އެމެޒޯން ޕްރައިމް ވީޑިއޯއިން ގެނެސްދިން ކާމިޔާބު ކްރައިމް ތްރިލާ ސީރީޒް "ފަރްޒީ"ގެ ދެވަނަ ސީޒަނުގެ އަންހެން ލީޑު ރޯލަށް ބަތަލާ ޔުކްތީ ތަރޭޖާ ހަމަޖައްސައިފިއެވެ. ވެރައިޓީ އިންޑިއާއަށް ދިން އިންޓަވިއުއެއްގައި ޔުކްތީ ވަނީ މިކަން ކަށަވަރުކޮށްދީފައެވެ.

ޔުކްތީ ބުނި ގޮތުގައި ފަރްޒީގެ ދެވަނަ ސީޒަނުގެ މައިގަނޑު އަންހެން ކެރެކްޓާއަކީ އޭނާއެވެ. އޭނާގެ ހުރިހާ މަންޒަރެއް ވެސް ނަގާފައިވަނީ ސީރީޒްގެ ލީޑު އެކްޓަރު ޝާހިދު ކަޕޫރާއެކު ކަމަށް އޭނާ ފާހަގަކުރިއެވެ. މީގެ އިތުރުން، އޭނާ ކުޅޭ ކެރެކްޓާއަކީ ނިޒާމާ ދެކޮޅަށް އަޑުއުފުލާ، ޖެހިލުންކުޑަ ޒުވާން އަންހެނެއްގެ ރޯލު ކަމަށާއި، އެއީ ވަރަށް ވަރުގަދަ ރޯލެއް ކަމަށް ޔުކްތީ ބުންޏެވެ.

ރާޖް ނިޑިމޯރޫ އަދި ކްރިޝްނާ ޑީކޭ (ރާޖް އެންޑް ޑީކޭ) ޑައިރެކްޓުކުރާ މި ސީރީޒްގެ ޝޫޓިން މިހާރު ވެސް ކުރިއަށްދާއިރު، ޔުކްތީ ބުނި ގޮތުގައި އޭނާގެ ބައިގެ 80 އިންސައްތަ މަންޒަރުތައް ވަނީ ނަގައި ނިމިފައެވެ. އަދި ބާކީ އޮތީ 20 އިންސައްތަ ކަމަށާއި، މި ސީރީޒް 2027 ވަނަ އަހަރުގެ މެދުތެރޭގައި ރިލީޒްކުރާނެ ކަމަށް ބެލެވޭ ކަމަށް ވެސް އޭނާ ބުންޏެވެ.

މީގެ އިތުރުން، ސީރީޒްގައި ފިރޯޒްގެ ރޯލު ކުޅޭ އެކްޓަރު ބުވަން އަރޯރާ ވެސް ވަނީ އޭނާގެ ގިނަ މަންޒަރުތައް ނަގައި ނިމިފައިވާ ކަމަށް ދާދި ފަހުން އިންޑިއާ ޓުޑޭއަށް ދިން އިންޓަވިއުއެއްގައި ވަނީ ބުނެފައެވެ.

ފުރަތަމަ ސީޒަނުގައި އަންހެން ލީޑު ރޯލުން ފެނިގެންދިޔައީ ރާޝީ ކަންނާ އެވެ. ނަމަވެސް ޔުކްތީއަށް މެއިން ލީޑު ލިބުމާއެކު، ރާޝީގެ ކެރެކްޓާއަށް ވާނެ ގޮތަކާމެދު މީޑިއާތަކުން ވަނީ ސުވާލު އުފައްދައިފައެވެ. ބައެއް ރިޕޯޓުތައް ބުނާ ގޮތުގައި ރާޝީގެ ކެރެކްޓާ ވެސް ދެވަނަ ސީޒަނުން ފެންނާނެއެވެ. ނަމަވެސް މިކަމާ ގުޅޭގޮތުން ޕްރޮޑަކްޝަން ޓީމުން އަދި ރަސްމީކޮށް ވަކި އެއްޗެއް ބުނެފައެއް ނުވެއެވެ.

ފަރްޒީގެ ފުރަތަމަ ސީޒަނަކީ އިންޑިއާގެ އޯޓީޓީ ޕްލެޓްފޯމްތަކުގައި ބޮޑު ކާމިޔާބީއެއް ހޯދި ސީރީޒެކެވެ. އެ ސީޒަން ނިމިގެންދިޔައީ ޝާހިދު ކުޅޭ ސަނީގެ ކެރެކްޓާއާއި ފިރޯޒް، ސްޕެޝަލް ޓާސްކް ފޯސްގެ އޮފިސަރު މައިކަލް ވެދަނަޔަގަމް (ވިޖޭ ސޭތުޕަތީ) އަދި ކުށްވެރިންގެ ލީޑަރު މަންސޫރު ދަލާލް (ކޭކޭ މެނަން) ގެ ކިބައިން ސަލާމަތްވެގެން ފިލާ މަންޒަރުންނެވެ. ދެވަނަ ސީޒަނުގައި ފެނިގެންދާނީ އެ މީހުންގެ ވަގު ނޫޓު ޗާޕުކުރުމުގެ މަސައްކަތް ކުރިއަށްގެންދާ ގޮތެވެ.