ފައްޔާޒްގެ ހުށަހެޅުންތައް ގަނޑުކޮށް ފާސްކުރަން އުޅޭތީ ކަންބޮޑުވުން

އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއީލް، އެ ޕާޓީގެ އަސާސީ ގަވާއިދަށް ހުށަހަޅުއްވާފައި އިސްލާހުތައް ގަނޑުކޮށް ފާސްކުރަން އުޅޭ ކަމަށްބުނެ ކަންބޮޑުވުން ފާޅުކޮށްފިއެވެ.

މާލޭ ސިޓީ ކައުންސިލުގެ ހޯލުގައި ކުރިއަށްދާ އެމްޑީޕީގެ ކޮންގްރެސްއަށް ފައްޔާޒް ވަނީ ގިނަ އިސްލާހުތަކެއް ހުށަހަޅުއްވައިފައެވެ. އޭގެ ތެރޭގައި ލީޑާޝިޕަށް ގެންނަ ބަދަލުތަކާއި އިތުރު ޗެއާޕާސަންގެ ނައިބެއް ހަމަޖެއްސުމާއި ކޮންގްރެސް އެކުލެވިގެންވާ ގޮތަށް ބަދަލު ގެނައުމާއި ގައުމީ މަޖިލީހަށް މެންބަރުން އިތުރުކުރުމާއި ރިޔާސީ ކެންޑިޑޭޓު ތަބާވާން ޖެހޭ އުސޫލުތަކެއް ކަނޑައެޅުން ފަދަ އިސްލާހުތަކެއް ހިމެނެއެވެ.

ފައްޔާޒްގެ ހުށަހެޅުއްވުންތަކަށް ތާއީދުކުރެއްވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ ކުރީގެ މެންބަރު އީވާ އަބްދުﷲ އެވެ. ފައްޔާޒްގެ އެ ހުށަހެޅުއްވުމަށް ޖުމުލަގޮތެއްގައި ގިނަ މެންބަރުން ތާއީދުކުރި ނަމަވެސް، ބައެއް އިސްލާހުތަކަށް ތާއީދުނުކުރާކަން ބައެއް މެންބަރުން ވަނީ ފާހަގަކޮށްފައެވެ. އެގޮތުން ބައެއް މެންބަރުން ތާއީދުކޮށްފައިނުވަނީ، އާބީދީއަށް ބަލާފައި ރަށްރަށުން ގައުމީ މަޖިލީހަށް މެންބަރުން އިތުރުކުރުމުގެ އިސްލާހާއި، މަގާމުތައް އުވާލައި ހުރިހާ ބާރެއް ޗެއާޕާސަނަށް ދިނުމުގެ އިސްލާހަށެވެ.

ފައްޔާޒްގެ އިތުރުން ދެން ހުށަހެޅުންތައް ހުށަހަޅުއްވާފައިވަނީ އެމްޑީޕީގެ ޕާލިމަންޓަރީ ގްރޫޕުގެ ލީޑަރު، ހިތަދޫ ދެކުނު ދާއިރާގެ މަޖިލިސް މެންބަރު އިބްރާހިމް ނާޒިލް އާއި އެމްޑީޕީގެ ކުޑަހުވަދޫ ދާއިރާގެ ރައީސް ޝާތިރު އަބްދުއްރަހުމާނެވެ.

ނާޒިލް ހުށަހެޅުއްވީ އިންތިހާބުގައި ވޯޓުލެވޭނީ، ވޯޓުލާ ދުވަސްކަމަށް ކަނޑައަޅާ ދުވަހުގެ ތިން މަސް ދުވަސްކުރިން ޕާޓީގެ މެންބަރުންގެ ގޮތުގައި ތިބި މެންބަރުންނަށް ހެދުމަށް އަދި އިންތިހާބު ބާއްވާ ދުވަހުގެ ހަތަރު މަސް ދުވަސްކުރިން އިންތިހާބުތަކަށް އިއުލާންކުރުމަށެވެ. އެ އިސްލާހުތަކަށް ފައްޔާޒް ވެސް ވަނީ ތާއީދުކުރައްވައިފައެވެ.

ޝާތިރު ވަނީ އަސާސީ ގަވާއިދަށް ފަސް އިސްލާހެއް ހުށަހަޅައިފައެވެ. ޝާތިރު ހުށަހެޅި އިސްލާހުތަކުގެ ތެރޭގައި ގޮފިތައް އުވާލުމާއި، ކޮންގްރެސްގައި ބައިވެރިންގެ ނަންތައް ދިހަ ދުވަސްކުރިން އިއުލާންކުރުމާއި އިންތިހާބަކާ ނުލައި ގައުމީ މަޖިލީހަށް އައްޔަންކުރާ މެންބަރުންނަށް އިތުބާރު ނެތް ކަމުގެ މައްސަލަތަކުގައި ވޯޓުނުލެވޭ ގޮތަށް ހެދުމާއި މުހިންމު ކޮމިޓީތަކެއް އައްޔަންކުރުމުގެ ބާރު ޗެއާޕާސަންގެ އަތުން ނަގައި ގައުމީ މަޖިލީހަށް ދިނުން ފާހަގަކޮށްލެވެއެވެ. އޭގެ އިތުރުން މިހާރު ވެސް އޮންނަ ގޮތަށް ގައުމީ މަޖިލީހަށް ކޮންމެ ރަށަކުން ވެސް އެއް މެންބަރު އިންތިހާބުކުރަން ޖެހޭ ގޮތަށް ބޭއްވުމަށް ހުށަހެޅުއްވިއެވެ.

މިއަދު ހެނދުނުގެ ސެޝަންގައި ބައެއް މެންބަރުން ވަނީ، ފައްޔާޒްގެ އެ ހުށަހެޅުއްވުންތައް ގަނޑުކޮށް ފާސްކުރަން އުޅޭ ކަމަށް ތުހުމަތުކޮށް އެކަމުގެ ކަންބޮޑުވުން ފާޅުކޮށްފައެވެ. އެގޮތުން ބައެއް މެންބަރުން ތުހުމަތުކުރާ ގޮތުގައި އެއީ އެމްޑީޕީއާ ބީރައްޓެހި، ހުދުމުހުތާރު ކަމެކެވެ. އަދި ބައެއް އިސްލާހުތަކަކީ އިތުރަށް ވިސްނާލަންޖެހޭ އިސްލާހުތަކެއްކަން ވެސް ބައެއް މެންބަރުން ފާހަގަކުރިއެވެ.

އެ ވާހަކަތަކަށް ރައްދުދެއްވަމުން ފައްޔާޒް ވިދާޅުވީ އޭނާ އިސްލާހުތައް ހުށަހެޅުއްވީ ޕާޓީން ކުރި އިއުލާނަކަށް މުޅި އަސާސީ ގަވާއިދަށް ގެންނަން ފެންނަ އިސްލާހުތަކަށް ކަމަށާއި މުއްދަތު ހަމަވި ފަހުން ޕާޓީން ދެން ހުޅުވާލީ އެ އިސްލާހުތަކަށް އިތުރު އިސްލާހު ހުށަހެޅުމަށް ކަމަށެވެ. އަދި ވަކިވަކި މާއްދާތަކަށް ކޮންގްރެސްގެ ތެރެއިން އިސްލާހު ހުށަހަޅައި ވޯޓަށް އެހުމަކީ އުނދަގޫ ކަމެއްކަން މީގެ ކުރިން ބޭއްވި ކޮންގްރެސްތަކުގެ ތެރެއިން ވެސް ފާހަގަވެފައިވާނެ ކަމަށް އޭނާ ވިދާޅުވިއެވެ.

ފައްޔާޒްގެ އިސްލާހުތަކުގެ ތެރެއިން ލީޑާޝިޕަށް ގެންނަ އެންމެ ބޮޑު ބަދަލެއްގެ ގޮތުގައި ފާހަގަކޮށްލެވެނީ ޕާޓީގެ ރައީސާއި ނައިބު ރައީސްގެ މަގާމު އުވާލުމެވެ. އޭގެ ބަދަލުގައި ޗެއާޕާސަންގެ މަގާމަކީ އެންމެ އިސް މަގާމުގެ ގޮތުގައި ހަމަޖެއްސުމަށް ހުށަހެޅުއްވިއެވެ. އޭގެ އިތުރުން ޗެއާޕާސަނަށް އެހެން އެއްވެސް މަގާމެއް އަދާނުކުރެވޭ ގޮތަށް ހަމަޖެއްސުން ވެސް ހިމެނެއެވެ. އަދި މިހާރު ހިމެނޭ ޗެއާޕާސަން ނައިބު (އިދާރީ) އާއި ޗެއާޕާސަން ނައިބު (މާލީ)ގެ އިތުރުން ޗެއާޕާސަން ނައިބު (ސިޔާސީ) މަގާމު އިތުރުކުރުމަށް ހުށަހެޅުއްވިއެވެ.

އެމްޑީޕީގެ ގައުމީ މަޖިލީހަށް މެންބަރުން އިތުރުކުރުމަށް ހުށަހެޅުއްވި އިސްލާހަކީ، މިހާރު ތިބޭ "ދާއިރާ ރައީސް"ގެ ބަދަލުގައި، ޕާޓީގެ މެންބަރުންގެ އަދަދަށް ބަލައިގެން ކޮންމެ ރަށަކުން ގައުމީ މަޖިލިސް މެންބަރު (މަންދޫބު) އިންތިހާބުކުރުމަށެވެ. އެއީ ފުރަތަމަ 100 މެންބަރުންނަށް އެއް މަންދޫބު، 500 މެންބަރުން ހަމަވާނަމަ ދެ މަންދޫބުން އަދި 1000 މެންބަރުން ހަމަވާނަމަ ތިން މަންދޫބުންނެވެ. ނަމަވެސް ތިން މަންދޫބުންނަށް އިތުރުނުކުރާ ގޮތަށް ވަނީ ލިމިޓްކޮށްފައެވެ. އަދި ގައުމީ މަޖިލިސް އެކުލެވިގެންވާ ގޮތުގެ ތަފްސީލު ވެސް ފައްޔާޒްގެ އިސްލާހުގައި ވަނީ ތަފްސީލުކޮށްދީފައެވެ.

އެމްޑީޕީގެ ރިޔާސީ ކެންޑިޑޭޓު ތަބާވާން ޖެހޭ އުސޫލުތައް ކަނޑައެޅުމަށް ވެސް ފައްޔާޒްގެ އިސްލާހުތަކުގެ ތެރޭގައި ހިމެނެއެވެ. އެ އުސޫލުތަކަކީ؛

• ރިޔާސީ ޕްރައިމަރީ ކާމިޔާބުކުރާ ފަރާތަށް، ގައުމީ އިންތިހާބު ކާމިޔާބުވެއްޖެނަމަ ސަރުކާރު އެކުލަވާލުމުގައާއި، މުހިންމު ސިޔާސަތުތައް ކަނޑައެޅުމާއި، ތަންފީޒުކުރުމަށް ގައުމީ މަޖިލީހުގެ ލަފައާއި މަޝްވަރާ ހޯދުމަށް އެއްބަސްވާ އެއްބަސްވުމެއްގައި ޕާޓީއާއެކު ސޮއިކުރުން ލާޒިމުވުން.
• ޕާޓީ ދިވެހިރާއްޖޭގެ ވެރިކަމާ ހަވާލުވެ އޮންނައިރު ސަރުކާރުގެ މައިގަނޑު ސިޔާސަތުތައް އެކުލަވާލުމުގައި ރައީސުލްޖުމްހޫރިއްޔާ ޕާޓީއާއެކު އަބަދުވެސް މަޝްވަރާކުރަންވާން.
• ރައީސުލްޖުމްހޫރިއްޔާގެ އިސް މުޝީރަކަށް ޗެއާޕާސަން އައްޔަންކުރަންވާނެ.
• ރިޔާސީ ޕްރައިމަރީ ކާމިޔާބުކުރާ ފަރާތަކީ ގައުމީ މަޖިލީހުގެ މެންބަރެއް ކަމުގައިވާނަމަ، ޕާޓީއާއެކު ޕާޓީއާއެކު އެއްބަސްވުމުގައި ސޮއިކުރާ ދުވަހުން ފެށިގެން އެފަހަރުގެ ރިޔާސީ އިންތިހާބު ކާމިޔާބުކުރާ ފަރާތުން ރައީސުލްޖުމްހޫރިއްޔާގެ ހުވާކުރާ ދުވަހާ ހަމައަށް ގައުމީ މަޖިލީހުގެ މެންބަރެއްގެ ގޮތުގައި ހިމެނޭނެ.

އެމްޑީޕީގެ އަސާސީ ގަވާއިދަށް ހުށަހަޅާފައިވާ އިސްލާހުތަކަށް ވޯޓަށް އެހުމަށް ހަމަޖެހިފައިވަނީ މިއަދު ހަވީރުއެވެ.