކަމަށެވެ.

"މިއީ އަޅުގަނޑުމެން ވަރަށް އުންމީދުކުރާ ކަމެއް. މި މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުންމީދު ކުރަން،" އަފީފު ވިދާޅުވިއެވެ.

މިދިޔަ ފެބްރުއަރީ މަހު ރައްޔިތުންގެ މަޖިލިސް މި އަހަރަށް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު ވިދާޅުވީ ސަރުކާރުގެ ކުންފުންޏެއް މެދުވެރިކޮށް ކުރިޔަށް އޮތް ތިން އަހަރު ދުވަހުގެ ތެރޭގައި މަދުވެގެން ދިހަ ރިސޯޓު ތަރައްގީކޮށް އެ ރިސޯޓުތަކުން ލިބޭ ފައިދާގެ ބޮޑުބައެއް، ރާއްޖޭގެ ކޮންމެ ރައްޔިތެއްގެ ބޭންކް އެކައުންޓަށް ޖަމާކުރުމަށް ކަމަށެވެ.

"ރާއްޖޭގެ ކޮންމެ ރައްޔިތަކީ، މި މަޝްރޫއުގެ ދަށުން ތަރައްގީ ކުރެވޭ ހުރިހާ ރިސޯޓެއްގެ ހިއްސާދާރެއްކަމުގައި ހަމަހަމަ ކަމާއެކު، ގާނޫނަކުން ކަނޑައަޅާ ހަމަޖައްސަން. ނަތީޖާއެއްގެ ގޮތުން މި މަޝްރޫއު ދަށުން ތަރައްގީ ކުރާ ރިސޯޓުތަކުން ލިބޭ ފައިދާ ދިވެހި ރައްޔިތެއްކަމުގެ އައިޑީކާޑު އޮތް ކޮންމެ ރައްޔިތަކަށް ހަމަހަމަކަމާއެކު އަހަރުން އަހަރަށް ލިބި، ރާއްޖޭގެ ތާރީހުގައި ފުރަތަމަ ފަހަރަށް ދިވެހި ފަތުރުވެރިކަމުގެ ސީދާ ހިއްސާދާރަކަށް ދިވެހި ކޮންމެ ރައްޔިތަކުވެ، ދިވެހި ކޮންމެ ރައްޔިތަކަށް ސީދާ ގޮތުން މާލީ މަންފާ އިރާދަކުރެއްވިއްޔާ ޖަމާވާން ފަށާނެ،" ރައީސް ވިދާޅުވިއެވެ.

ރައީސް ވިދާޅުވީ، އަންދާޒާ ކުރެވެނީ މި އިންވެސްޓްމަންޓުން ރައްޔިތުންގެ އެކައުންޓަށް ފައިސާ ޖަމާވާން ފަށާނީ 2030 އަހަރުން ފެށިގެން ކަމަށާއި ހިސާބު ހަދާލާ އިރު، އެވްރެޖުކޮށް ކޮންމެ ރައްޔިތެއްގެ އެކައުންޓަށް، އަހަރަކު މަދުވެގެން، 400 އެމެރިކާ ޑޮލަރު ޖަމާވެގެންދާނެ ކަމަށެވެ.

"މިސާލަކަށް ފަސް މެންބަރުންގެ އާއިލާއެއްގައި ނަމަ، އެ އާއިލާގެ ކޮންމެ މެންބަރެއް، މަދުވެގެން ދިހަ ރިސޯޓުގެ ޝެއާ ހޯލްޑަރަކަށް ވުމުގެ އިތުރުން، އެ އާއިލާއަށް އަހަރަކު މަދުވެގެން އިރާދަކުރެއްވިއްޔާ 2000 އެމެރިކާ ޑޮލަރު ލިބިގެންދާނެ،" ރައީސް ވިދާޅުވިއެވެ.

ރައީސް އިތުރަށް ވިދާޅުވީ، އެކަންކަން ހަގީގަތަކަށް ހެދުމަށް ކުރަންޖެހޭ އެންމެހާ ކަންކަން ވަރަށް ހަލުވި ދުވެލީގައި ކުރިއަށް ގެންދަވާނެ ކަމަށެވެ.