މާލޭގެ މަގުތައް ހެދުމުގެ މަޝްރޫއުގެ ދަށުން، އަމީނީ މަގުގެ ސެގްމަންޓް 1 އަދި 2 ގެ މަސައްކަތް ނިންމައި، އެ ސަރަހައްދު މިއަދު އާންމު ދަތުރުފަތުރަށް މިރޭ ހުޅުވާލައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން މިރޭ ނެރުނު ނޫސްބަޔާނެއްގައި ބުނި ގޮތުގައި، ސެގްމަންޓް 1 ގެ ދަށުން 2،794.062 އަކަމީޓަރުގެ ސަރަހައްދެއްގައި ކުރިން އަޅާފައިވާ އެގްރިގޭޓް ބޭސް ކޯސް (އޭބީސީ) އާއި ތާރު ވަނީ ނަގައިފައެވެ. އޭގެ ފަހުން އެ ސަރަހައްދުގައި ސަބްގްރޭޑާއި، ސަބްބޭސް އަދި އޭބީސީގެ އިތުރުން ތާރުއަޅައި، މަގުމަތީގެ ނިޝާންތައް ކުރެހުމުގެ މަސައްކަތް ވަނީ ނިންމައިފައެވެ.

މީގެ އިތުރުން، ސެގްމަންޓް 2 ގެ ދަށުން 133.64 އަކަމީޓަރުގެ ސަރަހައްދެއްގެ ތާރު ނެގުމަށްފަހު، އަލުން އޭބީސީ އަޅައި ތާރުއެޅުމުގެ މަސައްކަތް ވެސް ވަނީ ފުރިހަމަކޮށްފައެވެ. މި ދެ ސެގްމަންޓް ހުޅުވާލުމާއެކު، މަގު ބޭނުންކުރުމުގައި ކުރިން ހުރި ދަތިތައް ހައްލުވެ، އާންމުންނަށް ބޮޑު ލުއިފަސޭހަތަކެއް ލިބޭނެ ކަމަށް އެ ކުންފުނިން ދެކެއެވެ.

3 އޮކްޓޯބަރު 2026، މާލޭގެ މަގުތައް ހެދުމުގެ މަޝްރޫއުގެ ދަށުން، އަމީނީ މަގުގެ ސެގްމަންޓް 1 އަދި 2 ގެ މަސައްކަތް ނިންމައި، އެ ސަރަހައްދު އާންމު ދަތުރުފަތުރަށް ހުޅުވާލުން -- ފޮޓޯ/ އެމްޓީސީސީ

މި މަޝްރޫއުގެ ދަށުން ދެން ކުރިއަށްދާނީ ސެގްމަންޓް 3 އަދި 4 ގެ މަސައްކަތެވެ. އެމްޓީސީސީން ބުނި ގޮތުގައި، އިއްޒުއްދީން ހިނގުމުން ފެށިގެން ކޯރުކެނޑި ހިނގުމާ ހަމައަށް ހިމެނޭ ސެގްމަންޓް 3 ގައި 1،924.77 އަކަމީޓަރުގެ ސަރަހައްދެއްގެ ތާރު ނަގައި، އަލުން އޭބީސީއާއި ތާރުއެޅުމަށް ވަނީ ހަމަޖެހިފައެވެ. އަދި ކޯރުކެނޑި ހިނގުމުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށް ހިމެނޭ ސެގްމަންޓް 4 ގެ ދަށުން 1،148.91 އަކަމީޓަރުގެ ސަރަހައްދެއްގައި ވެސް ހަމަ މިފަދައިން ތާރު ނެގުމަށްފަހު އަލުން ތާރުއަޅައި، މަގުމަތީގެ ނިޝާންތައް ކުރެހުމުގެ މަސައްކަތް ކުރިއަށް ގެންދާނެއެވެ.

އަމީނީ މަގުގެ ތާރުގަނޑު ހަލާކުވެގެން އެ މަގު ޒަމާނީ ފެންވަރަކަށް އަލުން މަރާމާތުކުރުމުގެ މަސައްކަތް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ ތެރޭގައެވެ.