މާލެ ސިޓީ ކައުންސިލްގެ ބަޖެޓުން މިދިޔަ ދެ މަސް ދުވަހުގެ ތެރޭގައި 50 މިލިއަން ރުފިޔާ ކަނޑާލައިފައިވާ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެއެވެ.

އެމްޑީޕީގެ ކޮންގްރެސްގެ ނިންމުމުހެ ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ، އެ 50 މިލިއަނަކީ ކުރީގެ މޭޔަރަށް ބަރާބަރަށް ދެމުން އައި 50 މިލިއަން ކަމަށެވެ.

އާޒިމް ވިދާޅުވީ، ބަޖެޓުން ކައުންސިލްތަކަށް ދިން ފަސް ޕަސަންޓުން މާލެ ސިޓީގެ ބޮޑެތި މައްސަލަތައް މާލެ ސިޓީ ކައުންސިލުން ހައްލުކޮށްފައިވާ ކަމަށެވެ.

އޭގެ ތަފްސީލް ދެއްވަމުން އާޒިމް ވިދާޅުވީ، މިސްކިތްތަކުގެ އާބާދުރަ ފިލުވައި، ފެންބޮޑުވުމުގެ މައްސަލަ ހައްލުކޮށްފައިވާ ކަމަށެވެ.

މީގެ އިތުރުން، ކައުންސިލުގެ ހަރަދުން މަހެއްގެ މައްޗަށް 350،000ރ ސަލާމަތްކޮށްފައިވާ ކަމަށްވެސް އާޒިމް ވިދާޅުވިއެވެ.

"މީ މި ޕަސް ޕަސަންޓު ރަނގަޅަށް ހަރަދުކޮށްފިއްޔާ ރަނގަޅަށް ކަންކަން ކުރެވިދާނެކަމުގެ ނަތީޖާ" އާޒިމް ވިދާޅުވިއެވެ.

އާޒިމް އިތުރަށް ވިދާޅުވީ، އެސްއޯއީތައް މިއަދު ހަލާކުކޮށްލާފައިވާ ކަމަށާއި ތަންތަން ރަނގަޅުކުރެވޭނީ އެތަންތަނަށް ގާބިލު ކަންކަން ކުރަން އެނގޭ މީހުން ލައިގެން ކަމަށެވެ.