ރަސްމާލޭގައި ހިންގުމަށް ހަމަޖެހިފައިވާ ޔޫއޭއީގެ އީގަލް ހިލްސް ކުންފުނީގެ 20 ބިލިއަން ޑޮލަރުގެ މަޝްރޫއުގައި ކަންބޮޑުވުމެއް ނޯންނާނެ ކަމަށާއި މި މަޝްރޫއުން ރާއްޖޭގެ ތަނަވަސްކަމަށް އިންގިލާބީ ބަދަލެއް އަންނާނެ ކަމަށް އިންފްރާސްޓްރަކްޗާ، ހައުސިން އެންޑް އާބަން ޑިވެލޮޕްމަންޓް މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެއެވެ.

ފަތުރުވެރިކަމުގެ ގާނޫނާއި ގަވާއިދުތަކަށް ބަލާއިރު މިއީ ރާއްޖެއަށް އާ ކަމެއް ނޫންކަން ފާހަގަކުރައްވައި ދައުލަތުގެ މީޑިއާ، ޕީއެސްއެމްއަށް ދެއްވި އިންޓަވިއުއެއްގައި މިނިސްޓަރު ވިދާޅުވި ގޮތުގައި، މި މަޝްރޫއުގެ މައިގަނޑު މަގުސަދަކީ ފައިދާހުރި ރިއަލް އެސްޓޭޓް މާކެޓެއް އުފެއްދުމެވެ.

މި ތަންތަން ދާއިމީ ގޮތެއްގައި އެއް ބަޔަކު ހިފައިގެން، ދަރިންގެ ދަރިންނަށް ވާރުތަވެގެންދާ ގޮތަށް ދައުލަތުގެ ބާރު ނޯންނަ ގޮތަކަށް ދޫކޮށްނުލާނެ ކަމަށް މިނިސްޓަރު ވިދާޅުވިއެވެ. އެގޮތުން، ތަނެއް ވިއްކާލާ ނަމަ ނުވަތަ ބަދަލުކުރާ ނަމަވެސް، އެކަން ކުރެވޭނީ ސަރުކާރުން ގަބޫލުކުރާ ފަރާތްތަކަށް ކަމަށާއި، އެއްވެސް އިރެއްގައި ދައުލަތުގެ ކޮންޓްރޯލް ނެތިގެން ނުދާނެ ކަމުގެ ޔަގީންކަން މިނިސްޓަރު ދެއްވިއެވެ.

ރިސޯޓުތަކުގެ ހިއްސާ ބަދަލުވެގެންދާއިރު ސަރުކާރުގެ ބާރެއް ނޯންނަކަން ފާހަގަކުރައްވައި މުއްތަލިބު ވިދާޅުވީ، ރަސްމާލެ މަޝްރޫއުގައި އެކަމަށް ރިއާޔަތްކޮށްފައިވާނެ ކަމަށެވެ. މި މަޝްރޫއާ މެދު އިދިކޮޅު ފަރާތްތަކުން ކަންބޮޑުވުން ފާޅުކުރަނީ، މިއީ ރާއްޖޭގައި މިހާތަނަށް ނުހިންގާ ވަރުގެ ބޮޑު މަޝްރޫއަކަށް ވެފައި، މީގެ ސަބަބުން ލިބޭނެ ފައިދާތައް ބޮޑުކަމުން ރައްޔިތުންގެ ސަމާލުކަން ހޯދުމަށް ކަމަށް އޭނާ ވިދާޅުވިއެވެ. އަދި މިހާތަނަށް ސޮއިކޮށްފައިވާ ކޮމާޝަލް ޓާމްސްތަކާއި ކުރިއަށް އޮތް ތަނުގައި ސޮއިކުރާނެ ޑެފިނިޓިވް އެގްރީމެންޓުގައި ވެސް ރާއްޖޭގެ އިސްތިގުލާލަށް ބުރޫއަރާނެ ފަދަ އެއްވެސް ކަމެއް ނޯންނާނެ ކަމަށް މިނިސްޓަރު ވިދާޅުވިއެވެ.

ރާއްޖޭގެ ރީތިކަން ވިއްކައިގެން އާމްދަނީ ހޯދުމަށް ފަށާ މި ރިއަލް އެސްޓޭޓް ޓޫރިޒަމަކީ މިހާރު ހިނގަމުންދާ ރިސޯޓު ޓޫރިޒަމަށް އިތުރު ފުރިހަމަކަމެއް ގެނެސްދޭނެ ކަމެއް ކަމަށް މިނިސްޓަރު ސިފަކުރެއްވިއެވެ. އީގަލް ހިލްސް ކުންފުނިން 20 ބިލިއަން ޑޮލަރު އިންވެސްޓުކުރި ނަމަވެސް، މި މަޝްރޫއުގެ ސަބަބުން ރާއްޖެއަށް ވަންނާނެ ފޮރިން ޑައިރެކްޓް އިންވެސްޓްމެންޓް (އެފްޑީއައި) ގެ އަދަދު 30 ނުވަތަ 31 ބިލިއަން ޑޮލަރަށް އަރާނެ ކަމަށް އަންދާޒާކުރެވޭ ކަމަށް މުއްތަލިބު ވިދާޅުވިއެވެ.

މިއީ ރާއްޖޭގެ ފަތުރުވެރިކަމުގެ ދާއިރާގައި މިހާތަނަށް ހިންގި ހުރިހާ މަޝްރޫއެއް އެއްކޮށްލުމުން ލިބުނު އިންވެސްޓްމެންޓަށް ވުރެ ބޮޑު އަދަދެއްކަން ފާހަގަކުރައްވައި، މިނިސްޓަރު ވިދާޅުވީ މި މަޝްރޫއު ކާމިޔާބުކަމާއެކު ހިންގިއްޖެ ނަމަ ރާއްޖޭގެ އިގުތިސާދަށް ބޮޑު ކުރިއެރުމެއް ލިބޭނެ ކަމަށެވެ.